1. Jiisusip uagutsinnut tunissutaasa ilaat suuppat?

 INUNNI Jiisusimit tukkornerusoqanngilaq. Nunarsuarmiik­kallarami tupinnar­tuliorsin­naanini allanik ikiuinissamut atortarpaa. (Luk 9:12-17) Pingaar­nerpaatullu uagut pilluta inuunini pilliutigaa. (Joh 15:13) Makititaanerminiilli Jiisusi tukkortuujuarpoq. Neriorsuinermisut ilinniar­tinneqar­niassagatta tuppallersar­neqarnias­sagattalu Jehova qinnuigaa anersaamik illernartumik tuneqqulluta. (Joh 14:16, 17, q.a.i.; 16:13) Nunarsuarlu tamakkerlugu Biibili pillugu ilinniar­titsissagatta ataatsimiinnerit aqqutigalugit Jiisusip ikiortuarpaatigut. – Mat 28:18-20.

2. ‘Inuit tunissutitut tunniun­neqartut’ ilaat kikkuuppat? (Efesossimiut 4:7, 8)

² Jiisusip aamma allamik tunissuteqarfigaatigut. Apustili Paulusi allappoq Jiisusip qilaliarnermi kingorna ‘inuit tunissutitut tunniukkai’. (Efesossimiut 4:7, 8 atuakkit). Nassuiaavorlu Jiisusip taakku tunniukkai ilagiit assigiin­ngitsutigut nakussatsin­niarlugit. (Ef 1:22, 23; 4:11-13) Nalitsinni ‘inuit tunissutaasut’ taakkua ilagaat ilagiinni kiffartortut, utoqqaanertat ilagiinnillu nakkutilliisut. a Soorunami taakku tamarmik naammal­luinnan­ngitsuugamik kukkusarput. (Jaak 3:2) Naalakkattali Jiisusip Kristusip angutit taakku atorlugit ikiortarmatigut qujamasuutigeqaagut.

3. ‘Inuit tunissutaasut’ sulinerat tamatta qanoq tapersersorsin­naavarput? Assersuusiorit.

³ Jiisusip ‘inuit tunissutaasut’ ilagiinnik ineriar­tortitseq­qullugit suliassippai. (Ef 4:12) Tamattali pingaarutilimmik akisussaaffianni ikiorsin­naavagut. Tamanna ataatsimiit­tarfimmik  sanaartornermut assersuun­neqarsinnaavoq. Ilaat sanaqataapput. Allallu nerisas­siornikkut, assartuinikkut allatullu ikiuuttarnikkut tapersersuisarput. Taamatuttaaq ilagiinni kiffartortut, utoqqaanertat ilagiinnillu nakkutilliisut sulinerat oqaatsitsigut iliuutsitsigullu tapersersorsin­naavarput. Ilungersornerat qanoq iluaqutigisar­neripput aamma taakkununnga Jiisusimullu ‘inunnik tunissutaasunik’ tunnius­sisumut qujamasunnerput qanoq ersersis­sinnaaneripput sammeriartigu.

ILAGIINNI KIFFARTORTUT IKIORTAAPPUT

4. Kristumiut siulliit nalaanni ilagiinni kiffartortut qanoq ikiuisarpat?

⁴ Kristumiut siulliit nalaanni qatanngutit angutit ilaat ilagiinni kiffartortutut toqqarneqarput. (Tim 1. 3:8) Paulusip “ikiortit” eqqaagamigit taakku pigunarpai. (Kor 1. 12:28) Utoqqaanertat ilinniar­titsineq ilagiinnillu paarsisuuneq aallussin­naanias­sammatigit ilagiinni kiffartortut pingaarutilinnik allanik suliassaqartarput. Assersuutigalugu imaassinnaavoq Allakkanik Illernartunik allaqqiinermi ikiuuttartut tamatumun­ngaluunniit atortussanik pisariaqar­tinneqartunik pissarsiniartartut.

