1-2. Sooq Guutip kiffai pilluarpat? (Jaaku 1:22-25)

 JEHOVAP erneratalu asasaata pilluas­sasugut kissaatigaat. Tussiaat 119:2-mik tussiaasiortoq ima allappoq: “Pilluarpoq oqaaqqis­saarutaanik maleruaasoq, taassuminngalu ujarlersoq uummatimigut iluunngarluni.” Jiisusilu ima oqarpoq: “Pilluarput Guutip oqaasianik tusartut maleruaasullu!” – Luk 11:28.

² Jehovamut kiffaagatta pilluarpugut. Sooq? Pissutis­saqarluaratta. Pissutaasut ilagaat Guutip oqaasianik ullut tamaasa atuartarnerput ilinniak­kattalu sapinngisatsinnik maleruar­niartarneri. – Jaaku 1:22-25 atuakkit.

3. Guutip oqaasiani atuakkagut maleruaraangatsigit qanoq iluaqutigisarpagut?

³ Guutip oqaasianik maleruaanerput arlalitsigut iluaqutigisarparput. Assersuutigalugu Guutip oqaasianit ilikkakkagut maleruaraangatsigit Jehova nuannaar­tittarparput, tamannalu nammineq nuannaarutigisaqaarput. (Oqal 12:13) Aamma Guutip oqaasiani siunnersuutit maleruaraangatsigit ilaquttatsinni ilagiitsinnilu attaveqarnerput pitsaanerulertarpoq. Tamanna aamma illit inuuninni misigisimas­sagunarpat. Aamma Jehovap inassutaanik maleruaan­ngitsut ajornar­torsiutigisar­tagaasa ilarpassui ajornar­torsiutigineq ajorpagut. Kunngi Daavi isumaqatigaarput. Jehovap inatsisai, maleruagassiai inassutaalu erinarsor­nermigut eqqaareerlugit ima inerniliivoq: “Maleruaraanni tamanna naammattumik akissarsis­sutaassaaq.” – Tuss 19:8-12.

4. Sooq Guutip oqaasiata maleruarnissaa sapernarsinnaava?

 ⁴ Jehovap piumasaa paasiumallugu Biibili atuaqqis­saartas­savarput, ilikkak­katsinnik taamaalilluta maleruaanias­sagatta. Ulapittarattali tamanna imaannaajuaan­nanngilaq. Biibilimik atuartar­nissamut piffissaqar­niartariaqarpugut. Taamaattumik ullut tamaasa Biibilip atuartar­nissaanut siunnersuutit sammeriartigit. Aamma atuakkatta eqqarsaatigisar­nissaannut inuunitsinnilu maleruar­nissaannut qanoq iliorsin­naanersugut sammissavarput.

GUUTIP OQAASIANIK ATUARNISSANNUT PIFFISSALIISARIT

5. Suut ulapputigisarpagut?

⁵ Jehovap innuttai ulapputeqartarput. Akisussaaf­fitsinnik Biibili naapertorlugu pingaaruteqartunik isumagin­ninniarluta piffissangaatsiaq atortarparput. Assersuutigalugu amerlasuujusugut imminut pilersorumalluta ilaquttagullu pilersorumallugit sulisarpugut. (Tim 1. 5:8) Kristumiorpassuit ilaquttatik napparsimasut utoqqalisul­luunniit isumagalugit ikiortarpaat. Tamattalu peqqissutsikkut imminut paariniar­tariaqarpugut, tamannalu piffissamik atuinarsinnaavoq. Aamma ilagiinni suliassaqar­tarpugut. Sapinngisatsinnik oqaluus­seqataasarneq akisussaaffiuvoq pingaarutilik. Inuuninni pisussaaffivit saniatigut Biibilip atuartar­nissaanut atuakkavillu eqqarsaatigisar­nissaannut qanoq piffissaqarsinnaavit maleruar­nissaanillu sulissutigin­nillutit?

