Uumissuinerup kalunnerinit aniguisitaaneq

OQALUTTUARTOQ: JOSÉ GOMEZ

1964-imi septembarip 8-ani Rognacimi inunngorpunga, illoqarfeerannguami Frankrigip kujataaniittumi. Angajoqqaakka, aatakka aanakkalu sigøjneriupput Andalusiamiut Algeriami Marokkomilu inunngorsimasut. Sigøjnerit ileqqutoqaat malillugu ilaqutariissuartut najugaqatigiippugut.

Ataataga nakuuserartuuvoq, meeraaninniillu eqqaamasama siulliit ilagaat ataatama anaanaga unataraa. Naggataatigut anaanaga avinniarluni aalajangerpoq, tamanna sigøjnerit akornanni qaqutigoorluinnartuuvoq. Nukara, aleqara uangalu Belgiamukaqatigaatigut, tassanilu ukiuni arfineq-pingasuni eqqissilluta inuuvugut.

Pissutsilli allanngorput. Uagut meeqqat ataatarput takoqqikkusulerparput, taamaattumik anaanap Frankrigimut uteqatigaatigut ataatalu uterfigeqqillugu. Ataatanneeqqilernera uannut nutaanik unamminiarnartoqarpoq. Belgiamiikkallaratta anaanarput sunik tamanik suleqatigisarparput. Ataatamali ilaqutaasa aalajangiusimalluinnarpaat angutit anguteqatitik kisiisa ilagissagaat. Angutit taakkua angussuartut isumaat malillugu angutit kisimik pisinnaatitaaffeqarput, aamma arnat kisimik pisussaaffeqarput. Assersuutigalugu ullut ilaanni atsaga nerereernermi torersaasoq ikiorniarakku akkama anguteqatinnoortartuunerarpaanga. Ilaqutaani erruineq arnat suliassaattut isigineqarmat. Piffissap ingerlanerani uangattaaq taamatut isumaqalerpunga.

Sivitsunngitsorli ataatama anaanaga kamarujussuarfigeqqittalerpaa. Nukaralu akunnermiliunniaraluaraangatta ataatap annersinnginniassammatigut qassiinik igalaakkut qimaasariaqartarpugut. Aleqaralu eqqorneqanngitsuunngilaq. Tamakku pissutigalugit sapinngisara tamaat angerlarsimannginniartarpunga. 15-inik ukioqarlunga inuuninni anguniagaqanngilanga.

Kamarujussuartarneralu tusaamaneqaatigilerpara. Inupalaajunera iluaraara. Ilaatigut angutit inuusuttut allat piaaralunga kamassaartarpakka, amerlanngillalli uannut qununatik akiuiniartartut — savimmik kalunnernilluunniit sakkoqarajunnera pissutaanerusarpoq. Aamma biilinik tillittarpunga tuniniartarlugillu. Ilaatigut nuannariinnarlugu ikuallattarpakka qatserisartullu qatserisut isiginnaartarlugit. Kingusinnerusukkut pisiniarfinni quersuarnilu tillinniartalerpunga. Amerlasooriaqalunga tigusaasarpunga, tamatigullu Guutimut ikioqqullunga qinusarpunga.

Aap, qanorluunniit eqqumiippasitsigigaluarpat Guuti upperaara. Belgiami najugaqartilluta katuullit atuarfianni ilinniartuuvunga, taamaattumik iliuutsikka ajortuusut nalunngilluinnarpara. Guutimulli uppernera pissusilersorninnut sunniuteqanngilluinnarpoq. Isumaqarpunga iliuusissatuara tassaasoq Guutimut qinuneq, taava ajortuliakka isumakkeerfigineqassapput.

1984-imi tillinniarsimanera pissutigalugu qaammatini aqqanilinni parnaarussassanngortinneqarpunga. Marseillesimi Baumettes-parnaarussivimmut aallartinneqarpunga. Tassaniitillunga timiga sukkut tamaana kakiortippara, ilaatigut oqaatsinik imaattunik „uumissuineq akiniaanerlu“. Parnaarussivimmiinnera  ileqqorinnerulissutiginngivillugu oqartussaasunut inuiaqatigiinnullu uumissuinerulissutigiinnarpara. Qaammatit pingasuinnaat qaangiuttut iperagaagama aatsaat taama uumissuitigilerpunga. Kingunitsiannguagut inuuninnik allannguissutigisannik ajorluinnartumik pisoqarpoq.

Inuuninni anguniakkanni akiniaaneq pingaarnerpaanngorpoq

Ilaquttama sigøjnerit ilaqutariit allat aaqqiagiinngissuteqarfigilersimavaat. Akkakkalu aalajangerpugut ilaqutariit taakku naapinniarlugit pisimasoq aaqqinniarlugu. Ilaqutariit tamarmik sakkulisarput. Tassani oqqattoqalernerani akkaga Pierre ataatamalu illooraa aallaaneqarlutik toqutaapput. Ima tupaqqatigaanga aqqusernup qeqqaniippunga illuinnarsuut tigumiarlugu nilliallungalu kamangaarama. Naggataatigut akkama ilaata ilungersuullugu illuinnarsuummik arsaarpaanga.