5. Nalitsinni ilagiinni kiffartortut ilaatigut qanoq ikiuisarpat?

⁵ Qatanngutit angutit illit ilagiinni kiffartortut qanoq ikiuuttarpat? (Pet 1. 4:10) Taakkununnga suliassiis­sutigineqartut ilagaat naatsorsuusiorneq, oqaluus­siffigisar­takkanik aaqqissuussineq, Biibililersaarutinik isumaginninneq, ataatsimiinnerni ataatsimeersuar­nernilu teknikkilerineq, ikiortitut tikilluaq­qusisarneq ataatsimiit­tarfimmillu aserfal­latsaaliuineq. Ataatsimiinnerit pissarsiaqarfigil­luarnias­sagatsigit aaqqissuus­saasumillu oqaluus­sisinnaanias­sagatta tamakku tamarmik pisariaqarput. (Kor 1. 14:40) Aamma ilagiinni kiffartortut ilaat ulluinnarni ataatsimiinnerni qaqisarput tamanullu oqalugiar­tarlutik. Ilagiinni kiffartortoq aamma oqaluus­sisartoqatigiinnik nakkutil­liisumut ikiortaasutut suliassin­neqarsinnaavoq. Ilaannikkullu utoqqaanertap paarsisutut pulaarnermini ilagiinni kiffartortoq ilagiumasinnaavaa.

6. Sooq ilagiinni kiffartortut tamaviaartut qujamasuutigaagut?

⁶ Ilagiinni kiffartortut sulinerat qanoq iluaqutigisarparput? Beberly, b qatanngut arnaq Boliviami najugalik, ima oqarpoq: “Ilagiinni kiffartor­toqarmat ataatsimiinnerit pissarsiaqarfigil­luarsin­naavakka. Ikiuuttarmata erinarsoqataasin­naavunga, akisarsin­naavunga, oqalugiartut tusarnaarsin­naavakka aamma videut assillu ilinniarfigisin­naallugit. Ataatsimiit­tarfiup isumannaatsuunissaanut najuussin­naanngitsullu internetikkut peqataasin­naanias­sammata ikiuuttarput. Ataatsimiinnerit kingorna asaaqataasarput, naatsorsuusiortarput Biibililersaarutillu pisariaqar­titagut isumagisarlugit. Qujamasuutigeqaakka!” Leslie, Colombiami najugalik utoqqaaner­tamillu uilik, ima oqarpoq: “Uiga ilagiinni kiffartortunit assigiin­ngitsutigut ikiorneqartarpoq. Ilagiinni kiffartor­toqanngitsuuppat uiga ulapinnerus­sagaluarpoq. Taamaattumik aallussil­luarnerat ikiuiumatunerallu qujamasuutigaakka.” Illimmi, aamma taamatut misigisarpit? – Tim 1. 3:13.

7. Ilagiinni kiffartortut qujamasuutigalugit qanoq ersersis­sinnaavarput? (Aamma asseq takuuk).

⁷ Ilagiinni kiffartortut pillugit qujamasuttutut misigisin­naavugut. Biibilimili aamma kajumis­saarneqarpugut ‘qujamasunnerput ersersit­tassagipput’. (Kol 3:15) Kristofip, Finlandimi utoqqaanertap, qujamasunnini qanoq ersersit­tarlugu ima oqaatigaa: “Ilagiinni kiffartortup qanoq qiimmas­sarsimagaanga  kiffartorneralu sooq qujamasuutiginerlugu allattuillunga allassimaf­fimmillu issuaallunga kortimik SMS-imilluunniit nassius­sisarpunga.” Pascalip aamma Jaelip Ny Kaledoniami najugallit ilagiinni kiffartortut qinnuttarpaat. Pascal ima oqarpoq: “Qanittumi ilagiinni kiffartortut qujamasuutigalugit assut qinnuttarpagut Jehova qinnuigisarlugu taakku najoqqullugit ikioqqul­lugillu.” Jehovap qinnutit taamaattut tusartarmagit ilagiin­niittut tamarmik iluaqutigisarpaat. – Kor 2. 1:11.

