Meeqqatit atuffattakkit!

„Ornippaanga sarlissiutsillunilu. Atuagaasisarpoq peqillugu nalunaaqutsersimasumik . . . punniinnaasumillu, aperalunilu. . . ’Ataata, uuminnga atuaqatigerusunngilinga?’“ — Clifford Schimmels, perorsaanermi professori.

MEEQQAT ilinniartikkuminarluinnartuuput. Misissuinerit inernerisa takutippaat meeqqat pingasut inorlugit ukiullit qarasaanni ineriartortoqapallattartoq. Angajoqqaat meeqqaminnut atuffassisarnerat, erinarsorfiginnittarnerat, misigissutsiminnillu oqaatiginnittarnerat ineriartornerannut aalajangiisuusinnaavoq pingaarutilik. Misissuinerli naapertorlugu angajoqqaat tamarmik marluk arfineq-pingasullu akornanni ukiulinnik meerallit taamaallaat affaasa missaat ullut tamaasa atuffassisarput. Eqqarsarunarputit: ’Meeqqanut atuffassineq ilumut taama pingaaruteqartigigami?ʹ

Meeraq atuarusussuseqalersiguk

Immikkut ilisimasallit tamanna ilalernartuutippaat; „Meeqqat atuffarissunngortinniarlugit atuffassisarneq ingammik atualinnginneranni pingaarnerpaavoq.“ Atuakkami Becoming a Nation of Readers-imi taama allassimavoq.

Meeqqat oqaluttuanut atuarneqartunut tusarnaaraangamik, naqinnerit atuakkaniittut oqaatsinut tusakkaminnut naleqqiullugit ilikkajaartarpaat. Atuakkani allattaaseq oqaatsillu aamma sungiuttarpaat. Atuffassineq pillugu atuakkami allassimavoq; „Meeraq atuffanneqaraangat qarasaa ajunngitsumik tusarlerneqartarpoq. Atuakkanut naqitanullu allanut atuarnissamut pilerisaarineruvoq meeqqamut nuannersumik eqqaasitsisartoq.“ Taamatut angajoqqaat atuakkanut soqutiginnilersitsiniarnermikkut, meeqqatik inuunerat tamaat atuarusussuseqalersissinnaavaat.

Avatagiisiminnik paasisaqarnerulertarput

Angajoqqaat meeqqaminnut atuffassisartut inuit, sumiiffiit sorpassuillu pillugit ilisimasassaannik iluaqutissingaartarpaat. Atuakkanik qupperaallutik akiliinnguaratik „angalaqatigiissinnaapput“. Assersuutigineqarsinnaavoq Anthony marlunnik ukiulik. Inuugamili anaanaminit atuffanneqartarpoq. Arnaa oqarpoq: „Siullerpaamik uumasuusivissuarmiikkami uumasorpassuit ilisarisinnaavai.“ Qanoq taamaattoqarsinnaagami? Aap, Anthonyp siutituut nimeruaartut, løvit, qungasersuut uumasullu allat aatsaat takugaluarlugit atuakkaninngaanniit nalunngereerpai.

Arnaa oqaluttuarpoq: „Anthony ukiuni marlunni inuuffimmini siullerni inuppassuarnik, uumasorpassuarnik, atortorpassuarnik paasisassarpassuarnillu ilisimasaqalerpoq — tamarmik atuakkaneersunik.“ Aap, meeqqanik mikisuunnguunerinit  atuffassisarneq, silarsuarmik inuuffigisaminnik paasinninnissaannut iluaqutaangaarsinnaavoq.

Ataqatigiinnerulersitsisarpoq

Meeqqat peroriartornerminni siunissami iliuusissaminnut sunniuteqalersussamik isumaqalertarput. Taamaatumik angajoqqaat meeqqaminnut qanimut attaveqalerniarlutik iliuuseqarnerunissaat pingaaruteqarpoq attaveqatigiinneq tatigeqatigiiffiusoq, ataqqeqatigiiffiusoq paaseqatigiiffiusorlu. Atuartarnertaaq iluaqutaangaarsinnaavoq.