6. Biibilimik atuartarnissat qanoq qulakkeersin­naaviuk? (Aamma asseq takuuk).

⁶ Inuunitsinni pingaar­nerpaat ilagaat Biibilimik atuartarneq, taamaattumik atuartar­nissarput qulakkeerusupparput. (Flp 1:10) Inuk pilluartoq pillugu tussiaammi siullermi allassimavoq ‘Jehovap inatsisaanik nuannarisaqartoq inatsisaanillu eqqarsaatigin­nittartoq ullukkullu unnuakkullu’. (Tuss 1:1, 2) Erseqqippoq Biibilimik atuartar­nissamut piffissaliineq pingaaruteqartoq. Qaqugukkut piffissaal­luartukkut Biibili atuarneqarsinnaava?  Ullup qanoq ilinera piffissaal­luarnersoq inummiit inummut assigiin­ngiiaarsinnaavoq. Atuartar­nissamilli pilersaarusiorneq pingaaruteqarpoq. Qatanngut Victorimik atilik ima oqarpoq: “Ullaakkut Biibilimik atuartarnera nuannaraara. Makiaarneq nuannarival­laanngik­kaluarlugu ullaakkut eqqarsaatikka allamut saaqqajaaneq ajorput.” Aamma ilinnut taamaappa? Una eqqarsaatigiuk: ‘Ullup qanoq ilinerani Biibilimik atuartaruma uannut pitsaanerpaassava?’

ATUAKKATIT EQQARSAATIGISAKKIT

7-8. Atuakkatsinnik qanoq pissarsiaqarluan­ngitsoorsin­naavugut? Assersuuteqarit.

⁷ Biibilimik atuartar­nissannik pilersaarusioreerlutit aamma allamik eqqumaf­figisas­saqarputit. Atuarnikuuit kinguninngualu atuakkatit puiorlugit? Tamatta tamanna misilin­nikuugunarparput. Ajoraluar­tumillu aamma Biibilimik atuarnitsinni taama pisoqarsinnaavoq. Immaqa ullut tamaasa Biibilimi kapitalerpaaluit atuartar­nissaannik anguniagaqarpugut. Tamanna ajunngil­luinnarpoq. Anguniagaqar­tussaavugut angunissaallu pimoorullugu. (Kor 1. 9:26) Biibilimilli atuarneq aallarniutaaginnarpoq. Pissarsiaqarfigil­luassagutsigu iliuuseqar­nerusariaqarpugut.

⁸ Assersuut una eqqarsaatigeriaruk: Naasut imermik, ilaatigut sialummik, pisariaqar­titsipput. Piffissalli sivikitsup iluani siallerpal­laaruni issoq masappal­laalersinnaavoq. Taama pisoqarpat naasut iluaqutiginavian­ngilaat. Ataatsikkut taamarsuaq siallin­nginnissaa iluaqutaanerusarpoq. Sialummi issumut masatserigaangat naasup ineriar­tornissaanut iluaqutaasarpoq. Taamatuttaaq Biibili sukkavallaamik atuarnaveersaar­tassavarput, tassa atuakkatta pigiliun­nissaannut piffissaqarluar­tassaagut. Taamaalillutami atuakkagut eqqaamal­lugillu maleruarsin­naavagut. – Jaak 1:24.

