Onghundana kombinga yaJesus oya li ya tandavela mokati kOvajuda ovo va li hava di kouningininolundume wefuta laGalilea va dja kuDekapolis. Vahapu ova li va uda oshikungulu osho Jesus a li a loteka, navamwe ova li ve shii kutya okwa velula omulumenhu oo a li e na eendemoni. Ashike “ongudu inene yovanhu” oya li ya ongala pefuta muKapernaum opo i hambelele Jesus. (Markus 5:21) Eshi a li pokufika pomunghulofuta, ovanhu ova li va halelela oku mu mona nova li ve mu teelela nodjuulufi.

Jairus, omupashukili woshinagoga, tashi dulika osho sha li muKapernaum, okwa li a halelela okumona Jesus. Okwa li a twa eengolo peemhadi daJesus, ndele te mu indile lwoikando ihapu ta ti: “Okamonakadona kange otaka vele neenghono. Ila u ke ka tenheke omake alikana, opo ka veluke.” (Markus 5:21-25) Jesus okwa li e linyenga ngahelipi kekemo laJairus lokukwafela okamonakadona kaye oko ke na ashike omido 12 noke na ondilo kuye? — Lukas 8:42.

Jesus okwa li a shakeneka onghalo vali imwe ofimbo a li mondjila a yuka keumbo laJairus. Ovanhu ovo va li va waimina Jesus ova li va hafa, nova li tave lipula ngeenge otave ke mu mona ngoo vali ta longo oshikumwifilonga. Ndele nande ongaho, omukainhu umwe oo a li mokati kovanhu okwa li ashike ta yandje elitulemo koupyakadi waye u na sha noukolele.

Omukainhu oo Omujuda okwa kala ta mono oixuna ketiko lohonde oule womido 12. Okwa li a ka konga ekwafo kovahakuli vahapu nokwa manena mo oiniwe yaye aishe. Ashike ka li a mona ekwafo lasha. Ndele ponhele yokuxwepopala, “onghalo yaye oya naipala ashike.” — Markus 5:26.

Ponhele omukifi oo u mu nghundipaleke, owa li we mu fifa ohoni. Shimwe vali, ka li ta dulu okupopya a manguluka shi na sha noudu waye. Ashike koshi yOmhango yaMoses, etiko lohonde ola li hali ningifa omukainhu a kale ina koshoka. Keshe oo a li te mu kumu ile ta kumu oikutu yaye oyo i na ohonde okwa li a pumbwa okulikosha noha kala ina koshoka fiyo okonguloshi. — Levitikus 15:25-27.

Omukainhu oo okwa li a “uda onghundana i na sha naJesus,” nokwa li te mu kongo. Molwaashi kali a koshoka, okwa li a pita meemhunga dovanhu opo aha monike, ndele te lipopile ta ti: “Ngeenge onda kwata ashike koshikutu shaye shokombada, ohandi veluka.” Eshi a kwata koshikutu shaJesus, etiko lohonde ola li la oka diva. Okwa li a “veluka koudu oo wa kala noku mu hepeka neenghono.” — Markus 5:27-29.

Opo nee Jesus okwa li a pula a ti: “Olyelye a kuma nge?” Omukainhu oo okwa li e linyenga ngahelipi eshi Jesus a pula ngaho? Petrus okwa li a nyamukula Jesus a ti: “Owa dingililwa keengudu dovanhu notadi lifininike mwoove.” Mbela omolwashike Jesus a pula a ti: “Olyelye a kuma nge?” Jesus okwa ti: “Ope na umwe a kuma nge, osheshi ondi udite mwaame mwa dja eenghono.” (Lukas 8:45, 46) Oshoshili kutya eshi omukainhu oo a velulwa, muJesus omwa li mwa dja eenghono.

Eshi omukainhu oo a mona kutya okwa monika, okwa li a twa eengolo puye a tila ta kakama. Okwa li a popya oshili moipafi yaaveshe shi na sha noudu waye, nonokutya okwa veluka. Jesus okwe mu lombwela a ti: “Omumwangekadona, eitavelo loye ole ku velula. Inda nombili, osheshi owa veluka koudu oo wa li we ku hepeka neenghono.” — Markus 5:34.

 Oshoshili kutya oo a hoololwa kuKalunga a pangele edu oku li nawa noku na onghenda, ke na ko nasha ashike novanhu ndele oku na yo eenghono doku va kwafela.