47-زەرتتەۋ ماقالاسى
ٴبىر-بىرىمىزگە دەگەن سۇيىسپەنشىلىگىمىز جالىنداي بەرسىن!
«ٵرى قاراي دا ٴبىر-ٴبىرىمىزدى سۇيەيىك، سەبەبى سۇيىسپەنشىلىك قۇدايدان» (جوح. 1-ح. 4:7).
109-ٵن ٴبىر-ٴبىرىڭدى بارىنشا جاقسى كورىڭدەر
اڭداتپا a
1، 2. ا) نەگە پاۋىل «ەڭ باستىسى — سۇيىسپەنشىلىك» دەدى؟ ٵ) ٴبىز قانداي سۇراقتاردى تالقىلايمىز؟
پاۋىل سەنىم، ٷمىت، سۇيىسپەنشىلىك جايلى ايتا كەلە، «بۇلاردىڭ ەڭ باستىسى — سۇيىسپەنشىلىك»،— دەپ تۇيىندەدى (قور. 1-ح. 13:13). ول نەگە ولاي دەدى؟ ويتكەنى بولاشاقتا جاڭا دۇنيە ورناعان كەزدە بىزگە قۇدايدىڭ ۋادەلەرىنە سەنۋدىڭ قاجەتى بولمايدى، ٷمىتىمىز دە ورىندالىپ قويادى. ال سۇيىسپەنشىلىكتى ٵرى قاراي دا تانىتا بەرەمىز. ەحوبا مەن ادامدارعا دەگەن سۇيىسپەنشىلىگىمىز ماڭگى باقي تەك كۇشەيە بەرەدى.
2 سۇيىسپەنشىلىك تانىتۋ ارقاشان ماڭىزدى بولىپ قالاتىندىقتان، وسىعان قاتىستى ٷش سۇراقتى قاراستىرايىق. بىرىنشىدەن، ٴبىز نە ٷشىن ٴبىر-ٴبىرىمىزدى ٴسۇيۋىمىز كەرەك؟ ەكىنشىدەن، ٴبىر-ٴبىرىمىزدى سۇيەتىنىمىزدى قالاي كورسەتە الامىز؟ ۇشىنشىدەن، ارامىزداعى سۇيىسپەنشىلىك سۋىپ كەتپەس ٷشىن نە ىستەسەك بولادى؟
نە ٷشىن ٴبىر-ٴبىرىمىزدى ٴسۇيۋىمىز كەرەك؟
3. ٴبىر-ٴبىرىمىزدى ٴسۇيۋدىڭ قانداي سەبەپتەرى بار؟
3 ٴبىز نەگە ٴبىر-ٴبىرىمىزدى ٴسۇيۋىمىز كەرەك؟ ونىڭ ٴبىر سەبەبى، شىنايى ماسىحشىلەردى وسى قاسيەت ايرىقشالايدى. يسا ەلشىلەرىنە: «مەنىڭ شاكىرتتەرىم ەكەندەرىڭدى جۇرتتىڭ ٴبارى ٶزارا سۇيىسپەنشىلىكتەرىڭنەن بىلەتىن بولادى»،— دەگەن (جوح. 13:35). ونىڭ ۇستىنە، سۇيىسپەنشىلىك — بىرلىگىمىزدىڭ ۇيىتقىسى. پاۋىل ايتقانداي، سۇيىسپەنشىلىك «ادامداردى تولىقتاي بىرىكتىرەدى» (قول. 3:14). ودان بولەك، سۇيىسپەنشىلىك تانىتۋىمىزدىڭ تاعى دا ٴبىر كەلەلى سەبەبى بار. ەلشى جوحان: «قۇدايدى سۇيەتىن ادام باۋىرلاسىن دا ٴسۇيۋى كەرەك»،— دەپ جازعان (جوح. 1-ح. 4:21). دەمەك، ٴبىر-ٴبىرىمىزدى سۇيگەنىمىز — قۇدايدى سۇيگەنىمىز.
4، 5. باۋىرلاستارعا دەگەن سۇيىسپەنشىلىگىمىزدىڭ ەحوباعا دەگەن سۇيىسپەنشىلىگىمىزبەن قانداي بايلانىسى بار؟ مىسال كەلتىرىڭىز.
