OSHILESHWA 22
Ongahelipi to dulu okulombwela vamwe kombinga yonghundana iwa?
Eshi to lihongo oshili yOmbiibeli, otashi dulika u diladile kutya, ‘Keshe umwe okwa pumbwa oku i uda!’ Oshoshili kutya keshe umwe okwa pumbwa oku i uda! Ashike otashi dulika u kale wa tila okulombwela vamwe kombinga yaasho we lihonga. Natu ka konakoneni nghee to dulu okufinda oumbada oo, nokulombwela vamwe nehafo kombinga yonghundana iwa oyo ya popiwa mOmbiibeli.
1. Ongahelipi to dulu okulombwela vamwe ovo u shii kombinga yaasho we lihonga?
Ovahongwa vaJesus ova ti: “Itatu efa okupopya kombinga yoinima oyo twa mona notwa uda.” (Oilonga 4:20) Ova li va lenga oshili neenghono, nomolwaasho va li va hala oku i lombwela ovanhu vahapu ngaashi tashi dulika. Mbela naave osho ho kala u udite ngaho? Ngeenge osho, konga eemhito, opo u dule okulombwela nefimaneko ovapambele voye nookaume koye osho we lihonga.— Lesha Ovakolossi 4:6.
Eenghedi dimwe omo to dulu oku shi ninga
-
Ngeenge to popi novapambele, eta po oshikundafanwa shimwe shopaMbiibeli to ti: “Onde lihonga oshinima shimwe shihokwifa oshivike eshi.”
-
Lombwela kaume koye oo ta yahama, ile oo e na oshisho omushangwa wetwomukumo.
-
Lombwela ovanailonga vakweni osho we lihonga pekonakonombiibeli loye, ile pokwoongala, ovo tave ku pula kutya exuliloshivike loye ola enda ngahelipi.
-
Ulikila ookaume koye o-jw.org website.
-
Shiva vamwe va kale pekonakonombiibeli loye, ile u va ulikile nghee tava dulu okupula ekonakonombiibeli ko jw.org.
2. Omolwashike sha fimana okulitulila po elalakano lokuudifa pamwe neongalo?
Ovahongwa vaJesus ova li hava longo shihapu shihe fi ashike okulombwela ovashiivikile novapambele vavo onghundana iwa. Jesus okwa li e ‘va tuma oovavali ve mu tetekele koshilando,’ opo va ka udife. (Lukas 10:1) Oilonga oyo ya unganekwa nawa yokuudifa oya pa ovanhu vahapu omhito, opo va ude kombinga yonghundana iwa. Okuudifa pamwe okwa li yo kwa etela ovahongwa ehafo linene. (Lukas 10:17) Mbela naave ino hala okulitulila po elalakano u kale ho udifa pamwe neongalo?
KONAKONA MOULE
Lihonga nghee to dulu okufinda oumbada nokumona ehafo olo hali di mokuudifa onghundana iwa.
3. Jehova ota kala pamwe naave
Vamwe ovo va hala okuudifa otashi dulika va kale va tila kutya ovanhu otave ke linyenga ngahelipi.
-
Mbela oho kala wa tila okulombwela vamwe kombinga yaasho we lihonga? Omolwashike ho kala u udite ngaho?
Dana OKAVIDIO, ndele tamu kundafana epulo tali shikula.
-
Ovanyasha ovo vEendombwedi ova finda ngahelipi oumbada?
Lesha Jesaja 41:10, ndele tamu kundafana epulo tali shikula:
-
Ngeenge oho kala wa tila okuudifa, eilikano otali dulu oku ku kwafela ngahelipi?
Owe shi shiiva tuu?
Eendombwedi daJehova dihapu nado oda li hadi diladila kutya kadi na efiku di udifile vamwe onghundana iwa. Pashihopaenenwa, Sergey okwa li e lifya ounye nokwa li ha mono shidjuu okupopya novanhu. Ashike lwanima okwa ka konakona Ombiibeli. Okwa ti: “Nonande onda li ndi na oumbada, onda li nda hovela okulombwela vamwe kombinga yaasho handi lihongo. Onda li nda kumwa eshi nda mona kutya okulombwela vamwe kombinga yOmbiibeli osha ningifa nge ndi kale ndi na omukumo. Osha li yo sha pameka eitavelo lange.”
