Jesus novahongwa vaye ova li va dja mo muJerusalem konima eshi va dana oshivilo shOpaasa mo 30 O.P., osho sha li pefimbo lokwenye. Ashike kava li va shuna keumbo lavo kuGalilea. Ova li va ya muJudea omo va ninginifa vahapu. Johannes Omuninginifi okwa kala ta longo oshilonga osho hanga oule wodula, novahongwa vaye vamwe ova li pamwe naye natango, tashi dulika mefilu lomulonga waJordan.

Jesus ka li a ninginifa nande oumwe, ashike ovahongwa vaye ova li ve shi ninga koshi yewiliko laye. Pomhito oyo, Jesus naJohannes ova li tava hongo Ovajuda ovo ve lidilulula eshi va li omhinge nehangano lOmhango yaKalunga. — Oilonga 19:4.

Ovahongwa vaJohannes ova li va twila ondubo Jesus, ndele tava lombwele Johannes tava ti: “Omulumenhu winya [Jesus] wa li naye . . . ota ninginifa, novanhu aveshe otava i kuye.” (Johannes 3:26) Ashike Johannes ka li e mu twila ondubo. Okwa li a hafa eshi Jesus a pondola, nokwa li a hala ovahongwa vaye navo va kale va hafa. Opo nee Johannes okwa li e va dimbulukifa a ti: “Omwa uda eshi nda popile kutya, ‘Ame haame Kristus, ndele Kalunga okwa tuma nge ndi tetekele Kristus.’” Okwa li a yelifa oshitwa monghedi omo aveshe tava dulu okuuda ko, eshi a ti: “Keshe oo e na omuhombolwa oye omuhomboli. Ndele kaume komuhomboli ngeenge e li ofika popepi naye ndele ta udu ta popi, oha kala a hafa unene. Onghee naame onda hafa unene.” — Johannes 3:28, 29.

Eemwedi da tetekela, Johannes, oo e li ngaashi kaume komuhomboli, okwa li a lombwela ovahongwa vaye nehafo kombinga yaJesus. Ovahongwa vaye vamwe ova li va shikula Jesus, nolwanima ova li tava ka vaekwa nomhepo iyapuki. Johannes okwa li yo a hala ovahongwa vaye ovo va li po pefimbo olo va shikule Jesus. Ndele elalakano laJohannes ola li okulongekidila Kristus ondjila. Opo nee Johannes okwa ti: “Oilonga yaye otai hapupala ofimbo yange tai ninipala.” — Johannes 3:30.

Johannes umwe vali, oo a li a ninga omushikuli waJesus, lwanima, okwa ka shanga kombinga youdilo waJesus nosho yo onghandangala oyo ta dana shi na sha nexupifo lovanhu, a ti: “Ou a dja pombada oku dule vakwao aveshe. . . . Xe oku hole Omona nokwa yandja oinima aishe momake aye. Keshe ou a itavela Omona oku na omwenyo waalushe, ashike ou iha dulika kOmona ita ka mona omwenyo, ndele ota ka hangwa kehandu laKalunga.” (Johannes 3:31, 35, 36) Ovanhu ova pumbwa okulihonga oshili oyo ya fimana.

Johannes Omuninginifi okwa li a kwatwa po kohamba Herodes diva ashike eshi a popya shi na sha nonghandangala yaye nosho yo oilonga yaye kutya oi na okuninipala. Herodes okwa li a kufa po Herodias, omukulukadi wamumwaina Filippus, ndele te mu hombola po. Eshi Johannes a li a popya moipafi shi na sha nenyono olo, Herodes okwa li e mu tula modolongo. Eshi Jesus a uda kutya Johannes okwa kwatwa po, okwa dja mo novahongwa vaye muJudea ndele tava i “kuGalilea.” — Mateus 4:12; Markus 1:14.