دۇرىس پا، بۇرىس پا؟ كوپ ادام نەگە جۇگىنەدى؟
كەيبىر ارەكەتتەردىڭ دۇرىس نە بۇرىس ەكەنى ايدان انىق كورىنىپ تۇرادى. مىسالى، كوپ ادام كىسى ٶلتىرۋ، ادام زورلاۋ نە بالا ازعىرۋ سياقتى نارسەلەردىڭ دۇرىس ەمەس ەكەنىمەن كەلىسەدى. ال ٵدىل بولۋ، مەيىرىمدى بولۋ، وزگەلەرگە جان اشۋ دەگەن قاسيەتتەردىڭ دۇرىس ەكەنىن ٴبارى مويىندايدى. الايدا كوپتىڭ ويىنشا، ٶمىردىڭ كەي سالالارىندا، مىسالى، جىنىستىق قاتىناس، شىنشىل بولۋ، بالا تاربيەلەۋگە كەلگەندە، بىلاي ىستەگەن دۇرىس نە بۇرىس دەپ كەسىپ ايتۋ قيىن. ولاردىڭ ايتۋىنشا، قانداي شەشىم قابىلداسا دا، ادام ٶزى بىلەدى. ٴبىراق ادامدار شەشىم قابىلداعاندا، ٴجيى ٶزى دۇرىس دەپ تاپقان نارسەنى نە وزگەلەر دۇرىس دەپ ەسەپتەيتىن نارسەنى ىستەيدى. بۇلاي ەتۋ اقىلدىلىققا جاتا ما؟
ٶزىمىز دۇرىس دەپ ەسەپتەيتىندى ىستەۋ
ادەتتە ٴبىز شەشىم قابىلداعاندا ار-ۇجدانىمىزعا، ياعني نەنىڭ دۇرىس، نەنىڭ بۇرىس ەكەنىن ايتاتىن ىشكى داۋسىمىزعا جۇگىنەمىز (ريمدىكتەرگە 2:14، 15). كىشكەنتاي بالانىڭ ٶزى نەنىڭ جاقسى، نەنىڭ جامان ەكەنىن ايىرا الادى. ٴتىپتى ٴبىر نارسەنى دۇرىس ىستەمەسە، ٶزىن كىنالى سەزىنەدى. ال ەسەيە كەلە، دۇرىس پەن بۇرىسقا قاتىستى كوزقاراسىمىزدى وتباسىمىز، قۇرداستارىمىز، مۇعالىمدەرىمىز، قوعام، ٴدىن جانە مادەنيەت قالىپتاستىرادى. سودان شەشىم قابىلداعان كەزدە ار-ۇجدانىمىز ٴبىزدىڭ شەشىمىمىزدى قۇپتايدى نە ايىپتايدى.
ار-ۇجدانىمىز بىزگە ريزاشىل، ٵدىل بولۋعا، باسقالارعا جاناشىرلىق پەن ەمپاتيا تانىتۋعا تالپىندىرادى. سونداي-اق ار-ۇجدان جاقىندارىمىزدى رەنجىتەتىن نەمەسە ٶزىمىزدى ۇياتقا قالدىراتىن نە كۇناعا باتىراتىن ىستەردەن اۋلاق جۇرۋگە كومەكتەسەدى.
ٶزىمىز دۇرىس دەپ ەسەپتەيتىندى ىستەۋ ٵردايىم دۇرىس پا؟ گاريك دەگەن ٴبىر جاس جىگىت بىلاي دەدى: «مەن نە ىستەگىم كەلسە، سونى ىستەپ ٶمىر ٴسۇردىم». ٴبىراق ونىڭ دۇرىس دەپ ىستەگەن ىستەرى جاقسىلىق اكەلمەدى. كەيىن ٶزى ايتقانداي، ول ومىرلىك جولىندا تىعىرىققا تىرىلگەندەي بولدى. سەبەبى ٶمىرى «ازعىندىققا، ناشاقورلىققا، ىشىمدىك پەن قاتىگەزدىككە تولى ەدى».
