Канаданың Ванкувер қаласында жүргізілген бір зерттеуге сай, электронды поштаны қайта-қайта тексере бермей, оған күніне үш рет қана кірсе, стресс азаюы мүмкін. Зерттеуді жүргізген Костадин Кушлев есімді кісі зерттеу қорытындыларына сүйене отырып былай дейді: “Адамдар қолдары қалт етсе хаттарын тексереді де тұрады, бірақ олар осы қалауларын тізгіндей білсе, стресс те азаяр еді”.

ОЙЛАНАТЫН ЖАЙТ. Біз “ерекше қиын уақытта” өмір сүріп жатырмыз. Ендеше, стресті көбейтудің емес, оны азайтудың қамын жасағанымыз дұрыс емес пе? (Тімөтеге 2-хат 3:1).

Табиғатты қорғау қоғамының мәлімдеуінше, тіршілік иелерін аулауға тыйым салынған Белиз жағалауы мен Кариб теңізінің басқа да жерлерінде теңіз шаяндары, моллюскі мен балық саны қалпына келе бастағаны анықталды. Осындай аумақтардағы жойыла бастаған тіршілік иелерінің саны небәрі 1—6 жыл ішінде қалпына келуі мүмкін, ал толық қалпына келуге ондаған жыл кетуі ықтимал. Аталмыш қоғамның бағдарлама жетекшісі Джанет Гибсон Белиз елі жайлы былай дейді: “Тыйым салудың арқасында елдің балық шаруашылығы мен теңіз тіршілігінің алуандығы қалпына келе алатыны даусыз”.

ОЙЛАНАТЫН ЖАЙТ. Табиғаттың қалпына келе алатын қабілеті дана Жаратушының бар екенін көрсете ме? (Зәбүр 104:24, 25).

Бразилияның бір ақпарат агенттігінің хабарлауынша, елде зорлық-зомбылық барған сайын өршіп барады (“Agência Brasil”). Мысалы, 2012 жылы кісі өлтіру саны 56 000-ға жеткен. Бұл денсаулық сақтау министрлігі тіркеген ең жоғарғы жылдық көрсеткіш болып отыр. Ұлттық қауіпсіздік маманы Луис Сапоуридің ойынша, мұндай өсім моральдық құндылықтардың құлдырағанын көрсетеді. Өркениетті қоғамның заңдарын құрметтеуден қалған адам өз мүддесін алға тарту үшін адамгершілікті ұмытып, қатыгездікке бой алдырады.

СІЗ БІЛГЕНСІЗ БЕ? Киелі кітапта заңсыздық көбейіп, “көпшіліктің сүйіспеншілігі суып кететін” заман келетіні алдын ала ескертілген (Матай 24:3, 12).