Biibilimi qanoq allassimava?

Guutip isumakkeerfiginngisaanik ajortuliaqarpa?

TOQUMUT pillaagaanermit ajornerusoqarpa? Aap, isumakkeerfigineqarsinnaanngitsumik ajortuliorsimaneq pissutigalugu toqu makititaanissamik neriuuteqarfiunngitsoq. Jiisusi oqarpoq ’isumakkeerfigisassaanngitsumik’ ajortuliaqartoq. — Matthæusi 12:31.

Biibilimili Guuti Guutitut isumakkeerfiginnittartutut oqaatigineqarpoq. Inuit puttarsisaqaqqajaasinnaasarput isumakkeerfiginnikkumasarnatillu, Guutili ’isumakkeerfiginnittuartarpoq’. (Esaja 55:7-9) Imminut akisugaluaqisoq Guutip ernini nunamut aallartippaa pilliutitut ajortit matoorneqaatissaattut, ima naleqartigisumik ajortivut piiarneqarsinnaanngorlugit. — Johannesi 3:16, 17; Apustilit Suliaat 3:19; 1 Johannesi 2:1, 2.

Piffissami aalajangersakkamini Guutip sualuttumik ajortuliorsimasorpassuit makitikkumaarpai, siornatigulli iliuuserisimasaminnut akisussaajunnaarsimassapput. (Apustilit Suliaat 24:15; Romamiut 6:23) Jiisusi oqarpoq ’ajortulianik mitallernernillu tamanik inuit isumakkeerfigineqassasut’, ajortuliat isumakkeerfigineqarsinnaanngitsut kisiisa pinnagit. (Matthæusi 12:31) Immaqa imminut ima aperivutit: ’Ima ajortigisoqarsinnaagami Guuti isumakkeerfiginnissinnaanani?’

Allamik isumataarnissaq ajornarsigaangat

Piaaraluni ’anersaamut mitallernissaq’ Jiisusip mianersoqqusissutigaa. Ajortuliamit taamaattumit pinngitsuutinneqarnissaq ajornarpoq. Nangilluni ima oqarpoq: „Isumakkeerfigineqassanngilaq, silarsuarmi matumani piumaartussamiluunniit.“ (Matthæusi 12:31, 32) Taamatut ajortuliortut ajortuliorsimasulluunniit makitinneqassanngillat.

Anersaamut mitallerneq suugami? Mitallerneq taamaattoq uummammit aallaaveqartarpoq, aamma isummat siunertallu ajortut qulaartarpai. Guutip anersaava illernartoq piaaraluni assortorniarlugu aalajangernerup ajortuliorneq taamaattoq ilungersunarnerulersittarpaa. Assersuutigalugu nunat ilaanni inatsisini immikkoortinneqartarput piaaraluni toqutsineq toqumik pillaatissinneqarsinnaasoq misissuaannermillu toqutsineq taama  sakkortutigisumik pillaatissinneqanngisaannartoq.

Apustili Paulusi Guutimut mitallersuusimasoq allappoq: „Nallittorneqarpunga uppinngissutsinni sianiginagu taamaaliorama.“ (1 Timotheusi 1:13) Anersaaq illernartumut ajortuliorneq piaaraluni anersaamut assortuineruvoq. Aatsaat taamaaliortoqartarpoq uummat ima ajortigilersimappat utertoqarsinnaajunnaarluni.

Paulusip qularnanngitsumik ajortuliorneq taamaattoq unnersuussutigaa allakkami: „Ajornaqaaq allamik isumataarnissamut nutaanngortissallugit taakku qaammarsarneqareersimasut tunissummillu qilammit pisumik ilangeereersimasut, Anersaamik Illernartumik pissarsereersimasut Guutillu oqaasiinik ajunngitsunik silarsuullu pinngorumaartup pissaaneranik ilangeereersimasut kingornali tunussisimasut.“ (Hebræerit 6:4-6) Paulusi allapportaaq: „Sallusuissummi ilisimalereeraluarlugu piaaraluta ajortuliorutta taava pilliutissaqarunnaassaaq ajortit pillugit.“ — Hebræerit 10:26.

Upperisarsiornikkut pisortaasut ilaasa iliuuserisaat pissutigalugit Jiisusi isumakkeerfigineqarsinnaanngitsumik ajortuliornissamut mianersoqqusivoq. Tusaarusunngilaalli. Toqutaatippaat. Kingusinnerusukkut tusarpaat anersaaq illernartup tupinnartuliorsimaneranut assortugassaanngitsumik takussutissaqartoq. Paasitinneqarput Jiisusi toqusunit makitinneqarsimasoq! Paasinarpoq Jiisusi Missiarsiusoq. Taamaakkaluartoq anersaaq illernartoq isumapiloqarlutik assortorpaat Romamiut sakkutuui Jiisusip makititaanera pillugu salloqqullugit akileramikkik. — Matthæusi 28:11-15.

Kristumiunut ilumoortunut mianersoqqussut

Sooruna kristumiut ilumoortut isumakkeerfigineqarsinnaanngitsumik ajortuliornissamut mianersoqqussut pimoorulluinnaraat? Pissutigalugu Guutimik anersaavatalu illernartup sulineranik eqqorluartumik ilisimasaqaraluarluni uummammik ajortumik ineriartortitsinissaq ajornanngimmat. (Hebræerit 3:12) Uagutsinnut taamatut pisoqarsinnaanera sianigisariaqarparput. Judasi Iskarioti eqqarsaatigiuk. Siornatigut Jiisusimut ajoqersugaasimavoq aalajaatsoq. Jiisusip apustiliisa ilaattut toqqarneqarsimammat pissuserissuusimassaaq. Piffissalli ingerlanerani eqqarsaatipiloqalerpoq kissaatipiloqalerlunilu, naggataatigullu taakkua pissaaneqarfigilerpaat. Tamatuma nalaani Jiisusip tupinnartuliortarneranut isiginnittuulluni aningaasanik tillittarpoq. Tamatumalu kingorna piaaraluni Guutip ernera aningaasat pillugit killuutigaa.

Siornatigut kristumiutut aalajaatsuusimagaluartut ilaat piaaralutik Guutimit avissaarsimapput, immaqa narrutsassimaneq, kamanneq, pingaarniarneq piumatussuserluunniit pissutigalugu, maannalu tunussisutut Guutip anersaava illernartoq assortorpaat. Anersaaq illernartup suliai piaaralutik assortorniarpaat. Isumakkeerfigineqarsinnaanngitsumik ajortuliorsimappat? Jehova inaarutaasumik aalajangiisuusussaavoq. — Romamiut 14:12.

Allanik eqqartuussinata uummatitta manngertunngoriartuaarutigisinnaasaanik isertortumik ajortuliorumanata uatsinnut nakkutigigutta silatusaassaagut. (Efesosimiut 4:30) Uatsinnut tuppallersaataavoq paasillugu allamik isumataarutta Jehovap isumakkeerfigingaarumaaraatigut, sualuttumik ajortuliat pineqaraluarpataluunniit. — Esaja 1:18, 19.  (gE 2/8 03)

[Qupp. 18, 19-mi assiliartaq]

Farisiiarit ilaat isumakkeerfigineqarsinnaanngitsumik ajortuliorput