Angajoqqaat meeqqatik piffissaqarfigigaangamikkik atuffattarlugillu paasitittarpaat asallugit. Phoebe Canadamiu ernerminik Nathanimik arfineq-pingasunik ukiulimmik atuffassisarnini pillugu oqarpoq: „Uigalu isumaqarpugut Nathanip uagutsinnut qanimut attaveqarneranut tamanna pissutaanerpaasoq. Ammaffigaatigut qanorlu eqqarsarnerluni misiginerlunilu oqaluttuuttarluta. Qanimut immitsinnut attaveqalissutigaarput.“

Cindyp panini ataatsip missaanik ukioqaliinnartoq issiasinnaaliinnartorlu minutsi minutsilluunniit marluk tusarnaarsinnaaliinnartoq atuffattarlugu ileqquliuppaa. Piffissamik atuineq ilungersornerillu asuliinnartarpat? Cindy oqarpoq: „Abigaili atuaqatigigaangakku tamatigut toqqissisimanartuusarnera pissutaalluni atuarfimmi misigisartakkaminik kammalaatiminilluunniit ajornartorsiuteqaraangami oqaluttuukkusuttarpaatigut. Meeqqat taama pissuseqarnerat angajoqqaat nuannaarutigisariaqannginnerpaat?“ Aap, atuffassinerup angajoqqaat meeqqallu attaveqatigiinnerulersissinnaavai.

Meeraq pingaarutilinnik piginnaaneqalertarpoq

„Ullumikkut meeqqat tv-meersunik allaneersunillu atorfissaqanngitsorpassuarnik ajoqutaasorpassuarnillu sunnerneqartarput. Eqqarsartaatsimut iluaqutaasussanik siuneqalersitsisinnaasunillu aatsaat taama pisariaqartitsitsigipput. Najoqqutassanut eriagisassaminnut inuunerminnullu eqqortumik isiginnittaaseqarnissaminnut iluaqutaasinnaasumik siuneqassusermik aalajaallisitsisusamillu pisariaqartsitsipput,“ atuakkami 3 Steps to a Strong Family taama allassimavoq. Taamatut peqqinnartumik ajunngitsumillu sunniuteqartussat soorunami angajoqqaajupput.

Meeqqat oqaluttariarsorlutik allattariarsorlutillu saqqummiussisinnaanissaannut pitsaasumik ilinniartinneqarsinnaapput, oqaaseqatigiinnik ataqatigiissunik aaqqissuulluagaasunillu atuakkaniittunik takutinneqartarnermikkut. Dorothy Butler, Babies Need Books,-imik atuakkiortoq oqarpoq: „Eqqarsarsinnaanitta pitsaassusiat oqaatsinik atuinitsinnit aalajangerneqartarpoq. Ilikkagaqarnissaq poqersuunissarlu eqqarsaatigalugit oqaatsit pingaaruteqarluinnartuupput.“ Allanut ajunngitsumik attaveqarnermik piginnaaneqarneq pingaaruteqangaarpoq.

Aammattaaq angajoqqaat atuakkanit pitsaasunit atuffassisarnermikkut meeqqatik ileqqorissaarsinnaalersittarpaat eriagisassanillu najoqqutassittarlugit. Angajoqqaat meeqqaminnik atuaqatiginnillutillu oqaloqatiginnittartut ajornartorsiutinik aaqqiinissaannut ilinniartittarpaat. Cindyp panini Abigaili atuaqatigitillugu oqaluttuarineqartut qanoq qisuariarfiginerai maluginiaqqissaartarpaa. „Pissusii ersinngitsut angajoqqaatut paasiaarsinnaavavut, taamaalillutalu eqqunngitsumik paasinnilinnginnissaanut ikiortarparput.“ Aap, atuffassineq meeqqat  isummaannut uummataannullu suniuteqarluarsinnaavoq.

