ايان كىتابىنىڭ 17-تاراۋىندا سيپاتتالعان ال قىزىل اڭ نەنى بەينەلەيدى؟
كيەلى كىتاپتىڭ جاۋابى
ايان كىتابىنىڭ 17-تاراۋىندا سيپاتتالعان ال قىزىل اڭ الەمدەگى ۇلتتاردى بىرىكتىرىپ، سولاردىڭ مۇددەسىن قورعاۋ ٷشىن قۇرىلعان ۇيىمدى بەينەلەيدى. باستاپقىدا بۇل ۇيىم ۇلتتار ليگاسى رەتىندە قۇرىلدى، ال بۇگىندە ول — بىرىككەن ۇلتتار ۇيىمى.
ال قىزىل اڭدى انىقتاۋ جولى
ساياسي ۇيىم. ال قىزىل اڭنىڭ «جەتى توبەنى» جانە «جەتى پاتشانى»، نەمەسە بيلەۋشىلەردى، بەينەلەيتىن «جەتى باسى بار» (ايان 17:9، 10). كيەلى كىتاپتا توبە-تاۋلار مەن اڭدار مەملەكەتتەردىڭ بەينەسى رەتىندە قولدانىلادى (ەرەميا 51:24، 25؛ دانيال 2:44، 45؛ 7:17، 23).
دۇنيەجۇزىلىك ساياسي جۇيەنىڭ بەينەسى. ال قىزىل اڭ ايان كىتابىنىڭ 13-تاراۋىندا سيپاتتالعان ٵرى دۇنيەجۇزىلىك ساياسي جۇيەنى بەينەلەيتىن ٴجەتى باستى اڭعا ۇقسايدى. ەكى اڭنىڭ دا جەتى باسى، ون ٴمۇيىزى جانە قۇدايدى قورلايتىن ەسىمدەرى بار (ايان 13:1؛ 17:3). بۇل ۇقساستىقتاردى جاي كەزدەيسوقتىق دەي المايسىڭ. دەمەك، ال قىزىل اڭ — دۇنيەجۇزىلىك ساياسي جۇيەنىڭ ٴمۇسىنى، ياعني بەينەسى (ايان 13:15).
كۇش پەن بيلىكتى وزگە مەملەكەتتەردەن الادى. ال قىزىل اڭ وزگە مەملەكەتتەردەن «شىقتى»، ياعني سولاردىڭ ارقاسىندا پايدا بولدى (ايان 17:11، 17).
دىنمەن بايلانىسى بار. ال قىزىل اڭنىڭ ۇستىندە ۇلى بابىلدى، ياعني دۇنيەجۇزىندەگى جالعان دىندەردىڭ ٴبارىن، بەينەلەيتىن ايەل وتىر. بۇدان اڭنىڭ ٵرتۇرلى دىندەردىڭ ىقپالىندا ەكەنى كورىنەدى (ايان 17:3—5).
قۇدايدى قورلايدى. اڭنىڭ «تۇلا بويى قۇدايدى قورلايتىن ەسىمدەرگە تولى» (ايان 17:3).
ۋاقىتشا ارەكەتسىز كۇيدە بولادى. ال قىزىل اڭ بەلگىلى ٴبىر ۋاقىت «تۇڭعيىقتا» a، نەمەسە ارەكەتسىز كۇيدە بولىپ، ٴبىراق ودان قايتا شىقپاق ەدى (ايان 17:8).
پايعامبارلىقتىڭ ورىندالۋى
ال قىزىل اڭ تۋرالى پايعامبارلىقتىڭ بىرىككەن ۇلتتار ۇيىمى مەن ونىڭ الدىندا قۇرىلعان ۇلتتار ليگاسىنا قاتىستى قالاي ورىندالعانىن كورەيىك.
ساياسي ۇيىم. بىرىككەن ۇلتتار ۇيىمى وزىنە مۇشە بولعان بارلىق ەلدەردىڭ «ەگەمەندى تەڭدىگىن» قولدايدى، وسىلاي قازىرگى ساياسي جۇيەنىڭ ساقتالىپ قالۋىنا ىقپال ەتۋدە b.