9. Biibilimik sukkaval­laartumik atuartarluta paasigutsigu qanoq iliussaagut?

⁹ Paasinikuuiuk ilaannikkut Biibilimik sukkaval­laartumik atuartarlutit? Qanoq iliorsinnaavit? Eqqissiivillutit atuarit atuakkatit eqqarsaatigil­luarnias­sagakkit. Tamannalu sapernar­tuusariaqanngilaq.  Sivisunerusumik atuarniarlutit aalajangersin­naavutit, taamaalillutit atuakkavit eqqarsaatiginis­saannut piffissaqar­niassagavit. Imaluunniit aalajangersin­naavutit versit arlaqan­ngitsut atuarniarlugit, piffissallu sinnera atuakkavit eqqarsaatigil­luarnis­saannut atorlugu. Victor eqqaaneqareersoq ima oqarpoq: “Biibili annikitsun­nguamik atuartarpara, immaqa kapitali ataasiinnaq. Ullaaralaakkut atuartarama ullup ingerlanerani atuakkakka eqqarsaatigisarsin­naavakka.” Qanorluunniit periaaseqaraluaruit pingaaruteqarpoq sukkaval­laanngitsumik atuartarnissat, taamaalillutit atuakkatit eqqarsaatiginias­sagakkit. – Tuss 119:97; ungalusaq “ Apeqqutit eqqarsaatigisassat” takuuk.

10. Ilikkakkavit maleruar­nissaannik assersuuteqarit. (Tessaluunikamiunut 1. 5:17, 18)

¹⁰ Versit atuaraangakkit eqqarsaatigisaruk qanoq maleruarsin­naanerlugit. Guutip oqaasianik atuarninni una eqqarsaatigisaruk: ‘Paasissutissat ullumikkut siunissamilu qanoq maleruarsin­naavakka?’ Assersuutigalugu takorlooriaruk Tessaluunikamiunut allakkat siulliit 5:17, 18-ilu atuarlugit. (Atuakkit). Versit taakku atuareerlugit unikaal­lassinnaavutit eqqarsaatigalugulu qanoq akulikitsigisumik qamanngalu pisumik qinusar­nerlutit. Aamma qujamasuutigisatit eqqaasin­naavatit. Immaqa aalajangerputit aalajangersimasut pingasut pillugit Jehova qutsaviginiarlugu. Biibilimi ilinniar­titsissutigineqartut eqqarsaatiginis­saannut minutsialuin­nannguil­luunniit atoraluarukkit Guutip oqaasianik paasinnin­nissannut maleruaanis­sannullu iluaqutigissavat. Biibili atuartarukku ullullu tamaasa ilikkakkatit maleruar­tarukkit Jehovap oqaasianik maleruaanissat pikkorif­figinerulissavat! Sulissutis­sarpassuaqarlutilli paasigukku qanoq iliussavit?

SAPERNAR­TINNGISANNIK ANGUNIAGAQARIT

11. Sooq ilaannikkut imminut artorsilluta misigisin­naavugut? Assersuuteqarit.

¹¹ Biibilimik atuarninni sulissutis­sarpassuaqarlutit paasigaangakku imaassinnaavoq nikallor­tartutit. Ima pisoqartoq takorlooriaruk: Ullumi Biibilimik atuarninni nakerisarsiorneq mianersoq­qussutigineqarpoq. (Jaak 2:1-8) Allanik pinnittarnerit eqqarsaatigalugu aaqqitas­saqarlutit paasivat. Ajunngilaq. Taava aqaguani versit oqaasissannik mianersuus­sinerup pingaaruteqar­neranik ersersitsisut atuarpatit. (Jaak 3:1-12) Ilaannikkut inussiar­niitsunik nikallor­nartunillu oqaaseqar­tarnerit eqqarsaatigilerpat aalajangerlutillu isumalluar­nartunik ineriar­tornartunillu oqaaseqar­tarnissat eqqumaf­figiniarlugu. Ullut pingajussaanni Biibilimik atuarninni  inuit ajortut iliuusiinik nuannarinninneq mianersoq­qussutigineqarpoq. (Jaak 4:4-12) Aliikkutarisar­takkatit mianersor­nerullutit toqqartas­sallugit paasivat. Ullut sisamassaanni misigis­sagunarputit sulissutis­saqangaaravit imminut artorsillutit.

12. Biibilimik atuarninni sulissutis­saqarlutit paasigukku sooq nikallus­sanngilatit? (Aamma quppernerup ataani ilanngussaq takuuk).