UTOQQAANERTAT “AKORNGASSINNI TAMAVIAARLUTIK SULISUT”

8. Sooq Paulusi allappa utoqqaaner­taqatini “tamaviaarlutik sulisut”? (Tessaluunikamiunut 1. 5:12, 13)

⁸ Kristumiut siulliit nalaanni utoqqaanertat ilagiit pillugit tamaviaarlutik sulisarput. (Tessaluunikamiunut 1. 5:12, 13 atuakkit; Tim 1. 5:17) Ilagiinni siulersuillutik ataatsimiinnerni ilinniar­titsisarput utoqqaaner­taqatigiittullu aalajangiisarlutik. Aamma uppeqatitik uppernikkut nukittujuar­niassammata asannittumik siunnersor­tarpaat. (Tes 1. 2:11, 12; Tim 2. 4:2) Soorunami angutit taakku aamma ilaquttatik pilersor­niarlugit Jehovamullu qanimut attaveqar­tuarumallutik tamaviaarput. – Tim 1. 3:2, 4; Tit 1:6-9.

9. Nalitsinni utoqqaanertat ilaatigut suut akisussaaffigaat?

⁹ Aamma nalitsinni utoqqaanertat suliassarpas­suaqartarput. Iivangkiiliulersaar­tuupput. (Tim 2. 4:5) Aallussil­luarlutik oqaluus­sisarput, oqaluus­sinermik aaqqissuisarput aamma oqaluus­sillaqqin­neruler­niassagatta ilinniar­tittarluta. Aamma ilagiinni eqqartuus­sisutut nallittuisutut kinaassusersiun­ngitsutullu kiffartorput. Ingasattumik ajortuliorsimasoq Jehovamut qanimut attaveqaleq­qinniassammat ikiorniar­tarpaat. Aamma ilagiit minguitsuunissaat isumagisarpaat. (Kor 1. 5:12, 13; Gal 6:1) Pingaar­nerpaatulli utoqqaanertat savanik paarsisutut ilagiit paarisarpaat. (Pet 1. 5:1-3) Piareersarluarlutik Biibilimik tunngaveqartumik oqalugiartarput, ilagiin­niittut ilisarisimaler­niartarpaat paarsisutullu pulaartarlutik. Utoqqaanertat ilaat suliassiis­sutigineqartut allat isumagiitigalugit ataatsimeersuarnernik aaqqissuisarnermi aamma ataatsimiit­tarfinnik sanaartornermi aserfal­latsaaliuinermilu ikiuuttarput. Ilaallu Napparsim­mavinnut Attaveqar­titanut napparsim­mavinnilu uninngasunut pulaartar­tussanut ilaapput. Ilumummi, utoqqaanertat uagut pilluta tamaviaartarput!

10. Utoqqaanertat tamaviaarlutik sulisut ilaatigut sooq qujamasuutigaagut?

¹⁰ Jehova neriorsuisimavoq paarilluar­neqarnias­sagatta annilaangas­suteqan­nginnias­sagattalu paarsisussanik ivertitsiumaarluni. (Jer 23:4) Johannap, qatanngutip Finlandimi najugallip, tamanna misigaa anaanani perulun­nartumik nappaateqalermat. Ima oqaluttuarpoq: “Misigis­sutsima isumakuluutimalu annittar­nissaat sapernar­tittarpara. Utoqqaanertap ilisarisimal­luanngisama oqaloqatigiganni tusarnaaq­qissaarpaanga, qinoqatigaanga Jehovamillu asaneqartunga paasitillunga. Qanorpiaq oqarnersoq puioraluarlugu eqqaamavara toqqissisimasutut misigalunga. Jehovap taanna aqqutigalugu piffissaq eqqorlugu ikiorpaanga.” Illimmi, utoqqaanertanit qanoq ikiorneqar­nikuuit?

