OSHILESHWA 24
Oshili kombinga yovaengeli oilipi?
Jehova okwa hala tu lihonge kombinga youkwaneumbo waye womeulu. Oukwaneumbo oo owa kwatela mo ovaengeli ovo ve li “ovamati vaKalunga.” (Job 38:7) Ombiibeli oya popya shike kombinga yovaengeli? Ovaengeli ohava nwefa mo ngahelipi ovanhu? Mbela ovaengeli aveshe ove li oshitukulwa shoukwaneumbo waKalunga?
1. Ovaengeli ovo oolyelye?
Jehova okwa shita ovaengeli ofimbo ina shita edu. Ngaashi ye, navo ove na omalutu opamhepo, oo ihaa monika, nohava kala meulu. (Ovaheberi 1:14) Oku na ovaengeli omamiliyona, nakeshe umwe oku na omaukwatya aye e lili. (Ehololo 5:11) Ohava ‘wanifa ondaka yaye, nohava dulika kelombwelo leendjovo daye.’ (Epsalme 103:20) Mefimbo lonale, omafimbo amwe Jehova okwa li ha tumu ovaengeli va twale omatumwalaka aye, va yambidide nokuxupifa oshiwana shaye. Kunena, ovaengeli ohava wilike Ovakriste, opo va ye kovanhu ovo va hala okulihonga kombinga yaKalunga.
2. Satana neendemoni daye ovo oolyelye?
Ovaengeli vamwe inava kala ovadiinini kuJehova. Omweengeli wotete oo a tukula oshibofa oha ‘ifanwa Ondiaboli nosho yo Satana, oo ta hongaula ounyuni aushe.’ (Ehololo 12:9) Satana okwa li a hala okupangela ovanhu, onghee okwa li a nwefa mo ovanhu votete, nolwanima ovaengeli vakwao, ve mu waimine mounashibofa waye. Ovaengeli ovo ovanashibofa ohava ifanwa eendemoni. Jehova okwe va umba mo meulu, e va umbila kombada yedu, note ke va hanauna po.— Lesha Ehololo 12:9, 12.
3. Satana neendemoni ohava kendabala ngahelipi oku tu pukifa?
Satana neendemoni ohava pukifa ovanhu vahapu okupitila moumhulile, oo u li onghendabala yokupopya neemhepo. Oshinima sha tya ngaho osha tokolwa mOmbiibeli. Pashihopaenenwa, ovanhu vamwe ohava i kovanyanekeli, keemhule nosho yo keendudu. Vamwe ohava kongo ouhaku oo wa kwatela mo oumhulile. Ovanhu ova itavelifwa yo kutya otava dulu okupopya noonakufya. Ndele Jehova okwe tu londwela a ti: “Inamu ama kovakwamhungu ile keemhule.” (Leviticus 19:31) Okwe tu londwela ngaho, opo e tu amene kuSatana neendemoni daye. Ove li ovatondi vaKalunga nova hala oku tu etela oshiponga.
KONAKONA MOULE
Lihonga kombinga yoinima iwa oyo ovaengeli hava ningi, nghee oumhulile wa nyika oshiponga nosho yo nghee hatu dulu okuliamena kuSatana neendemoni daye.
4. Ovaengeli ohava kwafele ovanhu ve lihonge kombinga yaJehova
Ovaengeli vaKalunga ihava udifile ovanhu odikilila. Ponhele yaasho, otashi dulika va wilike ovapiya vaKalunga va ye kovanhu ovo va hala okulihonga kombinga yaye. Lesha Ehololo 14:6, 7, ndele tamu kundafana omapulo taa shikula:
-
Omolwashike twa pumbwa ekwafo lovaengeli, opo tu udife?
-
Mbela otashi ku tu ngoo omukumo okushiiva kutya ovaengeli otava dulu oku ku wilika, opo u ye kovanhu ovo va hala okulihonga kombinga yOmbiibeli? Omolwashike?