4 ەحوباعا دەگەن سۇيىسپەنشىلىگىمىز بەن باۋىرلاستارعا دەگەن سۇيىسپەنشىلىگىمىزدىڭ قانداي بايلانىسى بار؟ بۇنى جۇرەك پەن دەنەنىڭ باسقا مۇشەلەرىنىڭ اراسىنداعى بايلانىسقا تەڭەۋگە بولادى. دارىگەر بىلەگىمىزدەگى تامىردى باسىپ، جۇرەكتىڭ قالاي جۇمىس ىستەپ تۇرعانىن بىلە الادى. بۇل مىسالدان نە تۇيەمىز؟
5 دارىگەر تامىردىڭ سوعىسىنان جۇرەكتىڭ كۇيىن بىلە الاتىنىنداي، باۋىرلاستارعا دەگەن سۇيىسپەنشىلىگىمىزدەن ەحوباعا دەگەن سۇيىسپەنشىلىگىمىزدىڭ دەڭگەيىن كورۋگە بولادى. باۋىرلاستارعا دەگەن سۇيىسپەنشىلىگىمىز بۇرىنعىداي ەمەس ەكەنىن بايقاساق، بۇل ەحوباعا دەگەن سۇيىسپەنشىلىگىمىزدىڭ ٴسونىپ بارا جاتقانىنىڭ بەلگىسى بولۋى مۇمكىن. ال ەگەر باۋىرلاستارعا ۇنەمى سۇيىسپەنشىلىك تانىتىپ جۇرگەن بولساق، بۇل ەحوبانى قاتتى جاقسى كورەتىنىمىزدىڭ بەلگىسى.
6. باۋىرلاستارعا دەگەن سۇيىسپەنشىلىگىمىز سۋىپ بارا جاتسا، بۇعان نەگە بەيجاي قاراماۋ كەرەك؟ (جوحاننىڭ 1-حاتى 4:7—9، 11)
6 باۋىرلاستارعا دەگەن سۇيىسپەنشىلىگىمىزدىڭ السىرەپ بارا جاتقانىن بايقاساق، بۇعان بەيجاي قاراۋعا بولمايدى. ويتكەنى بۇل ەحوبامەن قارىم-قاتىناسىمىزعا قاۋىپ ٴتونىپ تۇرعانىن اڭعارتادى. ەلشى جوحان: «كوز الدىنداعى باۋىرلاسىن سۇيمەيتىن كىسى كوزىمەن كورمەگەن قۇدايدى سۇيە المايدى»،— دەپ ناقتى ەسكەرتكەن (جوح. 1-ح. 4:20). بۇدان تۇيەرىمىز، «ٴبىر-ٴبىرىمىزدى سۇيسەك» قانا ەحوباعا ۇنامدى بولا الامىز (جوحاننىڭ 1-حاتى 4:7—9، 11 وقىڭىز).
ٴبىر-ٴبىرىمىزدى سۇيەتىنىمىزدى قالاي كورسەتە الامىز؟
7، 8. ٴبىر-ٴبىرىمىزدى سۇيەتىنىمىزدى كورسەتۋدىڭ قانداي جولدارى بار؟
7 قۇداي سوزىندە «ٴبىر-ٴبىرىڭدى سۇيىڭدەر» دەپ قايتا-قايتا ايتىلعان (جوح. 15:12، 17؛ ريم. 13:8؛ سال. 1-ح. 4:9؛ پەت. 1-ح. 1:22؛ جوح. 1-ح. 4:11). ٴبىراق سۇيىسپەنشىلىك كوزگە كورىنبەيتىن ىشتەگى سەزىم عوي. ونى قالاي ٴبىز سىرتقا كورسەتە الامىز؟ سوزىمىزبەن جانە ىسىمىزبەن.
