Inuusuttut aperipput:

Qanoq ilillunga aatakkunnut attaveqarnerulersinnaavunga?

„Aataga aanagalu oqaluttuallaqqissuupput. Oqaluttuaasa misigissutsinnik paasitittarpaannga.“ — Joshua.

SIORNATIGUT kinguaariit najugaqatigiittarnerat nalinginnaanerugaluarpoq — angerlarsimaffimmi ataatsimi. Taamaalilluni meeqqat aanakkuminnut aatakkuminnullu attaveqatigiilluarnerat pissusissamisoorneruvoq.

Ullumikkut taamaanngilaq. Ilaqutariinni avissaartuunnerit amerliartuinnarput tamatumunngalu kinguneqarluni ilaqutariit siaruaannerullutik aanakkuminnut attaveqarnerat ungasinnerulerluni. „Aanakkuusut avittoqartillugu aamma eqqugaasarput, ernguttaminnit nuannareqisaminnit attaveqarluarnerat kipineqartarmat,“ taama allappoq aviisi The Toronto Star. Ilaatigut ajornartorsiutaagajuppoq inuusuttut utoqqartaminnut isiginerluisarnerat. Utoqqartartik „ittangagivaat“ isumaqarlutillu allarluinnarmik isiginnittariaaseqartut, namminneq soqutigisaminnit allaalluinnartunik soqutigisallit. Tamatuma kingunerisarpaa inuusuttorpassuit aanakkuminnut tunuarsimaalertarnerat taamaalillutillu qanimut attaveqarnissaagaluartik misiginngitsoortarlugu.

Tamanna assut ajuusaarnarpoq. Atuagassiap matuma allaaserineqartartuni qallunaatuaani oqaluttuarineqarpoq aanakkuminnut attaveqarluarnertik peroriartornerminni iluaqutigisinnaagaat aammalu qanimut attaveqatigalugit nuannersuusoq — ingammik uppertuuppata. * Niviarsiaq Rebekahmik atilik oqaluttuarpoq: „Nuannisartaqaagut.“ Angut inuusuttoq Peter aamma ima oqaluttuarpoq: „Qanoq inninnik oqaloqatigissallugit ersissutiginngilara. Misigivunga angajoqqaanninngaanniit oqaloqatigilluarnerusarlugit. Isumaqarpunga sunalunniit pillugu aanakkukka oqaloqatigisinnaallugit.“

Illimmi? Immaqa meeraallutit qanimut attaveqarfigisimavatit. Kisianni inuusuttuarannguleravit immaqa attaveqatigiinnerup atatiinnarnissaa ajornakusoornerulerpoq? Taamaappat Biibilimi unnersuussut Korinthimiunut allakkat aappaat 6:11-13-miittoq atorluarniarsinnaavat, tassani pineqarpoq ‘uummaterput ammarsinnaagipput’ qamannga pisumik ilalaassuseqarnissatsinnut. Apeqqutaaginnalerpoq qanoq ililluta?

Nammineq iliuuseqaqqaarit

‘Uummaterput ammassagutsigu’ nammineq iliuuseqaqqaartariaqarpugut. Biibilimi ima allassimavoq: „Ajunngitsuut nigorsimatinniaqinagu atorfissaqartitsisumit, ikiuissallutit sapinngikkaangavit.“ (Ussatit 3:27) Meeraallutit  ‘ikiuissallutit sapiissutsit’ aanakkunnut attaveqarninnut immaqa sunniuteqarpallaarsimanngilaq. Maannali allereeravit immaqalu inersimasunngorsimallutit annerusumik iliuuseqarsinnaanerulerputit.

Assersuutigalugu ungasinngisassinni najugaqarpata ileqquliussinnaavat akuttoqatigiimmik alakkartalernissaat. Pikkunaappallaarpa? Taamaassaaq issiaannaruit suliaqarnak oqaaseqarnallu. Taamaattumik oqaloqatigisakkit! Suna pillugu? Aamma tassani Biibilip najoqqutassiaasa ilaat iluaqutaalluarsinnaavoq. Filippimiut 2:4-mi eqqaaneqarpoq uagut nammineq soqutigisaannavut isiginiarpallaassanngikkivut, allalli soqutigisai aamma isiginiartassagivut. Sulerisarnerannik oqaloqatiginiartakkit. Qanoq ippat? Sulerisarpat? Aamma nuannarissavaat ‘qanga’ pisimasut oqaluttuarissallugit. Inuusuttuunerat pillugu oqaluttuaqqusinnaavatit. Imaluunniit ataatat anaanalluunniit meeraallutik qanoq issimanerannik apersorsinnaavatit. Aamma aanakkutit Jehovamut Nalunaajaasuuppata aperisinnaavatit Biibilip sallusuissutaaneranik suna soqutiginnilissutigisimaneraat.

Aanakkutit siuaasatik pillugit ima ilisimasaqartigisinnaapput „toqqorsivik illernartuut“ oqaluttuaminnik ulikkaarsinnaallugu, aammalu nuannarilluinnassavaat tamakku pillugit oqaluttuutissallutit. Illit nuannersumik pissanganartunngortissinnaavat! Immaqa apersorsinnaavatit filmiliaralugit oqaluttuarneralluunniit immiullugu. Qanoq apersuinissat nalornigigukku angajoqqaatit aperisinnaavatit qanoq tulluarnerusunik apersuisinnaanerlutit. Qularnanngitsumik paasissutissarpassuarnik pissarsissaatit aammalu aanakkutit anaanakkutillu paasiuminartinnerulissallugit, immaqalu aamma illit imminut paasinerulaalissaatit. „Aataga aanagalu oqaluttuallaqqissuupput.“ Joshua oqaluttuarpoq. „Oqaluttuaasa misigissutsinnik paasitittarpaannga.“