دۇنيەجۇزىلىك ساياسي جۇيەنىڭ بەينەسى. 2011-جىلى بىرىككەن ۇلتتار ۇيىمىنىڭ قۇرامىنا تاعى ٴبىر مەملەكەت كىرىپ، 193 ٴشى مۇشەسى بولدى. وسىلايشا ول الەمدەگى ۇلتتار مەن حالىقتاردىڭ باسىم كوپشىلىگىنىڭ مۇددەسىن قورعاۋ وكىلەتتىگىنە يە بولۋعا دامەلى.
كۇش پەن بيلىكتى وزگە مەملەكەتتەردەن الادى. بىرىككەن ۇلتتار ۇيىمى وزىنە مۇشە ەلدەردىڭ ارقاسىندا قۇرىلعان، ٵرى سول ەلدەر مۇرسات بەرگەن كۇش پەن بيلىككە عانا يە.
دىنمەن بايلانىسى بار. ۇلتتار ليگاسىنا دا، بىرىككەن ۇلتتار ۇيىمىنا دا الەمدىك دىندەر ۇنەمى قولداۋ كورسەتىپ وتىرعان c.
قۇدايدى قورلايدى. بىرىككەن ۇلتتار ۇيىمى «حالىقارالىق بەيبىتشىلىك پەن قاۋىپسىزدىكتى قامتاماسىز ەتۋ» ماقساتىمەن قۇرىلعان d. بۇل يگى ماقسات بولىپ كورىنگەنمەن، شىنداپ كەلگەندە، بۇۇ تەك قۇداي پاتشالىعى جۇزەگە اسىرا الاتىن ىسكە قول سۇعۋىمەن قۇدايدى قورلايدى (ٴزابۇر 46:9؛ دانيال 2:44).
ۋاقىتشا ارەكەتسىز كۇيدە بولادى. ٴبىرىنشى دۇنيەجۇزىلىك سوعىستان كەيىن كوپ ۇزاماي بەيبىتشىلىكتى قامتاماسىز ەتۋ ماقساتىمەن قۇرىلعان ۇلتتار ليگاسى حالىقتار اراسىنداعى اگرەسسياعا توسقاۋىل بولا المادى. وسىلاي 1939-جىلى ەكىنشى دۇنيەجۇزىلىك سوعىس باستالعاندا، ول ٶز جۇمىسىن توقتاتتى. ال 1945-جىلى ەكىنشى دۇنيەجۇزىلىك سوعىس بىتكەن سوڭ، بىرىككەن ۇلتتار ۇيىمى قۇرىلدى. ونىڭ ماقساتتارى، تاسىلدەرى مەن قۇرىلىمى ۇلتتار ليگاسىنا قاتتى ۇقسايدى.
a كيەلى كىتاپتا بۇل ٴسوز قاپاستا نە قاماۋدا وتىرعانداي مۇلدەم ارەكەتسىز كۇيدى بىلدىرەدى.
b بىرىككەن ۇلتتار ۇيىمى جارعىسىنىڭ 2-بابىن قاراڭىز.
c مىسالى، 1918-جىلى امەريكاداعى ونداعان پروتەستانت اعىمدارىنىڭ اتىنان سويلەگەن كەڭەس ۇلتتار ليگاسى «قۇداي پاتشالىعىنىڭ جەردەگى ساياسي كورىنىسى» بولماق ەكەنىن ايتتى. 1965-جىلى بۋدديزم، يندۋيزم، يسلام، يۋدايزم دىندەرى مەن كاتوليك، پراۆوسلاۆ، پروتەستانت شىركەۋلەرىنىڭ وكىلدەرى بىرىككەن ۇلتتار ۇيىمىنا قولداۋ كورسەتىپ، دۇعا ايتۋ ٷشىن سان-فرانسيسكو قالاسىندا باس قوستى. ال 1979-جىلى پاپا يوانن پاۆەل II بۇۇ نىڭ «ماڭگى باقي بەيبىتشىلىك پەن ادىلدىكتىڭ ەڭ جوعارعى فورۋمى بولىپ قالا بەرەتىنىنە» ۇمىتتەنەتىنىن ايتتى.
d بىرىككەن ۇلتتار ۇيىمى جارعىسىنىڭ 1-بابىن قاراڭىز.
قىزىقتى بولار مالىمەتتەر
كيەلى كىتاپ تالىمدەرى
كيەلى كىتاپ كۋرسىن باستاپ كورىڭىز
قۇداي ٴسوزى — كيەلى كىتاپتى جەكە تالىمگەرمەن تالقىلاپ كورىڭىز. كۋرس تەگىن.