Atuffassineq nuannersuutiguk

Angajoqqaat meeqqaminnik atuffassigaangamik qasukkarsimaarnartuutitsinissaat ilorrisimaarnartuutitsinissaallu qaqugulu atuffassiunnaarnissaminnik sianigininnissaat pingaaruteqarpoq. Lena oqarpoq: „Andrew marlunnik ukiulik, ilaannikkut qasusorujussuusarpoq issiangaatsiarsinnaajunnaartarlunilu. Qanoq innera malillugu atuffassinerput naleqqussartarparput. Atuarnermut ajortumik isiginnittaaseqalinnginniassammat pinngitsaalisanngilarput.“

Atuffassineq atuakkanit oqaatsinik atuarnerinnaanngilaq. Assersuutigalugu piffissami eqqortumi assiliartaanik oqaluttuarinninneq pissanganarnerulersitsisinnaavoq. Aamma angajoqqaat oqaluttuaq uummaarinnerulersissinnaavaat atuarnerminnik naleqqussaanermikkut nipimillu allanngorartitsinermikkut erseqqissaanermikkullu. Aammattaaq kissalaarpasilluni atuarneq meeqqanik toqqissisimalersitsigajuppoq.

Meeraq malinnaagaangat kinguneqarluarnerpaasarpoq. Assersuutigalugu angajoqqaat atuffassinerminni unillatsiarsinnaapput aperalutillu angiinnagassaanngitsumik naamiiginnagassaanngitsumillu. Meeraq immaqa akinissaminut arlalinnik periarfissinneqaruni oqaaseqarnerusinnaassaaq.

Atuagassannik toqqaagaangavit narrutuujugit

Meeqqanilli atuffassineq eqqarsaatigalugu pingaarnerpaajuvoq atuakkanik iluaqutaasunik toqqaanissaq. Angajoqqaanut ’angerlarsimalluni suliassaqarnalaarsinnaavoq’. Atuakkat ajortut immikkoortitertariaqarpaat ajunngitsunillu ilinniutissaalluartunik ileqqorissaarnartunillu toqqaallutik. Saqqaa, assiliartai atuakkamilu allaaserinneriaaseq maluginiarluartariaqarpaat. Atuakkat angajoqqaanut meeqqanullu soqutiginartuusariaqarput, oqaluttuaq aalajangersimasoq meeqqat atuaqqeqattaarusukkajuttarmassuk.

Atuagaq Biibilimik oqaluttuaatikka. * Angajoqqaat silarsuaq tamakkerlugu nuannaarutigingaartarsimavaat iluaqutigingaartarsimallugulu. Angajoqqaanut immikkut naleqqussagaavoq meeqqatillu atuaqatigiissutigisinnaanissammassuk. Atuagaq meeqqat atuffarissinissaannut iluaqutaaginnanngilaq, aammali Biibilimik soqutiginnilersitsivoq.

Angajoqqaat meeqqaminnik atuffassisartut, inuuneranni iluaqutaangaartumik atuarnermik ileqquliussisitsisinnaapput. JoAnne panini pillugu oqarpoq: „Jenniferip atuarneq allannerlu ilikkarpai — nuannaralugillu — suli atualernani. Pingaarnerusorli tassa pinngortitsisumut Jehovamut asannissuseqalernera. Oqaasiata Biibilip, tatiginissaa Jenniferip ilikkarpaa, aalajangiiniaraangamilu siunnersiortarlugu.“ Aap, angajoqqaat meeqqaminnik nuannarisaqalersitsiniarnerat piginnaassuseqalersitsiniarnerannit pingaaruteqarnerungaarsinnaavoq. (gE 11/22 01)

[Quppernerup ataani ilanngussaq]

[Qupp. 29-mi ungalusaq/assiliartaq]

Meeqqat atuffakkaangakku

• Mikisunnguuneraniilli aallartigit.

• Atuaqatigiilertinnasi meeqqat eqqissisaqqaaruk.

• Oqaluttuat tamassi nuannarisasi toqqarsigit.

• Periarfissaqarnerit tamaasa atuffassisarit, tiguartinnartumillu

• Aperisarnikkut meeqqat peqataatiguk.

[Qupp. 28-mi suminngaanneernera]

Asseq: The Wildlife Conservation Society’s Bronx Zoo-meersoq