Fimbo Jesus a li muJerusalem koshivilo shOpaasa mo 30 O.P., okwa li a longa oikumwifilonga i didilikwedi. Oshidjemo, ovanhu vahapu ova li ve mu itavela. Omufarisai wedina Nikodemus, oo a li oshilyo shOmhangu yoPombada yOvajuda, okwa li a kumwa. Okwa li a hala okuuda shihapu nokwa li a ya kuJesus oufiku molwaashi tashi dulika a li a tila okukakeka edina laye ngeenge okwa monika kovawiliki vamwe Ovajuda.

Nikodemus okwa tya kuye: “Muhongi, otu shi shii kutya ove omuhongi a dja kuKalunga, osheshi kaku na omunhu ta dulu okulonga oikumwifilonga oyo to longo, okuninga a pewa eenghono kuKalunga.” Jesus okwa nyamukula Nikodemus kutya opo omunhu a ye mOuhamba waKalunga, oku na ‘okudalululwa.’ — Johannes 3:2, 3.

Mbela ongahelipi omunhu ta dulu okudalululwa? Nikodemus okwa pula a ti: “Mbela ota dulu ngoo okushuna moshidalelo shaina ndele ta dalwa vali?” — Johannes 3:4.

Ahowe, okudalululwa hasho sha hala kutya ngaho. Jesus okwe mu yelifila a ti: “Kape na ou ta dulu okuya mOuhamba waKalunga okuninga ta dalwa okupitila mokuninginifwa momeva nokupewa omhepo iyapuki.” (Johannes 3:5) Eshi Jesus a ninginifwa, omhepo iyapuki oya li ye uya kombada yaye, nokungaho okwa li a dalwa eshi a ninginifwa “momeva nokupewa omhepo iyapuki.” Diva konima eshi Jesus a dja koshi yomeva, meulu omwa dja ondaka tai ti: “Ou Omona wange, omuholike, ou nde mu hokwa.” (Mateus 3:16, 17) Kungaho, Kalunga okwa ulika kutya okwa dalulula Jesus, meityo lopamhepo, opo monakwiiwa a dule okuya mOuhamba womeulu. POpentekoste yomo 33 O.P., ovo va li va ninginifwa ova li va tililwa omhepo iyapuki, nokungaho ova li va dalululwa ve li ovana vaKalunga vopamhepo. — Oilonga 2:1-4.

Osha li shidjuu kuNikodemus okuuda ko osho Jesus a li te mu hongo kombinga yOuhamba. Opo nee Jesus okwe mu yelifila ouyelele wa wedwa po u na sha nonghandangala oyo ta dana e li Omona waKalunga wopanhu. Jesus okwa tya kuye: “Ngaashi Moses a li a endjelelifa eyoka mombuwa, Omona womunhu naye ota ka endjelelifwa, opo keshe ou te mu itavele a ka mone omwenyo waalushe.” — Johannes 3:14, 15.

Ngeenge Ovaisrael ova lika keyoka olo li na oudiyo, ova li ve na okutala kodibo oko ku na eyoka loshikushu opo vaha fye. (Numeri 21:9) Sha faafana, ovanhu aveshe ova pumbwa okuulika eitavelo mOmona waKalunga opo va vaha fye moulunde nova ka mone omwenyo waalushe. Opo Jesus a divilike ohole yaKalunga, okwa li a lombwela Nikodemus a ti: “Molwaashi Kalunga oku hole ounyuni neenghono, okwa yandja Omona waye ewifa, opo keshe ou te mu itavele aha hanaunwe po ndele a ka mone omwenyo waalushe.” (Johannes 3:16) Onghee hano, konima yeemwedi hamano eshi Jesus a hovela oukalele waye muJerusalem, okwa li a yelifa kutya oye ondjila oyo tai twala komwenyo waalushe.

Jesus okwa lombwela Nikodemus a ti: “Kalunga ina tuma Omona waye mounyuni e u tokole.” Osho osha hala kutya ka li a tumwa a tokole ovanhu nonyanya kutya aveshe otava ka hanaunwa po. Ponhele yaasho, okwa yelifa kutya okwa li a tumwa “opo ounyuni u vaha fye okupitila muye.” — Johannes 3:17.

Nikodemus okwa li a tila ovanhu nomolwaasho a li a ya kuJesus oufiku opo aha monike. Jesus  okwa lombwela Nikodemus oshinima shihokwifa pexulilo leenghundafana davo a ti: “Onghee ouyelele owe uya mounyuni, ndele ovanhu ponhele yokukala ve hole ouyelele, ove hole omilaulu shaashi oilonga yavo oii, nomolwaasho otava ka tokolwa. Keshe ou ha longo owii oku tonde ouyelele, noihe uya pouyelele opo oilonga yaye iha monike. Ndele keshe ou ha longo osho sha yuka ohe uya pouyelele, opo oilonga yaye i monike kutya oi li metwokumwe nehalo laKalunga.” — Johannes 3:19-21.

Osha li momake a Nikodemus, oo e li Omufarisai nomuhongi waIsrael, a dilonge kwaasho a uda kuJesus shi na sha nonghandangala oyo ta dana mokuwanifwa kwelalakano laKalunga.