OSHILESHWA 16
Jesus okwa li a longa shike eshi a li kombada yedu?
Ngeenge taku popiwa kombinga yaJesus, ovanhu vahapu ohave mu diladila ashike e li okahanana kongaho, omuprofeti omunaendunge, ile omulumenhu oo a hepekwa fiyo omefyo. Ndele mbela itatu dulu okulihonga shihapu, ngeenge otwa konakona kombinga yokukalamwenyo kwaye kwokombada yedu? Moshileshwa eshi, ohatu ka konakona oinima ya fimana oyo Jesus a li a ninga, nanghee osho tashi dulu oku ku etela ouwa.
1. Mbela oshilonga sha fimana shilipi Jesus a li a longa?
Oshilonga osho sha li sha fimanenena kuJesus osho “okuudifila oilando imwe onghundana iwa yOuhamba waKalunga.” (Lesha Lukas 4:43.) Onghundana iwa oyo a li a udifa oyoyo kutya Kalunga ota ka dika po ouhamba, ile epangelo olo tali ka kandula po omaupyakadi aeshe ovanhu. a Jesus okwa li a longa noudiinini oule weedula nhatu netata, opo a udifile ovanhu etumwalaka olo tali tu omukumo.— Mateus 9:35.
2. Onelalakano lashike Jesus a li a longa oikumwifilonga?
Ombiibeli oya popya kombinga ‘yoilonganghono, oikumwifilonga nomadidiliko mahapu oo Kalunga a longa okupitila muJesus.’ (Oilonga 2:22) Kalunga okwa li a yandja eenghono kuJesus, opo a dule okupangela onghalo yomhepo, okupalula ovanhu omayovi, okuvelula ovanaudu nokunyumuna nokuli oonakufya. (Mateus 8:23-27; 14:15-21; Markus 6:56; Lukas 7:11-17) Oikumwifilonga oyo Jesus a li a longa oya ulika filufilu kutya okwa li a tumwa kuKalunga. Oya ulika yo kutya Jehova oku na eenghono dokukandula po omaupyakadi etu aeshe.
3. Oshike hatu lihongo konghedi yaJesus yokukalamwenyo?
Jesus okwa li a dulika kuJehova monghalo keshe. (Lesha Johannes 8:29.) Okwa li a longa keshe osho Xe e mu pula, fiyo osheshi a fya, nonande ovanhu vahapu ova li tave mu pataneke. Okwa ulika filufilu kutya ovanhu otava dulu okulongela Jehova, nonande ove li meenghalo didjuu. Kungaho, Jesus ‘okwe tu tulila po oshihopaenenwa tu shikule filufilu eenghatu daye.’— 1 Petrus 2:21.
KONAKONA MOULE
Lihonga kombinga yanghee Jesus a li a udifila ovanhu onghundana iwa nokulonga oikumwifilonga.
4. Jesus okwa li a udifa onghundana iwa
Jesus okwa li ha ende eekilometa omafele meendjila da nyika ondwi, ta udifile ovanhu vahapu onghundana iwa ngaashi tashi dulika. Lesha Lukas 8:1, ndele tamu kundafana omapulo taa shikula:
-
Mbela Jesus okwa li ashike ha udifile ovanhu ovo have uya kuye?
-
Mbela Jesus okwa li ha ningi eenghendabala di fike peni, opo a konge ovanhu?
Kalunga okwa li a xunganeka kutya Messias ota ka udifa onghundana iwa. Lesha Jesaja 61:1, 2, ndele tamu kundafana omapulo taa shikula:
-
Jesus okwa li a wanifa po ngahelipi exunganeko olo?
-
Mbela eshi to tale, ovanhu kunena ova pumbwa ngoo okuuda onghundana oyo iwa?