11. Qanoq ersersis­sinnaavarput utoqqaanertat qujamasuutigalugit? (Aamma asseq takuuk).

¹¹ Jehovap kissaatigaa utoqqaanertat “sulinerat pillugu” qamannga pisumik qujamasunnerput ersersit­tassagipput. (Tes 1. 5:12, 13) Henrietta, Finlandimi najugalik, ima oqarpoq: “Utoqqaanertat kajumillutik allanik ikiuisarput. Tamannali isumaqanngilaq inunnit allanit piffissaqar­nerullutillu nukissaqar­nerusut. Aamma isumaqanngilaq taakku  namminneq inuunerminni ajornar­torsiorneq ajortut. Ilaannikkut oqarfigiin­nartarpakka: ‘Oqarfigilaarusuppakkit utoqqaaner­taalluaravit!’” Sera, qatanngut arnaq Tyrkiami najugalik, ima oqarpoq: “Utoqqaanertat kiffartor­tuarnias­sagamik qiimmas­sarneqar­nissartik pisariaqar­tittarpaat. Taamaattumik kortimik allaffigisin­naavagut, neriartoq­qusinnaavagut oqaluus­seqatigisarlugil­luunniit.” Illit utoqqaanertamik iliuuseqangaarsimanera pillugu qujamasuutigisannik eqqaasaqarsinnaavit? Taava qujamasunninnik ersersitsiviginissaanut periarfis­sarsiorit. – Kor 1. 16:18.

ILAGIINNIK NAKKUTILLIISUT NAKUSSATSITSISUT

12. Kristumiut siulliit nalaanni ilagiit nakussatsis­sutigisaannik sumik aaqqissuus­saqarpa? (Tessaluunikamiunut 1. 2:7, 8)

¹² Jiisusip angutit ilaat allatut ikiuisussatut ilagiinnut tunissutigai. Taassumannga siulersor­neqarlutik utoqqaanertat Jerusalem­mimiittut Paulusi, Barnaba allallu nakkutil­liisutut angalasartutut aallartippaat. (ApS 11:22) Sooq? Ilagiinni kiffartortut utoqqaanertallu assigalugit angutit taakkua ilagiit nukittorsar­niassam­matigit. (ApS 15:40, 41) Taamatut kiffartor­niarlutik uppeqatitillu qiimmas­sarniarlugit ilinniar­tinniarlugillu pilliuteqartarput, allaallu inuunertik navianar­torsior­tittarlugu. – Tessaluunikamiunut 1. 2:7, 8 atuakkit.

13. Ilagiinnik nakkutilliisut ilaatigut sunik akisussaaf­feqarpat?

¹³ Ilagiinnik nakkutilliisut angalajuarput. Ilaat ilagiit tikeraar­niarlugit kilometerit hundredilip­passuit angalasarput. Sapaatit-akunneri tamaasa ilagiinnik nakkutilliisoq arlaleriarluni oqalugiartarpoq, paarsisutut pulaartarpoq aamma pionerit ataatsimiin­neranni, utoqqaaner­taqatigiit ataatsimiin­neranni  katersuun­nernilu aqutsisuusarluni. Oqalugiaatinik piareersaasarpoq ataatsimeersuar­nernillu aaqqissuisarluni. Pionerinut Ilinniarfinni ilinniar­titsisarpoq ilageeqatigiinnilu pionerinut ataatsimiinnermik immikkut ittumik aaqqissuisarluni. Tamatumalu saniatigut pingaarutilinnik allanik – ilaannikkut nukingin­nartunik – immikkoor­tortaqarfim­minngaanniit suliassin­neqartarpoq.

14. Sooq ilagiinnik nakkutilliisut tamaviaartut qujamasuutigaagut?

¹⁴ Nakkutilliisut angalasartut tamaviaarnerat ilagiit qanoq iluaqutigisarpaat? Nakkutilliisut tikeraar­tarneri pillugit qatanngut angut Tyrkiami najugalik ima oqaaseqarpoq: “Tikeraaraangata uppeqatima ikiornis­saannut piumassuseqar­neruler­tarpunga. Nakkutilliisut naapinnikuusama arlaannaataluunniit misigitin­ngisaan­narpaanga oqaloqatigerusunnanga oqaloqatiginis­sannulluunniit ulapippal­laarluni.” Johannap, eqqaariikkatta, nakkutil­liisumik oqaluus­seqateqarnini ima oqaluttuaraa: “Naapitaqan­ngikkaluarluta ulloq taanna puiunngisaan­nassavara. Angajukka marluk allamut nooqqammerput, maqaasingaarpakkalu. Ilagiinnilli nakkutilliisup asannilluni qiimmas­sarpaanga eqqaasillunga maannak­korpiaq ilaquttagut ungasik­kaluarlugit paratiisissami nuannisaaqatigiin­nissatsinnut killeqan­ngitsunik periarfis­saqassasugut.” Tamatta nakkutilliisut eqqarsaatigalugit assingusunik nuannersunik eqqaamasaqarunarpugut. – ApS 20:37–21:1.

