بولاشاعىڭىز ٶز قولىڭىزدا!
بولاشاعىمىزعا اسەر ەتە الامىز با؟ كەيبىرەۋلەر ادامنىڭ ومىرىنە قابىلداعان شەشىمدەرى ەمەس، ماڭدايىنا جازىلعانى اسەر ەتەدى دەپ سەنەدى. قانداي دا ٴبىر ساتسىزدىككە ۇشىراسا، ولار «جازمىشتان وزمىش جوق» دەپ، ٴبارىن تاعدىرعا جابا سالادى.
باسقالارى دۇنيەدەگى قاتىگەزدىك پەن ادىلەتسىزدىكتەن قاشىپ قۇتىلا المايتىنىن تۇسىنگەندە، جىگەرلەرى قۇم بولادى. ولار ومىرلەرىن جاقسارتۋعا تىرىسىپ باققانمەن، سوعىس، قىلمىس، تابيعي اپاتتار مەن اۋرۋ-سىرقاۋ سياقتى باقىتسىزدىقتار ولاردىڭ بار ارمان-ماقساتتارىن كۇل-تالقان ەتەدى. سودان ولار «ەندەشە، تالپىنىپ نە كەرەك؟!» دەپ قولدارىن ٴبىر سىلتەيدى.
ومىردەگى كەزدەيسوق جاعدايلار ارمان-ماقساتىمىزدىڭ ورىندالۋ-ورىندالماۋىنا اسەر ەتەتىنى راس (ۋاعىزداۋشى 9:11). ٴبىراق ٴبىزدى كۇتىپ تۇرعان ماڭگىلىك بولاشاعىمىز ٶز قولىمىزدا. كيەلى كىتاپ بولاشاعىمىز جاساعان تاڭداۋلارىمىزعا بايلانىستى دەپ ۇيرەتەدى. قازىر وندا نە دەلىنگەنىن كورەيىك.
ەجەلگى يسرايل حالقىنىڭ كوسەمى بولعان مۇسا پايعامبار قۇداي ۋادە ەتكەن جەرگە كىرگەلى جاتقان حالىققا بىلاي دەگەن: «سەندەرگە ٶمىر مەن ٶلىم، باتا مەن قارعىس ۇسىنىپ تۇرمىن. وزدەرىڭ دە، ۇرپاقتارىڭ دا ۇزاق عۇمىر كەشۋ ٷشىن، ٶمىردى تاڭداڭدار. ەحوبا قۇدايلارىڭدى ٴسۇيىپ، ايتقاندارىنا قۇلاق اسىپ، وعان ادال بولىپ جۇرىڭدەر» (مۇسانىڭ 5-جازباسى 30:15، 19، 20).
«سەندەرگە ٶمىر مەن ٶلىم، باتا مەن قارعىس ۇسىنىپ تۇرمىن. وزدەرىڭ دە، ۇرپاقتارىڭ دا ۇزاق عۇمىر كەشۋ ٷشىن، ٶمىردى تاڭداڭدار» (مۇسانىڭ 5-جازباسى 30:19).
قۇداي يسرايل حالقىن مىسىرداعى قۇلدىقتان بوساتىپ، ۋادە ەتىلگەن جەردە باقىتتى دا ازات ەل بولىپ ٶمىر ٴسۇرۋدى ۇسىندى. ٴبىراق بۇل وزدىگىنەن بولمايتىن ەدى. مۇنداي باتالارعا يە بولۋ ٷشىن، ولار «ٶمىردى تاڭداۋى»، ياعني «قۇدايلارىن ٴسۇيىپ، ايتقاندارىنا قۇلاق اسىپ، وعان ادال بولىپ جۇرۋلەرى» كەرەك ەدى.
سىزدە دە ٴدال وسىنداي تاڭداۋ بار جانە جاسايتىن تاڭداۋىڭىز بولاشاعىڭىزعا تىكەلەي اسەر ەتەدى. قۇدايدى ٴسۇيىپ، ونىڭ ايتقاندارىنا قۇلاق اسىپ، وعان ادال بولساڭىز، بۇل — ٶمىردى، ياعني جەر بەتىندەگى جۇماقتا ماڭگى ٶمىر ٴسۇرۋدى، تاڭداعانىڭىز. ەندەشە، وسى ٷش تالاپقا نە كىرەتىنىن كورەيىك.