8 باۋىرلاستاردى جاقسى كورەتىنىمىزدى كورسەتۋدىڭ جولدارى كوپ. سولاردىڭ كەيبىرى مىنالار: «ٴبىر-بىرىڭە شىندىقتى ايتىڭدار» (زاك. 8:16). «ٶزارا تاتۋلىق ساقتاڭدار» (مار. 9:50). «ٴبىر-بىرىڭە ٴبىرىنشى بولىپ قۇرمەت كورسەتىڭدەر» (ريم. 12:10). «ٴبىر-ٴبىرىڭدى... قابىلداڭدار» (ريم. 15:7). «ٴبىر-ٴبىرىڭدى... كەشىرىڭدەر» (قول. 3:13). «ٴبىرىڭنىڭ اۋىرتپالىعىڭدى ەكىنشىڭ كوتەرىسىڭدەر» (عال. 6:2). «ٴبىر-ٴبىرىڭدى ٵردايىم... جۇباتىڭدار» (سال. 1-ح. 4:18). «ٴبىر-ٴبىرىڭدى... نىعايتىپ جۇرىڭدەر» (سال. 1-ح. 5:11). «ٴبىر-ٴبىرىڭ ٷشىن دۇعا ەتىڭدەر» (جاق. 5:16).
قيىندىق كورىپ جۇرگەن باۋىرلاسىمىزعا قالاي كومەكتەسە الامىز؟ (7—9-ابزاستاردى قاراڭىز)
9. نەلىكتەن وزگەلەردى جۇباتۋ سۇيىسپەنشىلىك تانىتۋدىڭ ماڭىزدى قىرى بولىپ تابىلادى؟ (سۋرەتتى دە قاراڭىز.)
9 اتالىپ كەتكەن جولداردىڭ ىشىنەن «ٴبىر-ٴبىرىڭدى... ٵردايىم جۇباتىڭدار» دەگەنىن قاراستىرىپ كەتەيىك. نەلىكتەن وزگەلەردى جۇباتۋ — سۇيىسپەنشىلىك تانىتۋدىڭ ماڭىزدى قىرى؟ كيەلى كىتاپتى تۇسىندىرەتىن ٴبىر ەڭبەكتە ايتىلعانداي، «جۇباتۋ» دەپ اۋدارىلعان ٴتۇپنۇسقاداعى ٴسوز «اۋىر كەزەڭدى باستان وتكەرىپ جاتقان ادامنىڭ قاسىندا بولىپ، جىگەر بەرۋدى» بىلدىرەدى. دەمەك، كۇيزەلىپ جۇرگەن باۋىرلاسىمىزدى جۇباتقاندا ٴبىز وعان ەڭسەسىن تىكتەپ، ٵرى قاراي ەحوباعا قىزمەت ەتە بەرۋگە كومەكتەسەمىز. قاجەت كەزدە باۋىرلاسىمىزدىڭ جانىنان تابىلىپ، كوڭىلىن اۋلاساق، ونى سۇيەتىنىمىزدى كورسەتەمىز (قور. 2-ح. 7:6، 7، 13).
10. جاناشىرلىق پەن جۇباتۋدىڭ قانداي بايلانىسى بار؟
10 جاناشىرلىق پەن جۇباتۋ ٴبىر-بىرىمەن تىكەلەي بايلانىستى. ويتكەنى جاناشىر ادام باسقالاردىڭ اۋىرتپالىعىن جەڭىلدەتىپ، جۇباتۋعا اسىعادى. دەمەك، ادامدى جۇباتۋ ٷشىن الدىمەن بىزدە سوعان قوزعاۋ سالاتىن جاناشىرلىق سەزىمى بولۋ كەرەك. ەحوبانىڭ قاسيەتىن سيپاتتاي وتىرىپ، پاۋىل وسى بايلانىستى انىق كورسەتكەن. ول ەحوبانى «قايىرىمى مول اكە جانە جۇبانىش اتاۋلىنىڭ قاينار كوزى» دەگەن (قور. 2-ح. 1:3). پاۋىل وسىنداعى «قايىرىمى مول» دەگەن تىركەستى وزگەلەرگە دەگەن جاناشىرلىق سەزىمىن سيپاتتاۋ ٷشىن قولدانعان، ٵرى بۇل ٴسوز ەحوبانىڭ ادامدارعا قاتتى جانى اشيتىنىن كورسەتەدى. وسى جاناشىرلىعى وعان «قيىندىق كورگەن كەزىمىزدىڭ بارىندە» ٴبىزدى جۇباتۋعا قوزعاۋ سالادى (قور. 2-ح. 1:4). قاينار بۇلاقتىڭ سۋى ادامنىڭ ٴشولىن قاندىرىپ، سەرگىتەتىنىندەي، ەحوبا دا رۋحى كۇيرەگەن ادامدى سەرگىتىپ، جۇباتادى. ولاي بولسا، قالاي ٴبىز ەحوباعا ەلىكتەپ، جاناشىرلىق سەزىنىپ، وزگەلەردى جۇباتا الامىز؟ بۇل ٷشىن بويىمىزدا وزگەلەردى جۇباتۋعا تالپىندىراتىن قاسيەتتەردى جەتىلدىرسەك بولادى. مىسالى، قانداي؟
