•   O-The Guardian yo 7 Septemba 2022 oya popya kutya “China odula ei okwa lopota ‘oupyu wa pitilila’ nokwa hangwa koshikukuta oshikando oshititatu, osho inashi ningwa nande onale.”

•   Eenghundana do UN do 26 Auguste 2022 oda ti kutya “Oitukulwa imwe yaAfrika otai ka hangwa koshikukuta osho inashi monika nande onale oule womido nhano.”

•   Eenghundana do BBC do 23 Auguste 2022 oda ti kutya “Oshitukulwa shinene shaEurope osha londwelwa kutya otashi ka hangwa koshikukuta shinene osho inashi monika nande onale, konima eshi sha li sha dengwa koshikukuta, opo paife pa pita omido 500.”

 Ovashivinawa vahapu ova popya kutya oshikukuta otashi ka twikila nonghalo otai ka naipala neenghono. Mbela onakwiiwa onai ka xwepopale ngoo? Ombiibeli otai ti ngahelipi?

 Ombiibeli oya xunganeka shi na sha nefimbo letu:

•   “Otaku ka kala . . . ondjala . . . keembinga neembinga.” — Lukas 21:11.

 Oshikukuta luhapu ohashi etelele ondjala. Oinima oyo hai etifwa koshikukuta, ngaashi ondjala, okumona oixuna nosho yo efyo otai wanifa po exunganeko lOmbiibeli. — Ehololo 6:6, 8.

 Ombiibeli oya yandja etomheno la femba kutya omolwashike oshikukuta tashi ende nokunaipala. Oya ti:

•   “Ondjila yomunhu ihai kala mepangelo laye mwene, . . . nhumbi ta ende, nhumbi ta yukifa eenghatu daye.” — Jeremia 10:23.

 Osho osha hala okutya ovanhu itava ka pondola, ngeenge otava “yukifa eenghatu davo,” ile tave lipangele vo vene. Omatokolo ehe li pandunge oo hava ningi ohaa etifa oshikukuta nenota.

•   Ovanongononi ova dimina kutya oilonga yovanhu ohai nyono oushitwe, naasho osha etifa oshikukuta mounyuni aushe.

•   Eshi ovanhu ovanalwisho novanapolotika hava ningi omatokolo inava diladila kombinga yonakwiiwa, osho ohashi etifa embuwalo, okukakeka omudingonoko nokunyona oushitwe. Naasho ohashi ka kekeke omeva.

 Ashike Ombiibeli otai yandje eteelelo.

 Ombiibeli oya udaneka kutya Kalunga ota ka kandula po oupyakadi wenota. Ngahelipi mbela?

1.  1. Kalunga ota ka “hanauna po ovo tava nyono edu.” (Ehololo 11:18) Kalunga ota ka hanauna po ovo hava etifa enota, ngaashi ovakolokoshi nosho yo ovanalwisho ovo eenghatu davo hadi nyono omudingonoko. — 2 Timoteus 3:1, 2.

2.  2. “Efululu la hanya tali ka ninga etale.” (Jesaja 35:1, 6, 7) Kalunga ota ka wapekulula oinima oyo ya nyonwa koshikukuta nedu ote ke li ninga oparadisa i na omeva a yela a wa.

3.  3. “Ove wa yavelela edu, to li tutike, ndele oto li ningi la punapala unene.” (Epsalme 65:9) Omolwenangeko noupuna laJehova, kombada yedu otaku ka kala oikulya iwa nomeva a yela a henena ovanhu aveshe.