Ikiortissarsiorit
Ikiortissarsiorit
“Kisimiittoq sapilerluni aqullaartitaasarpoq; marluusulli artorsartitaanatik akiuussinnaapput.” – Oqaluussisartup oqaasii 4:12.
ALLAT tapersersuinerisigut akerarput ajugaaffiginerusinnaavarput. Pujortartarunnaarusukkuit ilaquttatit ikinngutitillu, imaluunniit ilinnik tapersersuilluarsinnaasut arlaat, ikiortiserigukkit silatusaassaatit.
Pujortartarunnaarsimasunut ikiortissarsiornissat eqqarsaatigiuk, atukkannik paasinniinnaratik aamma tapersersorsinnaavaatsit. “Allanit tapersersorneqarneq qujamasunnaqaaq”, Torben, Danmarkimi Jehovamik Nalunaajaasoq taama oqarpoq. Abraham Indiameersoq ima allappoq: “Ilaquttama uppeqatimalu asanninnermik ersersitsinerat pujortartarunnaarnissannut iluaqutigaara.” Ilaquttalli ikinngutillu tapersersuinerat naammattuaannarneq ajorpoq.
“Ukiuni 27-ni pujortartarnikuuvunga”, angut Bhagwandasmik atilik oqarpoq. “Ileqqut mingunnartut pillugit Biibilimi qanoq allassimasoqarnera paasigakku aalajangerpunga pujortartarunnaarniarlunga. Pujortakkakka ikilisikkaluarpakka. Ilagisartakkakka ilagissaaraluarpakka. Siunnersuisartunut ikiortissarsioraluarpunga. Iluaqutaasoqanngilarli. Naggataatigut unnuit ilaanni Guutimut qamannga pisumik ikioqqullunga qinuvunga. Kiisami naggataatigut pujortassaarpunga!”
Pingaarutilik alla iliuuserineqarsinnaasoq tassa akornutaalersinnaasut piareersimaffiginissaat. Soorlu suut? Tamanna allaaserisami tulliuttumi nassuiarneqassaaq.
[Ungalusaq]
PUJORTARUNNAARSITSINIUTIT ATUSSAVAKKA?
Pujortartarunnaarusuttunut pujortarunnaarsitsiniutit, assersuutigalugu nipittartut, aningaasatigut iluanaarniutaangaarput. Tamakku atulersinnagit apeqqutit tulliuttut eqqarsaatigisinnavatit:
Suut iluaqutissartarai? Oqartoqartarpoq pujortartarunnaarnissaq ilimanaateqarnerusartoq pujortarunnaarsitsiniutit pujortagunnaveersaartitsisaramik. Ungasinnerusorli isigalugu qanoq sunniuteqarsinnaatigineri isumaqatigiinngissutaavoq.
Suut naviaanaatigai? Pujortarunnaarsitsiniutit ilaat merianngunermik, isumatsaqqanermik imminullu toqunnissamik eqqarsaateqalernermik kinguneqartitsisinnaapput. Aamma eqqaamajuk nikotininut taarsiullugu katsorsaatit akui aanngajaarniutaammata allaanerulaaginnartut, tamakkulu peqqissutsimut arlalitsigut navianaateqarsinnaapput. Tassa nikotinimut taarsiullugu atuisut suli pinngitsuisinnaannginertik anigunngilaat.
Allatut qanoq iliortoqarsinnaava? Apersuinermi pujortartarunnaarsimasut 88 procentii oqarput pujortartarunnaarnissamut akiuunnermi atortunik atuinatik ullormiit ullormut pujortartarunnaarsimallutik.