Jesus novahongwa vaye ova li va tauluka omulonga waJordan oo wa li popepi naJeriko, ofimbo va li molweendo lavo okudja muPerea va yuka kuJerusalem. Ovanhu vamwe ova li va ya pamwe navo koshivilo shOpaasa shomo 33 O.P.

Jesus okwa li e kwetele komesho ovahongwa vaye, molwaashi okwa li a halelela okufika moshilando pefimbo omolwoshivilo shOpaasa. Ashike ovahongwa ova li va tila. Eshi Lasarus a fya nosho yo eshi Jesus a li pokuya kuJudea ta di muPerea, Tomas okwa li a lombwela ovahongwa vakwao a ti: “Nafye natu yeni, tu ka fyeni pamwe naJesus.” (Johannes 11:16, 47-53) Osha li sha nyika oshiponga okuya kuJerusalem, naasho osha li shi uditiwe ko eshi ovahongwa va li va tila.

Opo Jesus a kwafele ovayapostoli vaye va shiive osho shi li komesho, okwa li e va ifana ovo aveke ndele te va lombwele ta ti: “Ohatu yeni kuJerusalem, ndele Omona womunhu ota ka yandjwa momake ovapristeri ovakulunhu novanongo vomishangwa. Ota ka tokolelwa efyo nota ka yandjwa momake ovanhu vomoiwana imwe i lili opo a shekwe, a dengwe nokuvalelwa komuti womahepeko; nomefiku etitatu ota ka nyumunwa.” — Mateus 20:18-19.

Osho osha li oshikando oshititatu Jesus ta lombwele ovahongwa vaye shi na sha nefyo nosho yo enyumuko laye. (Mateus 16:21; 17:22, 23) Ashike pomhito oyo okwa li a popya kutya ota ka valelwa komuti womahepeko. Ova li va pwilikina kuye, ndele kava li ve udite eityo laasho a li ta popi. Otashi dulika va li tava diladila kutya Jesus ota ka dika po vali ouhamba waIsrael kombada yedu, nonokutya otava ka pewa eendodo mouhamba oo.

Salome, ina yomuyapostoli Jakob naJohannes, naye okwa li umwe womovaendi ovo. Jesus  okwa li a luka ovayapostoli ovo vavali edina olo tali ti “Ovana vEngungumo,” molwaashi ova li ve na ouladi. (Markus 3:17; Lukas 9:54) Oule wefimbo, ovayapostoli ovo vavali ova kala ve na etimaumbwile loku ka kala ve na onhele ya tumbala mOuhamba waKristus. Ina okwa kala e shi shii oshinima sha tya ngaho. Okwa li a ya kuJesus ponhele yavo, ndele te linyongamene puye noku mu pula ekwafo. Jesus okwe mu pula a ti: “Owa hala shike?” Omukainhu okwa nyamukula a ti: “Ohandi ku indile opo ovanamati vange vavali va ka kale pamwe naave mOuhamba woye, umwe okolulyo loye naumwe okolumosho loye.” — Mateus 20:20, 21.

Paulelalela, eindilo olo ola dja kuJakob naJohannes. Jesus opo ashike a hangika a popya shi na sha nokushekwa kwaye, ndele te va lombwele ta ti: “Nye kamu shi shii osho tamu pula. Otamu dulu ngoo okunwa meholo olo ndi li pokunwa?” Ova tya kuye: “Ohatu dulu.” (Mateus 20:22) Ashike natango kava li ve udite ko osho a li a hala okutya.

Ndele nande ongaho, Jesus okwe va lombwela a ti: “Oshili otamu ka nwa meholo lange, ashike okukala kolulyo nokolumosho lange haame handi ku yandje, ndele okwaava ve ku longekidilwa kuTate.” — Mateus 20:23.

Eshi ovayapostoli vakwao omulongo va uda osho Jakob naJohannes va pula, ova li va handuka. Mbela Jakob naJohannes ovo va li ve kwetele komesho eemhata odo kutya olyelye munene e dule vakwao? (Lukas 9:46-48) Kakele kaasho, osho va li va pula osha ulika kutya ovayapostoli ovo omulongo navavali kava li va tula moilonga omayele aJesus e na sha nokukala ovalininipiki. Ova li va hala okukala ve dule vakwao.

Jesus okwa li a katuka onghatu opo a ungaunge neemhata odo nosho yo etukauko olo da eta. Okwa li a ifana ovayapostoli omulongo navavali noku va pa omayele opahole, a ti: “Omu shi shii kutya ovapangeli voiwana ohave i pangele, novanaenghono ohava longifa eenghonopangelo davo oku i pangela. Osho hasho shi na okukala ngaho mokati keni, ndele keshe ou a hala a kale munene mokati keni na kale omuyakuli weni, naau a hala okukala komesho mokati keni na kale omupiya waaveshe.” — Markus 10:42-44.

Jesus okwa li e va lombwela oshihopaenenwa shaye osho ve na okushikula. Okwa ti: “Omona womunhu, ka li e uya okuyakulwa, ndele okuyakula nokuyandja omwenyo waye u ninge ekulilo lavahapu.” (Mateus 20:28) Jesus okwa kala oule womido nhatu ta yakula vamwe, nokuli fiyo oposhitwa shokufila vamwe. Ovahongwa navo ove na okuulika omaukwatya a fa aKristus mokukala va hala okuyakula vamwe ponhele yokuyakulwa, nokukala vanini ponhele yokukala vanene.