TAKORLOORUK ukiuni 100-ni siullerni kristumiuullutit. Ilagiit apustilimit Paulusimit allagarseqqammerput. Atuarneqarmata tusarnaarputit maluginiarlugulu Paulusip “Allakkat Illernartut”, tassa Allakkat Hebræerisuut, arlaleriarluni issuarai. (2 Timotheusi 3:15) Eqqarsarputit: ‘Sumit issuaanera paaserusukkaluarpara.’ Tamannali ajornaatsuinnaanngilaq. Sooq?

Paulusip nalaani “Allakkat Illernartut” qanoq isikkoqarnersut eqqarsaatigiuk. Quppernermi matumani Esajap allagaata ilamernga allakkat imusat Immap Uumaatsup eqqaani nassaarineqartut ilaat takusinnaavat. Qanoq isikkoqarpat? Naqinnerpassuit killiffilersuuteqanngillat. Aamma sungiusimasatsitut kapitaleqaratillu verseqanngillat.

Biibilimik allattut tusarliussartik kapitalinut versinullu immikkoortitinngilaat. Atuartut Guutip tusarliussaa tamaat, ilaannaajunngitsoq, atuarniassammassuk tamaat allappaat. Aamma illit asasannit pingaarutilimmik allagarsigaangavit taamaaliortarunarputit. Allakkap ilaannaa atuaannarnagu allagaq tamaat atuartarpat.

Kapitaleqannginneralli verseqannginnerallu ajornartorsiutaalerpoq. Paulusi issuaagaangami allaannartarpoq “soorlu allassimasoq” imaluunniit ‘soorlu Esaja siulittuisoq’. (Romamiut 3:10; 9:29) “Allakkat Illernartut” tamaasa ilisimalluaqqaarlugit issuarneqartut nassaarineqarsinnaapput.

Tamatuma saniatigut “Allakkat Illernartut” Guutip tusarliussaanik arlalinnik imaqarput. Ukiut 100-t siulliit naalerneranni “Allakkat Illernartut” 66-iupput! Taamaattumik ullumikkut Biibilimik atuartartut amerlanersaat kapitalit versillu kisitsisilersukkat paasissutissanik aalajangersimasunik, soorlu Paulusip allakkamini issuagarpassuinik, qupperaanissamut iluaqutigisarpaat.

Immaqa ima aperissaatit: ‘Taavami kia kapitalit versillu kisitsisitaat Biibilimut ilannguppai?’

Inuit oqartarput tuluk palasi Stephen Langton, kingusinnerusukkut Canterburymi biskoppiuninngortoq, Biibilimi kapitalilersuisuusoq. 1200-kkut aallartinneranni Frankrigimi Parisip ilisimatusarfiani ilinniartitsisuulluni kapitalilersuivoq.

Langton sioqqullugu ilisimatuut innersuussutit pissutiginerugunarlugit Biibili immikkoortunut takinngitsunut kapitalinulluunniit assigiinngitsutigut agguluttarsimavaat. Takorloorsinnaavat kapitalimi ataatsimi ujarlernerup atuakkami, soorlu Esajap allagaani 66-inik kapitalilimmi, ujarlernermit ajornannginnerungaarnera.

Tamakkuli ajornartorsiulersitsipput. Ilisimatuut periutsit assigiinngilluinnartut atortarpaat. Taakkua ilaasa Markusip iivangkiiliua maanna 16-inik kapitalilik kapitalinut 50-it missaannut agguluppaa. Parisimi Langtonip nalaani ilinniartut nunanit assigiinngitsuneersut Biibilitik namminneq oqaatsiminnut nutserneqarsimasut nassartarpaat. Lektorilli  ilinniartullu assigiinngitsunik innersuussuteqartarput. Sooq? Taakkua Biibilii assigiinngitsunik kapitaleqaramik.

Taamaattumik Langton nutaamik kapitalilersuivoq. Atuakkami The Book – A History of the Bible-mi allassimavoq ‘kapitalilersueriaasia atuartartunit ilisimatuunillu iluarineqartoq Europami atugaasorujussuanngortoq’. Kapitalilersueriaaseq Biibilip annerpaartaani ullumikkut atorneqartoq pilersippaa.

Ukiut 300-t missiliorlugit tamatuma kingorna, 1500-kkut qiteqqunneranni, franskip naqiterinermik ilisimasaqarluartup Robert Estiennep periuseq ajornannginnerusoq pilersippaa. Taassuma inuit Biibilimik atuaqqissaarnerulernissaat siunertaraa. Kapitalit kisitsisiisa aamma versit kisitsisiisa assigiissarnissaat iluaqutaangaassasoq paasivaa.

Estiennep siullerpaalluni Biibili versilersunngilaa. Allat taamaalioreersimapput. Ukiut hundredilikkuutaat sioqqullugit juutit allaqqiisartut Biibili hebræerisooq tamaat, Testamentitoqqamik taaneqartartoq, kapitalinut aggulunnagu versinut agguluppaat. Tamatumanili aamma periutsit assigiinngitsut atorneqarput.

Estiennep Kristumiut Allagaataat Grækerisuut, imaluunniit Testamentitaatut taaneqartartut, Biibilimut hebræerisuumut versilersukkamut tulluussarlugit versilersorpai. Siullerpaalluni 1553-imi Biibili tamaat (franskisooq) saqqummersippaa, tamatumanilu nalitsinni kapitalit versillu Biibilini atorneqartut assigingajappaat. Inuit ilaat isornartorsiuillutik oqarput Biibili immikkoortunut aggulunneqarmat ataqatigiikkunnaartoq. Periuserli tamanna Biibilimik naqiterisartunit allanit atugaasorujussuanngorpoq.

Kapitalilersuineq versilersuinerlu ajornanngitsuararsoorpasippoq. Taamaaliornikkut Biibilimi versit “adressilerneqartarput”. Kapitalilersuineq versilersuinerlu Guutimit isumassarsiarititaanngillat. Biibilimilu allassimasut ilaannikkut eqqumiitsumik aggulunneqartarput. Tamannali iluaqutigalugu versit issuarneqartut nassaarinissaat erseqqissaatiginissaallu imaluunniit versit ataasiakkaat nuannarisatta allanut takutinnissaat ajornannginnerulerpoq – soorlu taamaaliortartugut allakkiami atuakkamiluunniit oqaatsit oqaaseqatigiilluunniit eqqaamarusutavut nalunaaqutseraangatsigit.

Kapitalit versillu iluaqutaagaluartut Guutip tusarliussaata immikkoortui tamaasa paasinissaasa pingaaruteqassusia puiunngisaannassavat. Versit ataasiakkaat kisiisa atuarnagit immikkoortut ataqatigiit atuartakkit. Taamaaliornikkut ‘Allakkat Illernartut annannissaq pillugu ilinnik ilisimassuseqalersitsisinnaasut’ ilisimalissavatit. – 2 Timotheusi 3:15.