5. Henuka oumhulile
Satana neendemoni ove li ovatondi vaJehova. Ove li yo ovatondi vetu. Lesha Lukas 9:38-42, ndele tamu kundafana epulo tali shikula:
-
Eendemoni ohadi ungaunga ngahelipi novanhu?
Inatu hala eendemoni di nwefe mo okukalamwenyo kwetu. Lesha Deuteronomion 18:10-12, ndele tamu kundafana omapulo taa shikula:
-
Omeenghedi dilipi eendemoni hadi kendabala oku tu nwefa mo nosho yo okupopya nafye? Oinima ilipi hai ningwa momudingonoko weni ya nyika oumhulile?
-
Mbela ou wete ngoo shi li pandunge kwoove, eshi Jehova a kelela okulongifa oumhulile? Omolwashike?
Dana OKAVIDIO, ndele tamu kundafana omapulo taa shikula.
-
Mbela oto diladila kutya oshiketi osho sha djalwa kokamonakadona kaPalesa osha nyika oshiponga? Omolwashike?
-
Palesa okwa li a pumbwa okuninga shike, opo e liamene keendemoni?
Ovakriste vashili ohava kondjifa alushe eendemoni. Lesha Oilonga 19:19 nosho yo 1 Ovakorinto 10:21, ndele tamu kundafana epulo tali shikula:
-
Omolwashike sha fimana okuhanauna po oshinima keshe osho shi na ekwatafano noumhulile?
6. Oto dulu okupondola mokukondjifa Satana neendemoni daye
Satana oye omupangeli weendemoni. Ndele ovaengeli ovadiinini otava wilikwa komweengeli omukulunhu Mikael. Mikael edina limwe laJesus. Mikael oku na eenghono di fike peni? Lesha Ehololo 12:7-9, ndele tamu kundafana omapulo taa shikula:
-
Olyelye e na eenghono dinene? OMikael novaengeli vaye, ile oSatana neendemoni daye?
-
Mbela oto diladila kutya ovashikuli vaJesus ova pumbwa okukala va tila Satana neendemoni daye?
Oto dulu okupondola okukondjifa Satana neendemoni daye. Lesha Jakob 4:7, ndele tamu kundafana epulo tali shikula:
-
Ongahelipi to dulu okuliamena kuSatana neendemoni?
VAMWE OHAVA TI: “Inashi puka okudana ou-game, ile okutala eemuvi di na sha noumhulile. Oyo onghedi ashike yokulihafifa.”
-
Omolwashike etaleko la tya ngaho la nyika oshiponga?
ENGONGO
Ovaengeli ovadiinini ohave tu kwafele. Satana neendemoni daye ove li ovatondi vaJehova, nohava longifa oumhulile, opo va pukife ovanhu.
Eendululo
-
Ovaengeli vaJehova ohava kwafele ngahelipi ovanhu ve lihonge kombinga yaye?
-
Satana neendemoni daye ovo oolyelye?
-
Omolwashike uhe na okukufa ombinga moumhulile?
TALA OUYELELE WA WEDWA PO
Tala koumbangi oo tau ulike kutya Jesus oye omweengeli omukulunhu Mikael.
“Olyelye omweengeli omukulunhu Mikael?” (Oshitukulwa shi li ko jw.org)
Tala osho tashi ulike kutya Ondiaboli kai fi oukwatya, ile owii u li meni letu.
“Ondiaboli oko ngoo i li shili?” (Oshitukulwa shi li ko jw.org)
Tala nghee omukainhu umwe a manguluka ko kenwefemo leendemoni.
“Onghalamwenyo yaye paife oi na eityo” (Oshungonangelo, 1 Juli 1993)
Lihonga nghee Satana ha longifa oumhulile, opo a pukife ovanhu.
“Oshili kombinga youmhulile noulodi” (Ondjila oyo tai twala komwenyo waalushe, oshitukulwa 5)
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