 Puigussanngilat aanakkuit aamma illit inuunerit malinnaaffigerusuttarmassuk, sulerisarnersutillu paaserusuttarpaat. Illit pillutit oqaluttuaraangavit inuuninnik aveqatigisarpatit, taamaalillusi immissinnut attaveqarnerulissaasi. Igor Frankrigimi najugalik oqarpoq: „Uanga aanagalu neriniartarfeeraliartarpugut tiitoriartorluta, sulerisimanivullu oqaluuserisarpavut.“

Peqatigiillusi susinnaasusi

Oqaloqatigiissinnalerussi soqatigiissinnaalissaasi. Eqqarsaatigillatsiarukku paasilissavat assigiinngitsorpassuartigut soqatigiissinnaallusi. Dara oqaluttuarpoq: „Aanakkuma ilinniartippaannga qanoq igasarnersut, iffiortarnersut naasullu qanoq paarineqartarnersut.“ Amyp aanakkuni ilaqutariittut katersuuttuneeqatigisimavai feeriaqatigisimallugillu. Utoqqaat ilaat suliumatuujusinnaapput, qanoq utoqqaatiginerat apeqqutaalluni. Assersuutigalugu Aaronip aanani golferiaqatigisarpaa. Joshuap aatani aalisariaqatigisarpaa, aatamilu aappaa illumi suliassanik assigiinngitsunik ikiortarlugu.

Aatakkuusut Jehovamut Nalunaajaasuuppata nuannissaqaaq kristumiutut assigiinngitsunik sammisaqaqatigissallugit, soorlu oqaluusseqatigiilluni. Igorip aanani ilagalugu Polenimut Jehovap Nalunaajaasuisa immikkut ittumik ataatsimeersuarnerannut ilagisimavaa. „Peqatigiinneq misigisaavoq puigugassaanngitsoq, oqaluuseralugu aamma nuannareqaarput,“ oqaluttuarpoq. Naak aanakkutit inuummarippallaarunnaarsimagaluartut aalassarippallaarunnaarlutilluunniit piffissaq taakkununnga atukkat asuliinnaanngilaq.

Anersaakkut kingornussaq

Biibilip nalaani arnaq Louisimik atilik ernuttaminut Timotheusimut perorsaaqataalluarsimavoq immikkut ittumik Guutimut kiffartortunngorsinnaaniassammat. (2 Timotheusi 1:5) Ullumikkut aanakkuusut kristumiuusut taamaattuttaaq pingaaruteqarput. Tamatumunnga tunngatillugu Joshua ima oqarpoq: „Uanga inuuninnit sivisunerusumik Jehovamut kiffartorsimapput, taamaattumik ataqqeqaakka, imaanngilaq aanakkugigakkit, aalajaattuarsimaneralli pissutaaqataavoq.“ Amy oqarpoq: „Aanakkuma oqaluttuuttarpaannga Jehovamut kiffartornera qanoq nuannaarutigitiginerlugu. Taakkuliuna maligassiuilluarnerat nikallujuissusiallu piffissaq tamaat Jehovamut kiffartuinnarninnut ikiuutaasut.“

Chrisip aanani eqqartorpaa „taannaasoq allanit atuaqqissaartarnissaminut anersaakkullu nakussatsikkiartortuarnissaminut qiimmassaanerusimasoq“. Imatut ilavaa: „Oqariartaasia puigunngisaannassavara: „Sapinngisarput atorlugu Jehovamut iliuuseqartariaqarpugut.“ Pedrop aanakkui anersaakkut ineriartornerani annertuumik sunniuteqarsimapput. Oqaluttuarpoq: „Misilittagaat iluaqutigeqaakka. Aanama aatamalu oqaluussinermi ilagiuartarpaannga, tamanna nuannaarutigeqaara.“ Aap, aanakkunnut uppertunut attaveqarlualernissat suliniutigigukku Guutimut kiffartornerulernissannut ikiorsinnaavaatsit.

Aanakkutit ungasissumiippata

Aanakkutimmi ungasissumi najugaqarpata? Taamaakkaluarpalluunniit misiliguk akuttunngikkaluamik alakkartarnissaat, pulaanngikkaangakkillu attaveqarfigiinnassallugit isumagiuk. Hornanip aanani aatanilu ukiumut pingasoriaannarluni takusarpai, taamaattorli oqarpoq: „Sapaatit tamaasa sianerfigisarpakka.“ Dara aanakkuminit ungasissumi najugalik oqaluttuarpoq: „Qanoq innersunga tusarusuttarpaat, sapaatillu tamangajaasa sianeqatigiinngikkaangatta e-maileqatigiittarpugut.“ Naak e-mail oqarasuaalluunniit atorsinnaagaluartut pappialatigut allattarnerup naleqassusia tunulliunniaqinagu. Inuusuttorpassuit tupaallaatigigajuppaat paasigaangamikku aatakkuminnut allatatik tamaasa suli toqqortarigaat. Allakkat atuarneqaqattaarsinnaapput — tamatigullu nuannaarutaasarlutik. Taamaattumik allattarnissat puigorniaqinagu!

Ernuttat aanakkunnut pingaaruteqarluinnartuupput. (Ussatit 17:6) Assigiinngitsorpassuartigut aanakkunnut attaveqarluarneq ineriartortinneqarsinnaavoq, qanikkaluarpata ungasikkaluarpataluunnit. Sutigulluunniit aanakkunnut qanimut attaveqarlualernissat misilinniartuaruk. (gE 22/5 01)

[Quppernerup ataani ilanngussaq]