Akkama Pierrep, uannut ataatatut issimasup, annaanera aliasuutigeqaara. Sigøjnerit ileqquat pisarnerallu malillugu aliasuppunga. Ullorpassuarni unngianngilanga neqitornangalu, aamma fjernsynernianngilanga nipilersuummillu tusarnaarniarnanga. Uppernarsaavunga akkama toqunera akiniunniarlugu, ilaquttamali aallaaseqartinnaveersaartuarpaannga.

1984-imi aggustimi sakkutuunngoriartoqqusaavunga. 20-nik ukioqarlunga Libanonimi FN-ip sakkutuuinut eqqissisimatitsiinniartunut ilannguppunga. Toqutsinissaq toqutaanissarluunniit piareersimaffigaakka. Taamanikkut hashimik ikiaroorajuttorujussuuvunga. Tamatuma ilorrisimaartippaanga soriarneqarsinnaanngitsutullu misigisimatillunga.

Libanonimi sakkunik pissarsiniarneq ajornanngitsuararsuuvoq, taamaattumik aalajangerpunga Frankrigimut umiarsuakkut sakkunik nassiussiniarlunga akkaga akiniunniarlugu pilersaarutiga naammassiniarlugu. Tassani najugalinnit illuinnarsuutinik marlunnik imassaannillu pisivunga, taavalu illuinnarsuutit ingutseriarlugit radionut marlunnut toqqorpakka angerlamullu nassiullugit.

Sakkutuujunerma naammassinissaanut sapaatip-akunneri marluinnanngulersut sakkutooqatikkalu pingasut sulinngitsoorpugut. Sakkutuut inaannut uteratta parnaarussaavugut. Parnaarussivimmiitillunga silaarutaasarlunga kamappunga paarsisullu ilaat saassullugu. Gajo-mit, sigøjneriunngitsumit, nikanarsagaanera sapivippara. Aqaguani paanneqqippunga tamatumuuna parnaarussivimmi atorfilimmik. Lyonimi Montluc-parnaarussivimmut aallartinneqarpunga sakkutuujunermalu naammassinissaata tungaanut taakaniillunga.

Kiffaanngissuseq nassaaraara — parnaarussivimmi

Ulloq siulleq Montluc-parnaarussivimmiikkama angummit inuusuttumit inussiarnersumit ilassineqarpunga. Paasilerpara Jehovap Nalunaajaasuisa ilagigaat taannalu uppeqatimilu ilaat sakkoqarumannginnertik pissutigiinnarlugu parnaarussivimmiittut. Tamanna tupigusuutigaara. Paasisaqarnerorusulerpunga.

Jehovap Nalunaajaasuisa Guutimut piviusumik asannittuunerat paasilerpara, ileqqussatigullu najoqqutassanik qutsissunik malitaqarnerat uannut sunniuteqarpoq. Apeqqutissarpassuaqarpungali. Ingammik paaserusuppara toqungasut inuusunik attaveqarfiginnissinnaanersut sinnattut aqqutigalugit — sigøjnererpassuit upperisaattut. Jehovap nalunaajaasuata Jean-Paulimik atillip Biibilimik atuaqqissaaqatiseraanga atuagaq pâratîsime nuname nâgssáungitsumik inûsínauvutit * iluaqutigalugu.

Unnuap ingerlanerinnaani nuannaringaarlugu atualertorpara, atuakkakkalu attorneqaatigeqaakka. Maani — parnaarussivimmi — kiffaanngissuseq piviusoq nassaaraara! Parnaarussaajunnaarama qimuttuitsorlunga angerlarpunga pooqattaga atuakkanik Biibililersaarutinik ulikkaartoq nassarlugu.

Najugaqarfinni Jehovap Nalunaajaasui attaveqarfiginiarlugit Martiguesimi naalagaaffilersaarfimmukarpunga. Piffissaq tamaat oqaluussisartoq Ericimik atilik Biibilimik atuaqqissaaqatigisalerpara. Ullualunnguit qaangiutiinnartut pujortassaarpunga pinerlunniaqatigisartakkakkalu ilagissaarlugit. Aalajangerpunga Ussatit 27:11-mi allassimasoq malinniarlugu: „Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.“ Jehovami Ataataq asannittoq nanivara nuannaartikkusullugulu.

Allannguinermi unamminiarnartut

Kristumiunut najoqqutassianik maleruaalerneq uannut oqitsuinnaanngilaq.  Assersuutigalugu ikiarooqqittalerpunga, sapaatip-akunnerpaaluini ajornartorsiutaasumik. Akiniaarusukkunnaarnissara uannut sapernarnerpaavoq. Ericip nalusaanik illuinnarsuuteqartuaannarpunga, qanorlu ilillunga akkannik toqutsisut akiniassanerlugit pilersaarusiortuarpara. Arlaleriarlunga unnuaq tamaat ujarniartarsimavakka.