قۇدايدى ٴسۇيۋ
سۇيىسپەنشىلىك — قۇدايدىڭ ەڭ نەگىزگى قاسيەتى. ەلشى جوحان قۇداي رۋحىنىڭ جەتەلەۋىمەن «قۇداي — سۇيىسپەنشىلىك» دەپ جازعان (جوحاننىڭ 1-حاتى 4:8). يسا پايعامبار دا «ەڭ باستى زاڭ قايسىسى؟» دەگەن سۇراققا: «ەحوبا قۇدايىڭدى بار جۇرەگىڭمەن، بۇكىل جان-تانىڭمەن، بارلىق اقىل-ويىڭمەن ٴسۇي!»— دەپ جاۋاپ بەرگەن (ماتاي 22:37). بۇدان كورىنەتىندەي، ەحوبا قۇدايعا قۇلشىلىق ەتۋىمىزگە قورقىنىش نە قۇر پارىز سەزىمى ەمەس، وعان دەگەن سۇيىسپەنشىلىك سەبەپ بولۋى كەرەك. ال قۇدايدى سۇيۋگە قانداي سەبەپ بار؟
قۇدايدىڭ ادام بالاسىنا دەگەن سۇيىسپەنشىلىگى اتا-انانىڭ بالاسىنا دەگەن ماحابباتىنا ۇقسايدى. ٴمىنسىز بولماسا دا، قامقور اتا-انا بالاسىنىڭ باقىتتى دا تابىستى بولۋى ٷشىن وعان ٴتالىم-تاربيە بەرىپ، قولداپ، قاجەت كەزدە تۇزەتىپ جاتادى. وسىلاي ماحابباتىنا بولەگەن اتا-انا بالاسىنان نە كۇتەدى؟ بالاسى دا ولاردى جاقسى كورسە ەكەن، ونىڭ يگىلىگى ٷشىن ايتقان اقىلدارىنا قۇلاق اسسا ەكەن دەيدى. ولاي بولسا، ەشبىر ٴمىنى جوق كوكتەگى اكەمىز جاساعان بار جاقسىلىعىنا ٴبىزدىڭ دە ريزاشىلىقپەن جاۋاپ بەرىپ، ونى سۇيگەنىمىزدى قالايدى ەمەس پە؟!
قۇدايعا قۇلاق اسۋ
قۇدايعا قۇلاق اسۋ ٷشىن ونىڭ بىزدەن نەنى تالاپ ەتەتىنىن وقىپ-ۇيرەنۋىمىز كەرەك. ٴبىراق قۇداي بىزگە تىكەلەي ٶزى كەلىپ ايتپايدى. سوندىقتان وعان قۇلاق اسقىمىز كەلسە، ونىڭ ٴسوزى كيەلى كىتاپتى وقىپ، بىلگەندەرىمىزدى ومىردە قولدانۋىمىز كەرەك (جوحاننىڭ 1-حاتى 5:3).
بىردە يسا پايعامبار قۇدايعا قۇلاق اسۋدىڭ ماڭىزدىلىعىنا نۇسقاپ: «ادام نانمەن عانا ەمەس، ەحوبانىڭ اۋزىنان شىققان ٵربىر سوزىمەن دە ٶمىر ٴسۇرۋى ٴتيىس»،— دەگەن (ماتاي 4:4). اس-اۋقاتتىڭ ادام تىرشىلىگى ٷشىن قاجەت ەكەنىندەي، قۇداي تۋرالى ٴبىلىم دە ٴبىز ٷشىن اسا ماڭىزدى. ويتكەنى دانا پاتشا سۇلەيمەن: «اقشا ادامدى قورعايتىنداي، دانالىق تا ونى قورعايدى. ٴبىراق دانالىق پەن ٴبىلىمنىڭ ارتىقشىلىعى — ٶز يەسىنىڭ ٶمىرىن ساقتايدى»،— دەپ جازعان (ۋاعىزداۋشى 7:12). ٴيا، قۇدايدان كەلەتىن ٴبىلىم مەن دانالىق بۇگىندە ٴبىز ٷشىن قورعانىش بولا الادى، سونداي-اق بولاشاقتاعى ماڭگى ومىرگە باستايتىن تاڭداۋ جاساۋعا كومەكتەسەدى.
