36-تاراۋ
ٴجۇزباسى زور سەنىم تانىتتى
-
يسا ٴجۇزباسىنىڭ قىزمەتشىسىن ساۋىقتىردى
-
سەنىمى بارلار جارىلقانادى
تاۋداعى ۋاعىزىنان كەيىن يسا قاپارناۋم قالاسىنا كەتتى. سول جاقتا وعان ياھۋدي اقساقالدارى ٴبىر وتىنىشپەن كەلدى. ولاردى ريم اسكەرىندە ٴجۇزباسى قىزمەتىن اتقاراتىن باسقا ۇلتتى كىسى جىبەرگەن ەدى.
ٴجۇزباسىنىڭ جاقسى كورەتىن ٴبىر قىزمەتشىسى قاتتى سىرقاتتانىپ، ٶلىم اۋزىندا ەدى. ٴجۇزباسى ياھۋدي بولماسا دا، يسادان كومەك سۇراۋ ٷشىن اراعا كىسىلەر سالدى. ياھۋدي اقساقالدارى يساعا كەلىپ، «ۇيدە سال بولىپ جاتقان قىزمەتشىنىڭ قاتتى قينالىپ» جاتقانىن ايتتى (ماتاي 8:6). سوسىن ولار ٴجۇزباسىنىڭ جاردەم بەرۋگە تۇراتىن كىسى ەكەنىن ٴتۇسىندىرىپ: «ول حالقىمىزدى جاقسى كورەدى، بىزگە ٴتىپتى ٴماجىلىسحانا سالىپ بەردى»،— دەدى (لۇقا 7:4، 5).
كوپ كىدىرمەي يسا اقساقالدارمەن بىرگە ٴجۇزباسىنىڭ ۇيىنە بەت الدى. ۇيگە جاقىنداپ قالعان يسانىڭ الدىنان ٴجۇزباسىنىڭ دوستارى شىعىپ: «مىرزا، كەلىپ اۋرە بولماڭىز، ٴسىزدى ۇيىمە كىرگىزۋگە لايىقسىزبىن. سوندىقتان دا سىزگە ٶزىم بارعان جوق ەدىم»،— دەگەن ٴسوزىن جەتكىزدى (لۇقا 7:6، 7). بۇيرىق بەرۋگە ادەتتەنگەن ادامنىڭ بۇلاي دەۋى نەتكەن كىشىپەيىلدىلىك دەسەڭىزشى! بۇدان قۇلدارىنا قاتىگەزدىك كورسەتەتىن ريمدىكتەرگە ونىڭ مۇلدەم ۇقسامايتىنىن كورەمىز (ماتاي 8:9).
ياھۋديلەر باسقا ۇلتتىڭ ادامدارىمەن ارالاسپايتىنىن ٴجۇزباسىنىڭ بىلگەنى ٴسوزسىز (ەلشىلەردىڭ ىستەرى 10:28). سوندىقتان بولسا كەرەك، ول يساعا دوستارى ارقىلى: «تەك ٴبىراۋىز ٴسوز ايتساڭىز بولعانى، قىزمەتشىم ساۋىعىپ كەتەدى»،— دەدى (لۇقا 7:7).
مۇنى ەستىگەن يسا تاڭعالىپ: «سەندەرگە مىنانى ايتامىن: ٴتىپتى يسرايلدە ەشكىمنەن مۇنداي زور سەنىم كورگەن ەمەسپىن»،— دەدى (لۇقا 7:9). ٴجۇزباسىنىڭ دوستارى ۇيگە قايتىپ كەلگەندە، حال ۇستىندە جاتقان قىزمەتشىسىنىڭ ساۋىعىپ كەتكەنىن كوردى.
كەرەمەت جاساعان وسى جاعدايدى قولدانىپ، يسا قۇدايعا سەنىمى بار باسقا ۇلت ادامدارىنا دا ونىڭ ىقىلاسى تۇسەتىنىن ٴتۇسىندىرىپ: «كوك پاتشالىعىندا ىبىرايىم، ىسقاق جانە جاقىپپەن بىرگە شىعىس پەن باتىستان كەلگەن كوپ ادام داستارقان باسىنا جانتاياتىن بولادى»،— دەدى. ال يساعا سەنبەيتىن ياھۋديلەر جايلى نە دەۋگە بولادى؟ يسا ولاردىڭ «سىرتتاعى قارا تۇنەككە تاستالاتىنىن» جانە «سول جەردە ولار زار ەڭىرەپ، قينالا تىستەنەتىنىن» ايتتى (ماتاي 8:11، 12).
دەمەك، يسامەن بىرگە پاتشالىقتىڭ العاشقى مۇشەسى بولۋ مۇمكىندىگىن قابىل الماعان ياھۋدي حالقىنان ەحوبا باس تارتادى. ال باسقا ۇلت ادامدارى داستارقان باسىندا، ياعني «كوك پاتشالىعىندا»، يسامەن بىرگە جانتاياتىن بولادى.