11. قولوستىقتارعا 3:12 مەن پەتىردىڭ 1-حاتى 3:8 گە ساي، وزگەلەردى ٴسۇيىپ، ولاردى جۇباتۋ ٷشىن بىزگە تاعى قانداي قاسيەتتەر قاجەت؟
11 «ٴبىر-ٴبىرىمىزدى ٵردايىم... جۇباتىپ»، سۇيىسپەنشىلىك تانىتا بەرۋ ٷشىن بىزگە نە قاجەت؟ قايعىعا ورتاقتاس، باۋىرلاستاردى سۇيەتىن، مەيىرىمدى بولۋىمىز كەرەك (قولوستىقتارعا 3:12؛ پەتىردىڭ 1-حاتى 3:8 وقىڭىز). ەگەر جاناشىرلىق جانە ونىمەن بايلانىستى قاسيەتتەر بويىمىزدا جەتىلىپ، بولمىسىمىزعا ٴتان بولىپ كەتسە، ادام قينالعاندا قاراپ تۇرا المايمىز، ونى جۇباتۋعا اسىعامىز. ويتكەنى يسا ايتقانداي، «ادامنىڭ جۇرەگى نەگە تولى بولسا، اۋزى سونى ايتار. جاقسى ادام جۇرەگىندەگى جاقسى قازىنادان جاقسى نارسە... الىپ شىعادى.» (مات. 12:34، 35). راسىمەن دە، باۋىرلاستاردى قاجەت كەزدەرىندە جۇباتۋ — ولارعا سۇيىسپەنشىلىك تانىتۋدىڭ ماڭىزدى جولى.
ارامىزداعى سۇيىسپەنشىلىك سۋىپ كەتپەس ٷشىن نە ىستەسەك بولادى؟
12. ا) ٴبىز نە نارسەگە جول بەرمەۋىمىز كەرەك؟ ٵ) ٴبىز قانداي سۇراقتى قاراستىرامىز؟
12 ٴبارىمىز دە «ٵرى قاراي دا ٴبىر-ٴبىرىمىزدى سۇيە» بەرگىمىز كەلەدى (جوح. 1-ح. 4:7). ٴبىراق يسانىڭ «كوپشىلىكتىڭ سۇيىسپەنشىلىگى سۋىپ كەتەدى» دەپ ايتقانىن دا ۇمىتپاۋىمىز كەرەك (مات. 24:12). ارينە، يسا شاكىرتتەرىنىڭ كوپشىلىگى سۇيىسپەنشىلىك تانىتپاي كەتەدى دەگىسى كەلمەگەن. دەسە دە ٴبىز سۇيىسپەنشىلىكتەن جۇرداي وسى دۇنيەنىڭ رۋحىن جۇقتىرىپ الۋدان ساق بولۋىمىز كەرەك. ەندەشە باۋىرلاستارعا دەگەن سۇيىسپەنشىلىگىمىزدىڭ كۇيىن قالاي تەكسەرسەك بولادى؟ قازىر وسى ماڭىزدى سۇراقتى قاراستىرايىق.
13. باۋىرلاستارعا دەگەن سۇيىسپەنشىلىگىمىزدى قالاي تەكسەرسەك بولادى؟
13 سۇيىسپەنشىلىگىمىزدىڭ قانداي كۇيدە ەكەنىن تەكسەرۋدىڭ ٴبىر جولى — ٵرتۇرلى جاعدايلاردا قالاي ارەكەت ەتەتىنىمىزگە ٴمان بەرۋ (قور. 2-ح. 8:8). مىسالى، قانداي جاعدايلاردا؟ پەتىر: «بارىنەن بۇرىن، ٴبىر-ٴبىرىڭدى بارىنشا سۇيىڭدەر، ويتكەنى سۇيىسپەنشىلىك كوپتەگەن كۇنانى جابادى»،— دەگەن (پەت. 1-ح. 4:8). دەمەك، وزگەلەر قاتەلەسكەندە نە ٴبىزدى رەنجىتكەندە نە ىستەيتىنىمىزگە قاراپ، سۇيىسپەنشىلىگىمىزدىڭ كۇيىن بىلسەك بولادى.