¹² Allannguisariaqarlutit imaluunniit arlalinnik aaqqitas­saqarlutit paasigukku nikallus­sanngilatit. Tamannami maniguut­tuuninnut ajunngitsumillu pissutiginiagaqarninnut ersiutaammat. Maniguut­tuugutta Biibilimik atuartassaagut aaqqitas­saqarnerlutalu paasiniar­tarlugu. a Aamma eqqaamajuk kinaassutsip nutaap atiniarnera sulissutigineqar­tuartus­saammat. (Kol 3:10) Guutip oqaasianik maleruaajuar­nissannut suna iluaqutigissaviuk?

13. Piviusorsiortumik qanoq anguniagaqarsinnaavit? (Aamma asseq takuuk).

¹³ Atuakkatit tamaasa ataatsikkut maleruar­niarsarinagit piviusorsiortumik anguniagaqarsin­naavutit. (Uss 11:2) Immaqa imaaliorsin­naavutit: Sulissutissatit allattukkit. Taava ataaseq marlulluunniit toqqariarlugit sulissutigeq­qaakkit, sinnerilu kingusin­nerusukkut sulissutigalugit. Suna aallartis­sutigissaviuk?

14. Anguniagaq suna aallartis­sinnaaviuk?

¹⁴ Immaqa anguniagassaq sapernar­tinngisat aallartis­sutigisinnaavat. Imaluunniit ingerlaannaq sulissutigineqartussaq aallartis­sinnaavat. Suna sulissutigis­sanerlugu aalajangereerukku atuagas­siaatigut, soorlu Jehovap Nalunaajaasuisa ujarliutaat imaluunniit INTERNETIKKUT ATUAGAATEQARFIK Watchtower  misissorsin­naavatit. Anguniakkat pillugu qinugit Jehovalu qinnuigalugu ‘piumassuseqalersin­naaqqullutit pissatsil­lutillu’. (Flp 2:13) Taava ilikkakkatit maleruar­niartakkit. Anguniakkat siulleq angoreerukku anguniakkavit allap angunissaanut piumassuseqar­nerulis­sagunarputit. Tamannalu allannguiuar­nissannut kajumis­sissutigisinnaavat.

GUUTIP OQAASIA ‘ILINNI SUNNIUTEQAR­TITTARUK’

15. Biibilimik atuartartunit amerlanernit Jehovap kiffai qanoq allaaneruppat? (Tessaluunikamiunut 1. 2:13)

¹⁵ Inuit ilaat oqartarput Biibili arlaleriarlugu atuarsimallugu. Biibilili upperaat? Ilikkakkatik inuunerminni maleruarpaat? Ajoraluartumik akissutaa naamiuvoq, inuimmi amerlanerit Biibilimi siunnersuutit maleruarneq ajorpaat. Jehovap kiffaanit allaanerungaaramik! Uagut kristumiut siulliit ilaarlugit Biibili ‘Guutip oqaasiatut upperaarput’. Inuunitsinnilu sapinngisatsinnik ilikkakkagut maleruar­niartarpagut. – Tessaluunikamiunut 1. 2:13 atuaruk.

16. Guutip oqaasiata maleruar­nissaanut suna iluaqutigisin­naavarput?

¹⁶ Guutip oqaasiata atuarnissaa maleruar­nissaalu imaannaan­ngitsuusin­naapput. Atuartar­nissatsinnut piffissaasuasin­naavugut. Imaluunniit atuapal­lassinnaavarput immaqalu pissarsiaqarfiginagu. Aamma imaassinnaavoq sulissutis­sarpassuaqaratta imminut sapersittugut. Sunaluunniit unamminiagarigaluarukku Jehovap ikiuineratigut qaangersinnaavat. Jehovap ikiuiniarnera akuerigutsigu ‘tusartuussaagut puiutunatalu malueruaas­salluta’. Qularnanngilaq Biibili atuarnerusarutsigu inuunitsinnilu ilikkakkagut maleruarutsigit pilluar­nerulis­sasugut. – Jaak 1:25.