Tamanna Ericimut oqaluttuarigakku paasinartumik nassuiaappaanga sakkulisartuartillunga akiniaaniartuartillungalu Guutimut attaveqarlualersinnaanngitsunga. Aalajangertariaqarpunga. Paulusip oqaaqqissaarutaa Romamiunut allakkani 12:19-imiittoq eqqarsaatigilluaqqissaarpara: „Nammineerlusi akiniaaqinasi, asasakka, Guutilli kamaassinera periarfississiuk.“ Tamanna qamanngalu pisumik qinuneq misigissutsima aqunniarnissaannut iluaqutigaakka. (Tussiaat 55:23) Kiisami sakkulisassaarpunga. Ukioq ataaseq Biibilimik atuaqqissaareerlunga decembarip 26-ani 1986-imi imermi kuisinnikkut Jehovamut tunniulluinnarsimanera takutippara.

Ilaquttama ajunngitsumik qisuariarnerat

Ileqqunnik allanngortitsinera angajoqqaama Biibilimik misissuilissutigaat. Kateqqipput, anaanagalu juulimi 1989-imi kuisippoq. Piffissap ingerlanerani ilaquttama arlallit allat tusarliussaq Biibilimiittoq ajunngitsumik qisuariarfigaat Jehovap nalunaajaasunngorlutillu.

Aggustimi 1988-imi aalajangerpunga piffissaq tamaat oqaluussisartunngorniarlunga. Taava Katia, qatanngut arnaq inuusuttoq ilagiitsinniittoq, asannilersoorfigaara. 1989-imi juunip 10-ani katippugut. Aappariinnitsinni ukioq siulleq ajornartorsiuteqanngitsuunngilagut arnanummi isiginnittaasera suli sulissutigisussarujussuugakku. Uiusut nuliaminnut ataqqinninnissaannik kajumissaarut Petrusip allagaani siullerni 3:7-imiittoq malikkuminaatsippara. Pingaarniarnersuarma nununissaanut eqqarsartaatsimalu allanngortinnissaanut Guuti nakussatseqqullunga arlaleriarlunga qinnuigisariaqartarpara. Taamaalillunga siumukariartuaalerpunga.

Suli akkama toqunera aliasuutigisaqaara, ilaatigullu eqqarsaatigigaangakku qullikka nunusinnaajunnaartarpakka. Toqutaaneranik eqqaamasama sakkortuunik misigissuseqalersittarpaanga. Tamakku suli akiortuarpakka. Ukiorpassuarni, allaat kuisereernerma kingorna, ilaqutariit akiuuteqatigisimasatta ilaannik naapitsinissara suli annilaanngatigisarpara. Saassutissagaluarpannga qanoq iliussanerpunga? Qanormita qisuariassaanga? Inuttut pissusitoqqama pisarissanerpaanga?

Ullut ilaanni ilagiit eqqaamiutta ilaanni tamanut ammasumik oqalugiarpunga. Tassani Pepa takulerpara, akkannik toqutsisunut eqqarliusoq. Nassuerutigisariaqarpara takugakku kristumiutut kinaassutsinnut misilinneqaataangaartoq, misigissutsinnilli akiuinera iluatsippoq. Kingusinnerusukkut, Pepa kuisimmat, eqippara Jehovalu kiffartorfiginiarlugu aalajangersimaneranik pilluaqqullugu. Naak taamatut pisoqarnikuugaluartoq maannakkut anersaakkut qatanngutitut isigaara.

Ullut tamaasa Jehova qutsavigisarpara uumissuinerup kalunneriniit aniguinissannut ikiortarsimammanga. Jehovap naakkinnittuliorfigisimanngitsuuppanga ullumikkut sumiissagaluarnerpunga? Taanna qujassutissaqarfigaara ilaqutariittut pilluarluta inuugatta. Aammattaaq siunissamut neriuuteqarpunga — silarsuassaq nutaaq takkukkumaartoq uumissuiffiunngitsoq nakuuserfiunngitsorlu. Aap, Guutip neriorsuutaata piviusunngornissaa tatigilluinnarpara: „Tamarmik eqqissillutik inuussapput viinnequtaatimik figenequtaatimillu ataanni kimilluunniit peersinneqarnatik. Katersaarsuit [Jehovaat] nammineq oqaluppoq.“ — Mika 4:4.  (gE 1/8 03)

[Quppernerup ataani ilanngussaq]

[Qupp. 27-mi assiliartaq]

1985-imi Libanonimi FN-ip sakkutuuini eqqissisitsiniartartuniillunga

[Qupp. 28-mi assiliartaq]

Uanga, Katia ernivullu Timeo Pierrelu