4. Kala u na efimaneko
Ngeenge to udifa onghundana iwa, ino diladila ashike kwaasho u na okupopya, ndele diladila yo nokunghee to shi popi. Lesha 2 Timoteus 2:24 nosho yo 1 Petrus 3:15, ndele tamu kundafana omapulo taa shikula:
-
Ongahelipi to dulu okutula moilonga eevelishe odo, ngeenge to lombwele vamwe kombinga yOmbiibeli?
-
Ovapambele voye vamwe nosho yo ookaume otashi dulika va kale ve li omhinge naave. Oto ka ninga po shike? Noshike uhe na okuninga?
-
Omolwashike tashi dulika shi li xwepo oku va pula omapulo nelungi, ponhele yoku va lombwela osho ve na okwiitavela?
5. Okuudifa onghundana iwa ohaku eta ehafo
Jehova okwa li a pa Jesus oilonga yokuudifa onghundana iwa. Jesus okwa li a tala ko ngahelipi oilonga oyo? Lesha Johannes 4:34, ndele tamu kundafana omapulo taa shikula:
-
Okulya oikulya iwa ohashi tu kaleke nomwenyo nohashi tu hafifa. Omolwashike Jesus a yelekanifa okulonga ehalo laKalunga noikulya, mwa kwatelwa okuudifa onghundana iwa?
-
Ehafo lilipi to diladila hali di mokuudifa onghundana iwa?
Omaetepo
-
Pefimbo lokwoongala kwomokati koshivike, lihonga nghee to dulu okuhovela eenghundafana.
-
Popya naao hamu konakona naye Ombiibeli shi na sha nanghee to dulu okulishangifa, opo u kale ho yandje oipopiwa yovanafikola pokwoongala kwomokati koshivike. Oinakuwanifwa yovanafikola otai dulu oku ku kwafela u kale we lilongekida okulombwela vamwe kombinga yaasho to lihongo.
-
Longifa oitukulwa “Vamwe ohava ti,” ile “Umwe otashi dulika a pule kutya,” oyo i li moileshwa ei, opo u mone nghee to dulu okunyamukula omapulo nosho yo okutomhafana novanhu.
UMWE OTASHI DULIKA A PULE KUTYA: “Otashi ende ngahelipi?”
-
Ongahelipi to dulu okulongifa omhito oyo u mu lombwele kombinga yaasho we lihonga pekonakonombiibeli loye?
ENGONGO
Okulombwela vamwe onghundana iwa ohaku eta ehafo, notashi dulika shiha kale shidjuu ngaashi wa li to diladila.
Eendululo
-
Omolwashike u na okulombwela vamwe onghundana iwa?
-
Ongahelipi to dulu oku shi ninga monghedi yefimaneko?
-
Ongahelipi to dulu okufinda oumbada oo tashi dulika ho kala u na, ngeenge tashi uya pokuudifa?
TALA OUYELELE WA WEDWA PO
Diladila keenghedi nhee di li paunafangwa di na sha nanghee to dulu okuudifa onghundana iwa to longifa okakalata ko jw.org.
Etwalemo langhee hatu dulu okuyandja okakalata ko-jw.org (1:43)
Lihonga kombinga yomaukwatya ane oo taa dulu oku ku kwafela u udife kombinga yonghundana iwa.
“Owe lilongekida ngoo okukala omuyuli wovanhu?” (Oshungonangelo, Septemba 2020)
Tala nghee oshihopaenenwa shopaMbiibeli tashi dulu oku ku kwafela u kale u na ouladi wokuudifa onghundana iwa, nokuli nonande ou li omunyasha.
Tala nghee to dulu okupopya kombinga yOmbiibeli novapambele voye, ovo vehe shii kombinga yaJehova.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