5. Jesus okwa honga oilihongomwa ya fimana
Kakele ashike kokuudifa onghundana iwa yOuhamba waKalunga, Jesus okwa li yo a honga oilihongomwa ya fimana. Natu ka konakone oilihongomwa imwe ya fimana meudifo laye lokomhunda. Lesha Mateus 6:14, 34; 7:12, ndele tamu kundafana omapulo taa shikula:
-
Omayele taa longo elipi Jesus a yandja, oo taa hangwa meevelishe odo?
-
Mbela oto diladila kutya omayele oo otaa longo ngoo nokunena?
6. Jesus okwa li a longa oikumwifilonga
Jehova okwa li a pa Jesus eenghono, opo a dule okulonga oikumwifilonga ihapu. Opo u mone oshihopaenenwa shimwe, lesha Markus 5:25-34, ile u dane OKAVIDIO, ndele tamu kundafana omapulo taa shikula.
-
Ngaashi twa mona mokavidio, omukainhu oo a li ta vele okwa li a itavela shike?
-
Oshike u hole kombinga yoshikumwifilonga osho?
Lesha Johannes 5:36, ndele tamu kundafana epulo tali shikula:
-
Oikumwifilonga oyo Jesus a longa oya yandja “oumbangi” ulipi kombinga yaye?
Owe shi shiiva tuu?
Oinima ihapu oyo tu shii kombinga yaJesus otai hangwa momambo ane Ombiibeli, haa ifanwa Omavangeli: Mateus, Markus, Lukas nosho yo Johannes. Omushangi wEvangeli keshe okwa shanga ouyelele wa yooloka ko kuwamukwao kombinga yaJesus. Ashike omauyelele aeshe oo otaa tu kumwe notae tu kwafele tu kale tu na efano la twa li na sha nonghalamwenyo yaJesus.
-
MATEUS
oye a shanga tete Evangeli laye. Ola popya kombinga yoinima ihapu oyo Jesus a honga, unene tuu osho a honga kombinga yOuhamba waKalunga.
-
MARKUS
oye a shanga Evangeli olo lixupi kumakwao. Ola popya kombinga yoiningwanima ihapu itunhula.
-
LUKAS
okwa popya nghee okwiilikana kwa li kwa fimana kuJesus, nanghee a li a ungaunga novakainhu nonghenda.
-
JOHANNES
okwa popya unene kombinga yeenghundafana odo da li pokati kaJesus nookaume kaye nosho yo novanhu vamwe ve lili. Osho otashi tu hongo kutya Jesus okwa li naanaa omunhu a tya ngahelipi.
VAMWE OHAVA TI: “Jesus okwa li ashike omunhu oo ha longo ouwa, ndele haye a li Messias.”
-
Oto nyamukula ngahelipi?
ENGONGO
Jesus okwa li ha udifa kombinga yOuhamba waKalunga, ha longo oikumwifilonga nokwa li ha dulika kuJehova monghalo keshe.
Eendululo
-
Oilonga ilipi ya li ya fimana kuJesus fimbo a li kombada yedu?
-
Oikumwifilonga oyo Jesus a longa otai yandje oumbangi ulipi?
-
Oilihongomwa ya fimana ilipi Jesus a honga?
TALA OUYELELE WA WEDWA PO
Jesus okwa li ha popi unene kombinga yashike?
“Omolwashike Ouhamba waKalunga wa fimana kuJesus?” (Oshungonangelo, 1 Oktoba 2014)
Konakona kutya omolwashike hatu dulu okwiitavela kutya Jesus okwa li shili a longa oikumwifilonga.
“Oshike to lihongo koikumwifilonga yaJesus?” (Oshungonangelo, 15 Juli 2004)
Lesha kombinga yanghee onghalamwenyo yomulumenhu umwe ya lunduluka konima eshi e lihonga kombinga yaasho Jesus a ningila vamwe.
“Onda li nda pitifa komesho ouwa wange mwene” (Oshungonangelo, 1 Novemba 2014)
Tala omusholondodo woiningwanima ya fimana monghalamwenyo yaJesus, eshi a li kombada yedu, i li melandulafano.
a Moshileshwa 31-33 ohatu ka kundafana moule kombinga yOuhamba waKalunga.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