قۇدايعا ادال بولۋ
الدىڭعى ماقالادا ايتىلعان يسانىڭ مىنا سوزدەرىن ەسكە الايىقشى: «ومىرگە اپاراتىن قاقپا دا، جول دا تار. ونى تاباتىندار از» (ماتاي 7:13، 14). مىسالى، دىتتەگەن جەرىمىزگە جەتكىمىز كەلسە، جولباسشىنىڭ ىزىنەن قالماي، وعان ەتەنە جاقىن جۇرگەنىمىز ابزال. ماڭگى ومىرگە اپاراتىن جولدا دا ٴدال سولاي: بىزگە قۇدايعا ەتەنە جاقىن ٴجۇرىپ، وعان ادال بولۋ كەرەك (ٴزابۇر 16:8). مۇنى قالاي ىستەي الامىز؟
ٴبىزدىڭ كۇندەلىكتى ىستەيتىن تىرلىگىمىز باستان اسادى. وسىنداي كۇيبىڭ تىرلىكتەن قولىمىز بوساماي، قۇدايدى ويلاۋعا مۇرشامىز دا كەلمەۋى مۇمكىن. ٴبىراق كيەلى كىتاپتا: «اقىلسىز ەمەس، دانا بولىپ، ۋاقىتتارىڭدى بارىنشا ٴتيىمدى پايدالانىڭدار، ويتكەنى قازىرگى كۇندەر زۇلىمدىققا تولى»،— دەلىنگەن (ەفەستىكتەرگە 5:15، 16). دەمەك، قۇدايعا ەتەنە جاقىن بولعىمىز كەلسە، ونىمەن قارىم-قاتىناسىمىز ومىرىمىزدە ەڭ ماڭىزدى ورىندا تۇرۋى كەرەك (ماتاي 6:33).
تاڭداۋ ٶز ەركىڭىزدە
«بولارى بولىپ، بوياۋى ٴسىڭدى» دەمەكشى، وتكەندى وزگەرتە المايتىن شىعارمىز. ٴبىراق ٶزىمىز ٵرى وتباسىمىز ٷشىن جارقىن بولاشاقتى تاڭداي الامىز. كيەلى كىتاپتان كوكتەگى اكەمىز ەحوبانىڭ ٴبىزدى قاتتى جاقسى كورەتىنىن جانە ٴبىزدىڭ نە ىستەگەنىمىزدى قالايتىنىن بىلە الامىز. وسى ورايدا ٴبىر پايعامباردىڭ نە دەگەنىنە كوڭىل بولەيىكشى:
«ۋا، ادام، ول ساعان نەنىڭ جاقسى ەكەنىن ايتتى عوي. ەحوبا سەنەن نەنى تالاپ ەتەدى؟ ٵدىل ارەكەت ەتكەنىڭدى، ادالدىقتى جوعارى باعالاعانىڭدى، قۇدايىڭنىڭ جولىندا قاراپايىم بولىپ جۇرگەنىڭدى عانا ەمەس پە؟!» (ميحا 6:8).
ەحوبانىڭ جولىمەن ٴجۇرۋدى تاڭداپ، ونىڭ وسى جولىمەن جۇرەتىندەرگە دايىنداپ قويعان باتالارىنا كەنەلگىڭىز كەلە مە؟ تاڭداۋ ٶز ەركىڭىزدە.
قىزىقتى بولار مالىمەتتەر
كۇزەت مۇناراسى
كيەلى كىتاپ جانە ٴسىزدىڭ بولاشاعىڭىز
كيەلى كىتاپتا ٶمىردىڭ قيىندىقتارىن شەشۋگە كومەكتەسەتىن اقىل-كەڭەستەر كوپ. وندا جارقىن بولاشاققا دەگەن ٷمىت سيلايتىن سوزدەر دە بار.
كيەلى كىتاپ. سۇراقتار مەن جاۋاپتار
كيەلى كىتاپتا تاڭداۋ ەركىندىگى جايىندا نە ايتىلعان؟ قۇداي ادامنىڭ تاعدىرىن ماڭدايىنا جازىپ قويعان با؟
كوپ ادام ٴبارىن تاعدىر شەشەدى دەپ سەنەدى. ومىردە تابىستى، ٴساتتى بولۋىمىزعا ٶزىمىز ىقپال ەتە الامىز با؟