14. پەتىردىڭ 1-حاتى 4:8 گە ساي، ٴبىز باۋىرلاستاردى قالاي ٴسۇيۋىمىز كەرەك؟ مىسال كەلتىرىڭىز.
14 پەتىر ايتقان سوزدەردى تالداپ كورەيىك. 8-تارماقتىڭ ٴبىرىنشى جارتىسىندا ٴبىز باۋىرلاستاردى جاي ەمەس، «بارىنشا ٴسۇيۋىمىز» كەرەكتىگى ايتىلعان. ال تارماقتىڭ ەكىنشى جارتىسىندا ٴبىز باۋىرلاستاردى وسىلاي سۇيسەك، ولاردىڭ كوپتەگەن كۇنالارىن جابا الاتىنىمىز ايتىلعان. مىناداي مىسال كەلتىرسەك بولادى: سىرىقتارى مەن داقتارى كوپ ۇستەلدى ەلەستەتەيىكشى. سول ۇستەلدىڭ ۇستىنە داستارقاندى بارىنشا جازىپ، جايىپ قويساق، ول ۇستەلدىڭ ٴبىر-ەكى عانا ەمەس، كوپتەگەن كەم-كەتىگىن جاۋىپ قالادى. سول سياقتى باۋىرلاستاردى «بارىنشا سۇيەتىن» بولساق، ولاردىڭ ٴبىر-ەكى عانا ەمەس، «كوپتەگەن كۇناسىن جابامىز»، ياعني كەشىرەمىز.
15. باۋىرلاستارعا دەگەن سۇيىسپەنشىلىگىمىز كۇشتى بولسا، نە ىستەي الامىز؟ (قولوستىقتارعا 3:13)
15 باۋىرلاستارعا دەگەن سۇيىسپەنشىلىگىمىز ولاردى كەشىرۋ قيىن كەزدەرى دە كەشىرە الاتىنداي كۇشتى بولۋ كەرەك (قولوستىقتارعا 3:13 وقىڭىز). باۋىرلاستارىمىزدى كەشىرۋ قولىمىزدان كەلىپ جاتسا، سۇيىسپەنشىلىگىمىزدىڭ بەرىك ەكەنىن جانە ەحوباعا ۇنامدى بولعىمىز كەلەتىنىن كورسەتەمىز. وزگەلەردىڭ بىزگە ۇنامايتىن قىلىقتارى مەن قاتەلىكتەرىنە كەشىرىممەن قاراۋعا تاعى نە كومەكتەسەدى؟
تەك جاقسى سۋرەتتەردى ساقتاپ، باسقالارىن ٶشىرىپ تاستايتىنىمىزداي، باۋىرلاستارمەن بولعان جاقسى ەستەلىكتەردى عانا ەستە ساقتاپ، جامانىن ۇمىتقىمىز كەلەدى (16، 17-ابزاستى قاراڭىز)
16، 17. وزگەلەردىڭ قاتەلىكتەرىنە نازار اۋدارماۋعا نە كومەكتەسەدى؟ مىسال كەلتىرىڭىز. (سۋرەتتى دە قاراڭىز.)
16 باۋىرلاستاردىڭ جامان ەمەس، جاقسى جاقتارىنا ٴمان بەرىڭىز. مىسالى، دوستارىڭىزبەن وتىرىسقا جينالدىڭىز دەلىك. كوڭىلدى ۋاقىت وتكىزىپ، وتىرىستىڭ سوڭىندا بارلىعىمەن بىرگە سۋرەتكە تۇسەسىز. ٴبىر سۋرەت بولماسا، باسقاسى جاقسى شىعار دەپ، تاعى ەكى رەت باساسىز. ٴسۇيتىپ، ٴتۇسىرىپ العان ٷش سۋرەتكە قاراساڭىز، بىرەۋىندە ٴبىر ەر باۋىرلاستىڭ قاباعى ٴتۇيىلىپ قالىپتى. ول سۋرەتتى نە ىستەيسىز؟ بارلىقتارى كۇلىپ، ادەمى تۇسكەن تاعى ەكى سۋرەت بار بولعاندىقتان، ونى ٶشىرىپ تاستايسىز.
