Biibili qanoq allasimava?

Guutip nakuuserneq qanoq isigaa?

NAKUUSERNERUP siammarsimanera assigiinngitsutigullu ersersinneqartarnera ilisimaneqarpoq. Sorsunnermi nakuusernerup saniatigut nakuuserneqarpoq atuarfinni, suliffinni, timersornerup silarsuaani, inupiluit akornanni, ikiaroorniutinik atornerluinerup tuniniaanerullu kingunerisaanik aliikkusersuutitullu atorneqarpoq. Aap, allaat angerlarsimaffinni nakuuserneqarpoq, aappariit akornanni aamma angajoqqaat meeqqallu akornanni. Qanittukkut Canadami misissuisitsinerup takutippaa Canadami arnat angutillu 1,2 millionit ukiut kingulliit tallimat ingerlaneranni minnerpaamik ataasiarlutik aappaminnit nakuuserfigineqarsimasut. Misissuisitsinerup allap takutippaa angutit nuliaminnut nakuusersimasut affaasa missaasa aamma meeqqatik nakuuserfigisimagaat. *

Kisitsisit taakku uissuumminangaarput qularnanngitsumillu tupaallarnarlutik — uagutsinnut soorlu amerlanertunut — kisianni eqqarsaatigilluaraanni ullumikkut nakuuserneq aliikkusersuinermut pingaaruteqartumik ilaalersimasoq, ilaa? Filmini fjernsynimilu nakuusernerit piviusuusaartitaannaanngitsut takutinneqartarput, aammali nakuusernerup pinerani pisimasuinnik assilisat, isiginnaartartut isiginnittoralugit. Nakuuserluni timersuutit ilaat, soorlu assersuutigalugu tilluunneq, nunani amerlasuuni aliikkusersuutitut nuannarineqangaarput. Taamaattumik pissusissamisoorpoq ima aperissalluni: Guutip nakuuserneq qanoq isigaa?

Qangarsuarli piusoq

Nakuuserneq siulleq Biibilimi allaatigineqartoq Mosesimik allakkat siulliit 4:2-15-imi piuvoq. Adamip Evallu angajulliliaata, Kainip, qatanngutini Abeli sinngagingaalerpaa piaaralunilu inuartaralugu. Guutip tamanna qanoq isigaa, qanorlu iliorpa? Biibilimi allaatigineqarpoq Jehovap Kaini sakkortuumik pillaraa qatanngutini toqussimammagu.

Mosesimik allakkat siulliit 6:11-mi atuarparput pisimasumit tamatumannga ukiut 1500-t qaangiuttut nunarsuarmi pissutsit qanoq issimasut. Nunarsuaq ’nakuusernernik ulikkaarsimavoq’. Apereqqippugut: Guuti qanoq iliorpa? Noa iluartoq peqquaa umiarsualiussasoq, angallat karsimut assingusoq, tassani Noa ilaqutaalu annassinnaaqqullugit Jehova nunarsuarmi ulersuartitsippat nungutillugillu inuiaqatigiit nakuusertut taamanikkut inuusut. (1 Mosesi 6:12-14, 17) Kisianni inuit taama nakuusertigilersimanerannut suna pissutaasimava?

Anersaapilunnit sunnerneqarneq

Mosesimik allakkani siullerni oqaluttuarineqartumi takutinneqarpoq inngilit naalangitsut, „Guutip ernerisa“ ilaat, inuttut timeqalersimasut, arnanik nuliarlutik qitornartaarfigalugillu. (1 Mosesi 6:1-4, NV) Kinguaavilu taakku, ’nefiliminik’ taaneqartut,  angutaapput ’tusaamasat’ angisoorujussuit. Ataataminnit anersaapilunnit sunnerneqarlutik qunutitsisunngorput nakuusertunngorlutillu. Ulersuup nuna qarsummagu angutit nakuusertut taakku nungutitaapput, kisianni anersaapiluit anersaanngoqqikkunarput anersaallu silarsuaannut uterlutik.

Biibilimi paasineqarsinnaavoq inngilit pikitsitsiumatuut taakku kingorna inunnut sunniuteqartorujussuusimasut. (Efesosimiut 6:12) Saatani aallaqqaammulli ’toqutsisuusoq’ siulersortigaat. (Johannesi 8:44) Taamaattumik nakuuserneq ullumikkut nunarsuarmi piusoq eqqortumik oqaatigineqarsinnaavoq anersaapilunneersoq, Saatanimeersoq.

