Inuuneq — Tunissutisiaq sernissorneqartariaqartoq

JEHOVA GUUTIP meerartarsinnaassutsimik immikkut pisinnaatitaaffilermatik inuit tunissummik annertoorujussuarmik tunineqarput. Aappariit pilluartut asaqatigiittut meeqqamik asanartumik aappariittut inooqatigiinnermik inernerisaanik tikilluaqqusinissaminnut piareersimassagaluarput, paaqqutarissallugu isumassussallugulu. Meeqqap alliartornera angajoqqaanut nuannaarutissaannarnik nassataqassagaluarpoq.

Adamilli Evallu ajortuliornerat meeraannut kingorna inunngortunut alianartumik kinguneqarpoq. Ajortip kingunerisaanik arnaq siuaasatigut nagguigisarput perloqquneqarpoq, tamatumalu kingunerisaanik ernineri isumakulunnermik timikkullu anniarnermik nassataqartalerput. Avatangiisit ajortilippalaartut meeqqat inunngorfigisaat pissutaallutik meeqqanik perorsaaniarneq ajornakusuulerpoq. Taamaattumillu tupaallannanngilaq ullumikkut silarsuarmi ajornakusoorfiusumi naartulerneq nuannaarnerinnaanngitsumik qisuariarfigineqartarmat. Pinngortitsisulli naartut inunngorsimanngitsut qanoq isigai? Ileqqussatigut najoqqutassat allanngoriartortillugit taassuma isumaa allanngoriartuaarsimava? Naamerluinnaq. Silarsuarmiut meeraannut suli inunngorsimanngitsunut isiginninnera isumassuineralu allanngorsimanngilaq.

Biibilimi erseqqissarneqarpoq meeraq anaanami iluani ineriartortoq inuusoq namminiussusilik. Ilumioqalerfimmi inuuneq aallartittarpoq. Guutip meeraq erniarineqartoq ilisarisimareertarpaa. Ezekielip eqqartorsimavai ’meeqqat anaanap illiaanik ammaasut tamaasa’. (Hesekiel 20:26, NV) Jobip eqqaasimavai „anaanap illiaata matui“, naartullu piikkat ’meeqqatut ullup qaamarnganik takunngisaannarsimasutut’. — Job 3:10, (NV), 16.

Malugiuk Jehova Guutip uumassusilimmut anaanap illiaani alliartortumut asannittumik isumassuissusia. Jeremiasimut ima oqarsimavoq: ’Anaanavit timaata iluani piliarinngikkallarakkilli [ilisaraakkit, NV]; anaanavit timaanit aninngikkallaravilli immikkoortillutit illernartippakkit.“ (Jeremia 1:5) David ima oqarsimavoq: „Saanikka ilinnut isertugaanngillat taamani takussaanngitsumi ilusilersugaagama, nunap ataani katitigaagama. Ullukka isivit takusimavaat.“ (Tussiaat 139:15, 16) Jobip Guuti taasimavaa ’uannik pinngortitsisoq anaanama timaata iluani . . . Guuti taannaasoq anaanatta timaata iluani uannik taakkuninngalu ilusiliisooq’. — Job 31:15.

Anaanamummi isumatsassimasumut meeqqamik kissaatiginninngitsumut Guutip isumassuinera qanoq ippa? Meerartaarnerup akisussaafferujussuarmik nassataqartarnera Pinngortitsisup tamanit nalunnginnerpaavaa. Anaanap naartusup ajornartooqqasorujussuugaluarluni Guutip inatsisaanut ataqqinnilluni naartuni tigummiinnarniarlugu aalajangerpat qularutigissanngilarput aalajangernera Guutip pilluaqqussagaa. Angajoqqaat eqqortumik iliorlutik Guuti qinnuigisinnaavaat qinnuigisariaqarlugulu meeraq pillualersinnaaqqullugu perorsaaniarnerminni ikioqqullutik. Guuti oqaatsimini meeqqanik perorsaanermut atatillugu pitsaanerpaanik siunnersuuteqarpoq, tamakkuninngalu maleruaaneq pitsaasumik inerneqartitsissaaq. Nuannaarutissat meeqqat Guutimut kiffartulernissaannut perorsaanermut atasut pilliutigisariaqarsimanut  sinnilissuarmik matussutissiisarput, tamannalu angajoqqaarpassuit tulluusimaarlutik uppernarsarsinnaavaat.