17 سۋرەتتەردى ەسىمىزدە قالعان ساتتەرمەن سالىستىرۋعا بولادى. ادەتتە ەسىمىزدە باۋىرلاستارمەن وتكىزگەن جاقسى ساتتەر قالادى. ٴبىراق ٴبىر جاعدايدا ٴبىر باۋىرلاس ٴسىزدىڭ كوڭىلىڭىزگە تيەتىن نارسە ايتىپ نە ىستەپ قويدى دەلىك. ٴسىز سول جاعدايدى ەستە ساقتاپ قالاسىز با؟ جامان شىققان سۋرەتتى ٶشىرىپ تاستاعانداي، ونداي ەستەلىكتى دە نەگە جادىمىزدان ٶشىرىپ تاستاماسقا؟ (ناق. س. 19:11؛ ەفەس. 4:32). ول باۋىرلاس تۋرالى جاقسى ەستەلىكتەرىڭىز كوپ بولعاندىقتان، سول ٴبىر بولماشى قاتەلىگىن ۇمىتا سالۋعا بولادى. ٴبىز باۋىرلاستارىمىزبەن وتكىزگەن تەك جاعىمدى ساتتەردى عانا ەستە ساقتاپ، باعالاعىمىز كەلەدى.
نەگە اسىرەسە قازىر سۇيىسپەنشىلىك تانىتۋ قاجەت؟
18. وسى ماقالادا سۇيىسپەنشىلىك جايلى قانداي ويلاردى تالقىلادىق؟
18 سونىمەن، نەگە باۋىرلاستارعا دەگەن سۇيىسپەنشىلىگىمىزدى سۋىتپاي، جالىنداتا بەرۋىمىز كەرەك؟ ويتكەنى باۋىرلاستاردى سۇيسەك، ەحوبانى سۇيەتىنىمىزدى كورسەتەمىز. ال باۋىرلاستارىمىزدى جاقسى كورەتىنىمىزدى قالاي كورسەتە الامىز؟ ونىڭ ٴبىر جولى — ٴبىر-ٴبىرىمىزدى ٵردايىم جۇباتۋ. بۇل ٷشىن بىزگە جاناشىرلىق قاسيەتى كەرەك. سۇيىسپەنشىلىگىمىزدى قالاي مىقتى كۇيدە ساقتاي الامىز؟ قيىن بولسا دا، وزگەلەردىڭ قاتەلىكتەرىن كەشىرۋ ارقىلى.
19. نەگە بۇگىندە ٴبىر-بىرىمىزگە سۇيىسپەنشىلىك تانىتۋ وتە ماڭىزدى؟
19 نەگـە بۇگىنـدە ٴبىـر-بىرىمىزـگە سۇيىسپەنشىلىك تانىتۋ اسىرەسە ماڭىزدى؟ پەتىردىڭ سوزىنە نازار اۋدارايىقشى. ول: «بارلىق نارسەنىڭ سوڭى تاياپ قالدى. سوندىقتان... ٴبىر-ٴبىرىڭدى بارىنشا سۇيىڭدەر»،— دەگەن. وسى زۇلىم دۇنيەنىڭ سوڭى تاياپ كەلە جاتقاندىقتان، الدا نە بولۋى مۇمكىن؟ يسا ٸزباسارلارىنا: «مەنىڭ اتىما بولا سەندەردى جەك كورەتىن بولادى»،— دەگەن (مات. 24:9). وسى دۇنيەنىڭ جەككورۋشىلىگىنە توتەپ بەرۋ ٷشىن ٶزارا بىرلىگىمىزدى ساقتاۋىمىز كەرەك. سوندا سۇيىسپەنشىلىكتىڭ ارقاسىندا باۋىرلاستارمەن «تولىقتاي بىرىككەندىكتەن»، شايتان ارامىزعا ىرىتكى سالا المايدى (قول. 3:14؛ ٴفىلىپ. 2:1، 2).
130-ٵن كەشىرىمدى بولايىق
a قازىر باۋىرلاستارعا سۇيىسپەنشىلىك تانىتۋ اسىرەسە ماڭىزدى. نە سەبەپتى جانە باۋىرلاستاردى سۇيەتىنىمىزدى قالاي كورسەتسەك بولادى؟