Biibilimi mianersoqqussutigineqarpoq nakuusertut salloqittaanissamut pissaaneqartut. Ussatit 16:29-mi allassimavoq: „Nakuusertup tullini salloqittarsaaralugu ingerlavikkut ajortukkut ingerlatilersarpaa.“ Ullumikkut amerlasuut salloqittarneqarput — usserneqarput — nakuusernermik akuersinissaminnut, tapersersuinissaminnut imaluunniit nakuusernissaminnut. Aammattaaq millionillit usserneqarput aliikkusersuutit nakuusertunik unnersiutiginnittut isiginnaarnissaannut. Biibilimi oqaatsit Tussiaat 73:6-imiittut aamma nalitsinni inuusunut naleqqupput: „Taamaattumik makitasaarneq ujamigivaat, nakuuserneq qallersaatitut atisaraat.“

Guutip nakuuserneq uumigaa

Kristumiut silarsuarmi nakuusernermik ulikkaartumi qanoq iliussappat? Jaakup ernerinik Simmiuumik Levimillu oqaluttuaq uagutsinnut ilinniutissamik siunnersuummillu imaqarpoq. Qatanngutaata arnap Dinap Sikemip inui ileqqorluttut akuttunngitsumik pulaartarpai. Kinguneraa illoqarfiup angutitaasa ilaannit pinngitsaalillugu arneriffigineqarnera. Tamatumunnga akiniaaniarlutik Simmiuup Levillu naakkittaallutik Sikemip angutitai tamaasa toquppaat. Kingusinnerusukkut Jaakup Guutimit isumassarsisitaalluni ernermi kamannerat aqussinnaanngisaat perloqquaa oqaatsinik ukunannga: „Simmiuut Levilu qatanngutigiipput savimminnik nakuuserniutillit. Siunersioqatigiiffiannut ornigutissanngilanga, katisimaffianni peqataassanngilanga.“ — 1 Mosesi 49:5, 6.

Kristumiut kajumissaarummut tamatumunnga naapertuuttumik inuit nakuusertartut nakuusernermilluunniit siuarsaasut ilaginaveersaartarpaat. Ersarippoq Guutip nakuusernermut peqataasut nakuusernermillu nuannarisaqartut uumigigai. Biibilimi allassimavoq: „[Jehovap] iluartoq iluanngitsorlu misissuiffigai, nakuusernermillu nuannarisaqartoq uumigaa.“ (Tussiaat 11:5) Kristumiut kajumissaarneqarput aqussinnaanngisamik kamanneq qanorluunniit ittoq — allaat oqaatsikkut — ingalaqqullugu. — Galatiamiut 5:19-21; Efesosimiut 4:31.

Nakuuserneq qaquguluunniit atuukkunnaassava?

Pruffiitip Habakkukip Jehova Guuti aperaa: „Qanoq sivisutigisumik kappialassanerpunga?“ (Habakkuki 1:2) Immaqa illit taamatut aperivutit. Habakukkip apeqqutaa Guutip akivaa „iluaatsup“ peerneqarnissaa pillugu neriorsuummik. (Habakkuki 3:13) Esajap allagaanit siulittuutaasunit aamma neriuuteqalersinneqarpugut. Tassani Guutip neriorsuutaa imaappoq: „Tutsiutissaassapput nakuuserneq illit nunanni, qunutitsineq perlutsitsinerlu killeqarfippit iluanni“. — Esaja 60:18.

Jehovap Nalunaajaasuisa qularutiginngilaat Guutip qanittukkut nakuusernerit assigiinngitsut tamaasa nakuusernermillu siuarsaasut tamaasa peersikkumaarai. Nakuusernernik ulikkaaqqanermut taarsiullugu nunarsuaq ulikkaarneqassaaq ‘Jehovap naalannassusianik ilisimasaqarnermik soorlu ermit matoqqagaa immap naqqa’. — Habakkuki 2:14.  (gE 08/08 02)

[Quppernerup ataani ilanngussaq]

[Qupp. 15-mi assiliartaq]

Nakuuserneq siulleq pivoq Kainip Abeli toqummagu