Silarsuarmi eqqissineq sinnattuinnaanngilaq!

ALFRED Nobel ukiunut hundredelinnut maanna qaangiuteqqammersunut kingumut qiviarsinnaagaluaruni silarsuarmi eqqissineqarnissamik isumalluassagaluarnerluni? Qularnanngitsumik nuannaarutigissagaluarpaa inuppassuit sorsunnernik unitsitsiniarlutik ilumoorlutik iliuuseqartarsimanerat. Aappaatigulli pissutsit piviusut imaannaannginnerat malugissagaluarpaa. Professor Hugh Thomasip tamanna pillugu oqaasii ilumoorput: „Ukiut 1900-kkut inunnik isumaginninnikkut pitsanngorsaaffittut oqartussaasullu piitsut atugarisaannik soqutiginninnerulerfiisut malunnaateqaraluartut ilisarnaataat tassaanerupput maskiinat eqqarasuartaatit, qamussuit sorsuutit, qaartartunik nakkaatitsissutit B-52-it, atomimik qaartartorsualiat missil-illu. Ukiut hundredellit taakku oqaluttuarisaanermi aatsaat taama aassunnitsigalutillu aserorteriffiutigipput.“ Hugh Thomasip oqaatsini ilavai oqarluni „taamaattumik oqallisigineqarsinnaasoq piffissaq taanna ilumut siumukarfittut taaneqarsinnaanersoq“.

Maanna ukiunut 2000-kkunnut isereernitsinni silarsuarmi eqqissinissaq ilimanarnerulersimava? Naamerluinnaq. Ulloq 11. septembari 2001 New Yorkimi Washington D.C.-milu pisimasut eqqaallugit atuagassiami Newsweek-imi ima allassimavoq: „Silarsuarmi timmisartut Boeing 767-it missil-itut atorneqarsinnaatillugit sunaluunniit ajornartutut asuleernertulluunniit oqaatigineqarsinnaajunnaarunarpoq. Ajornerpaavorlu sumilluunniit pinaveersaartitsisoqarsinnaanngimmat.“

Ilaat oqartarput silarsuarmi eqqissinissamut marluk apeqqutaasut. Siullermik, inuit eqqarsartaasiini inuusaasiinilu malunnartumik allannguuteqartoqartariaqarpoq. Aappassaanik, naalagaaffiit tamarmik ataatsimik naalakkersuisoqalertariaqarput. Biibilimi siulittuutigineqarpoq piffissaq silarsuarmi tamarmi eqqissineqarfiusoq nalliukkumaartoq — imaanngitsorli inuit suliniuteqarnerata kingunerisaanik. Tussiaat 46:10-mi issuarneqarpoq Pinngortitsisoq, Guuti Jehova, ima oqartoq: „Nunarsuarmi tamarmi sorsunnerit soraarsikkumaarpai.“ Qanoq ililluni Guuti taamaaliussagami? Taamaaliussaaq naalagaaffini inuppassuit ilumoortut qinnutigisarsimasaat atorlugu. Guutip naalagaaffia taanna tassaanngilaq inuup qamuuna pissusia, tassaallunili naalagaaffivik Guutip nunarsuarmi tamarmi eqqissinermik pilersitsinissamini atugassaa. Pruffiiti Esaja Guutimit isumassarsisitaalluni siulittuivoq naalagaaffimmi tassani innuttaasut ’sorsunnissamut sungiusarunnaassasut’. (Esaja 2:4) Silarsuaq tamakkerlugu ilinniartitsinikkut inuit sungiusarneqassapput eqqissinermi inuunissaannut, taamaalillutillu ’panatik saffiussallugit assallatserummut savissaliaralugit, qalugiusatillu saviliaralugit viinnequtilerissutit’.

Jehovap Nalunaajaasui taamaaliulereerput. Inuiannit assigiinngitsorpassuarnit kingoqqisuugaluarlutik nunanullu 200-nut amerlanerusunut siaruarsimagaluarlutik inoqatiminnut sakkulersorumanngillat. Silarsuarmi sorsunneqarfiusumi arlaannaannulluunniit akuliukkumannginnermikkut takutippaat eqqissineq takorluugaannaanngitsoq, periarfissaasorli piviusoq.

Eqqissineq ilumoortoq Biibilip neriuutissiissutaa paasisaqarfiginerorusuppiuk? Taava atuagassiamik matuminnga naqiterisitsisut allaffigisinnaavatit imaluunniit najukkanni Jehovap Nalunaajaasui saaffigisinnaallugit. (gE 05/08 02)