Pinngitsaalineqarluni atoqatigineqarsimanerup imaluunniit qanigisamit atoqatigineqarsimanerup kingunerisaanik naartulerneq pineqarpat Jehova allatut isumaqassava? Taamaaliorneq anaanaasumut pinerluttuliornerugaluarpormi, meerarli tamanna pillugu avoqqaarineqarsinnaanngilaq. Taamatut pisoqartillugu meeqqamik toqutsineq pinerlunnermut pinerlunnermik akisineruvoq. Pinerluffigineqartut misigissutsikkut timikkullu anniaateqartarnerat Jehovap paasinniffigeqaa, aamma anaanaasoq meerarlu kingunipilutsitsinerannik ikiorsinnaavai.

Nakorsarmi oqarpat arnap inuunera meeraq erniarissaguniuk navianartorsiussasoq? Dr. Alan Guttmacher ima oqarsimavoq: „Ullumikkut naartusut tamangajammik naartunertik ajunngitsumik nammaassisarpaat, toqussutaasumik soorlu kræftimik leukæmiimilluunniit nappaateqartut kisimik pinnatik. Taamaattoqartillugu naartuersinneq inuunerannik sivitsortitsisinnaanngilaq annaassisinnaananiluunniit.“ The Encyclopedia Americana-mi ima allassimasoqarpoq: „Arnat amerlanersaasa annertuumilluunniit nappaateqaraluartut allaat naartunertik naammassisinnaammassuk amerlanngitsuinnartigut naartuersinissaq naartusut peqqinnera illersorniarlugu pisariaqalertarpoq. Naartuersinerit amerlanersaat suliarineqartarput meeraq kissaatigineqanngimmat.“ Tassa naartuersinerit arnap inuunerata navianartorsiorneranik pissuteqartut qaqutigoortuupput. Erninermulli atatillugu taamatut navianartorsiorneqarpat angajoqqaat aalajangigassaraat anaanaasup meeqqalluunniit inuunera annaanneqassanersoq.

Kinguaassiuutit qanoq atorneqarnissaannik Pinngortitsisoq malittarisassaliorsimammat tupinnanngilaq. Taassuma isaani uumassusilimmik kissaatiginngisamik pinngortitsineq inuarnertulli ajortuliaavoq.

Naartuersittarneq pillugu oqallinneq qularnanngitsumik pissutsit aaqqissuussaanerata naggatissaa tikillugu ingerlajuassaaq. Inuunerulli Pinngortitsisaa, Jehova Guuti, taassumalu inatsisaanik maleruaasut, nalornissuteqanngillat. Inuuneq erlinnartorujussuuvoq — tunissutisiaavoq aallaqqaataaniilli sernissugassaq. (gD 22/5 93)

[Qupp. 12-mi ungalusaq]

Naartuersinnermut Guutip isiginninnera

TAAVAMI arnaq inuusuttuaraq katissimanani anaananngornissaminullu piareersimanngilluinnarluni naartulerpat? Meeqqamik erniarinnissinnaatitaasariaqarpa? Anaanaasup isumaatsuliorsimanera kanngunartuliorsimaneralu pissutigiinnarlugit Guutip isumaa allanngornavianngilaq. Meeqqap inunngornera anaanaasup kanngunartuliorsimanermi pinngitsoorani kingunissaanik paasinninneranik Guutillu inatsisaata silatusaassusiannik puiuikkiussineranik kinguneqaannassaaq. Eqqunngitsumik kinguaassiuutitigut atoqarsimanerata kingunissaanik piiaaffigigaanni immaqa imminut pisuutiliinnassaaq, imaluunniit kanngunartulioqqinnissaminut sapiissuseqaliinnassalluni.

Ataataasumik nammaqatissaqanngikkaanni meeqqamik perorsaaniarneq oqitsuunavianngilaq. Anaanaasulli Ataatatsinnut qilammiusumut qanimut attaveqaruni ileqqussatigut misigissutsikkullu nakuussuseq pisariaqartoq kiisalu annertoqqusersugaaneq unnersuunneqarnerlu pisinnaassavai. Aammalu ilagiit kristumiut angajoqqaanik kisimiittunik nammaqatiginnissinnaasut Guutip ikiortissaatippai.