15. (a) Johannesimit allakkat pingajui 5-8 naapertorlugit ilagiinnik nakkutilliisut qujamasuutigalugit qanoq ersersis­sinnaavarput? (Aamma asseq takuuk). (b) Sooq angutit ilagiinni akisussaaf­feqartut nuliaat qujamasuutigis­savagut, tamannalu qanoq ersersis­sinnaavarput? (Ungalusaq “ Nuliaat eqqaamakkit” takuuk).

¹⁵ Apustilip Johannesip Gaajusi kajumis­saarpaa qatanngutit tikeraartut inoroorsaarfigeq­qullugit, ‘aallalerpatalu Guutip iluarisaatut ikiulaaq­qullugit’. (Johannesimit 3. 5-8  atuakkit). Uagut ilaatigut taamaaliorsin­naavugut ilagiinnik nakkutilliisup neriartoq­quneratigut tikeraar­neranilu katersuunnerni najuuttarnikkut. Lesliep, eqqaariikkatta, qujamasunnini aamma allatigut ersersittarpaa. Ima oqarpoq: “Pisariaqar­titaannik isumageq­qullugit Jehova qinnuigisarpara. Uigalu aamma allaffiginikuuagut paasitillugit tikeraar­tarneri qanoq nakussatsis­sutigisimallugit.” Eqqaamajuk ilagiinnik nakkutilliisut uagutsitulli inuinnaammata. Ilaannikkut nappaatit, ernumaneq nikallunganerlu atugarisin­naasarpaat. Imaassinnaavoq illit asannittumik oqaaseqarnerit tunissuteqalaar­nerilluunniit nakkutilliisup ikioqqulluni qinnutaanut akissutaasoq! – Uss 12:25.

‘INUIT TUNISSUTAASUT’ PISARIAQAR­TIPPAGUT

16. Qatanngutit angutit apeqqutit suut eqqarsaatigisin­naavaat? (Ussatit 3:27)

¹⁶ Nunarsuaq tamakkerlugu qatanngutit angutit tunissutitut kiffartorsinnaasut amerlanerusut pisariaqar­tippagut. Qatanngutaaguit angut imermut morsutsin­neqarsimasoq ‘ikiuinissat sapinngiliuk’? (Ussatit 3:27 atuaruk). Ilagiinni kiffartor­tunngornissat anguniagarisin­naaviuk? Ilagiinni kiffartor­tunngoreeruit uppeqatitit pisariaqar­titaannik isumaginiarlugit utoqqaanertatut kiffartornissat anguniagarisin­naaviuk? c Kristumiunut Oqaluus­sisartunut Ilinniarfimmut qinnuteqarsin­naajumallutit inuuninni allannguisinnaavit? Ilinniarfimmi tamatumani ilinniar­tinneqaruit Jiisusip atorluar­nerusin­naavaatit. Ajukkullutit sapertutut misigiguit Jehovamut qinugit. Anersaamik illernartumik tuneqqullutit qinnuigiuk qanorluunniit suliassin­neqassagaluaruit tamanna naammas­sisinnaajumallugu. – Luk 11:13; ApS 20:28.

17. ‘Inuit tunissutaasut’ sumut uppernarsaataappat?

¹⁷ Qatanngutit angutit Jiisusip tunissutitut toqqagai ulluni kingullerni makkunani taassuma najorluta siulersuineranut uppernarsaataapput. (Mat 28:20) Pisariaqar­titatsinnik eqqumaf­figinnittumik asannit­tumillu kunngeqaratta qatanngutit angutit aqqutigalugit uagutsinnik ikiuisartoq qujamasuutigeqaarput. Taamaattumik angutit tamaviaartut taakku qujamasunnermik ersersitsiviginis­saannut periarfis­sarsiortarit. Jehovamullu qujasarnissat eqqaamajuk, ‘tunissutimmi ajunngitsut naammal­luinnartullu tamarmik taassumannga pisarmata’. – Jaak 1:17.