وزگەلەر دۇرىس دەپ ەسەپتەيتىندى ىستەۋ
شەشىم قابىلداعاندا، ٶزىمىز دۇرىس دەپ ويلاعان نارسەنى ىستەۋدەن بولەك، وزگەلەردىڭ ويى دا بىزگە اسەر ەتەدى. وزگەلەردىڭ ويىمەن ساناسساق، ولاردىڭ ومىرلىك تاجىريبەلەرىنەن ۇلگى-ونەگە الامىز. ەگەر وتباسىمىزدىڭ، دوستارىمىزدىڭ نەمەسە اينالامىزداعى ادامداردىڭ ويىن ەسكەرسەك، ولار ٴبىزدى قۇرمەتتەيتىن بولادى.
وزگەلەر دۇرىس دەپ ەسەپتەيتىندى ىستەۋ ٵردايىم دۇرىس پا؟ پريسكيلا دەگەن جاس قىز قۇرداستارىنىڭ ىستەگەنىن ىستەپ، نەشە ٴتۇرلى جىگىتپەن جىنىستىق قاتىناسقا تۇسە بەرەدى. ٴبىراق باسقالار دۇرىس دەپ ەسەپتەگەن نارسەنى ىستەگەنى ونى باقىتتى ەتپەدى. «كوپشىلىكتىڭ سوڭىنان ەرەمىن دەپ، اقىماق بولىپ، وتپەن ويناپپىن»،— دەدى ول.
شەشىم قابىلداۋدىڭ جاقسىراق جولى بار ما؟
ارينە، شەشىم قابىلداعان كەزدە ٶزىمىزدىڭ نەمەسە جانىمىزداعى ادامداردىڭ ويى وتە ماڭىزدى ٴرول وينايدى. ٴبىراق تەك ٶزىمىزدىڭ نە وزگەلەردىڭ ويىن ەسكەرسەك، ٴبىز ٵردايىم جاقسى شەشىم قابىلداي المايمىز. قابىلداعان شەشىمىمىزدىڭ ناتيجەسى قانداي بولاتىنىن بىلمەگەندىكتەن، كەيدە وزىمىزگە نە وزگەلەرگە كەسىرىمىز ٴتيىپ كەتىپ جاتادى (ناقىل سوزدەر 14:12). سونداي-اق ٶزىمىزدىڭ نە وزگەلەردىڭ قۇندىلىقتارى بىزگە ۇنەمى پايداسىن تيگىزەتىنىنە جانە ولار ەشقاشان وزگەرمەيتىنىنە ەشقانداي كەپىلدىك جوق. مىسالى، بۇرىن ادامدار بۇرىس دەپ ەسەپتەگەن كەيبىر ىستەر قازىر دۇرىس دەپ، ال بۇرىن دۇرىس بولعان ىستەر قازىر بۇرىس دەپ ەسەپتەلەدى.
كوپشىلىكتىڭ سوڭىنان ەرۋ ٵردايىم دۇرىس پا؟
ولاي بولسا، دۇرىس پەن بۇرىس جولدى قالاي انىقتاي الامىز؟ كەيىن دە ەش وكىنبەيتىندەي شەشىم قابىلداۋعا كومەكتەسەتىن مورالدىق نورمالار بار ما؟
ارينە، دۇنيەنىڭ قاي جەرىندە تۇرمايىق، بارىمىزگە دە پايداسىن تيگىزەتىن، سەنىمدى دە ەش وزگەرمەيتىن مورالدىق نورمالار بار. كەلەسى ماقالادان دۇرىس پەن بۇرىستى اجىراتۋعا كومەكتەسەتىن سول مورالدىق نورمالاردى قايدان تاباتىنىمىزدى بىلە الاسىز.
