Onda dalelwa moAcul, odolopa oyo ye likalela i li kouninginino weemhunda da Guatemala. Oukwaneumbo wetu owa dja momuhoko wOvaixil, omuhoko oo wa dja moludalo lOvamaya. Nonande onda li handi popi elaka lOshispanish, onda putuka handi popi elaka letu loshidalelwamo. Pefimbo olo da dalwa, moGuatemala omwa kala mu na oita yopaiwana oule womido 36. Pefimbo olo Ovaixil vahapu ova li va dipawa.

Eshi nda li ndi na omido nhee, omukulu wange, oo a li e na omido heyali, okwa li ta danauka noboma, ndele tai topa. Onda kanifa omesho ange moshiponga osho; shinyikifa oluhodi omukulu wange okwa fya. Onghee, okudja kounona wange onda kala handi di monhele omo hamu kala ounona vovapofi moGuatemala; oko nde lihonga okulesha eendada doshipofi. Shikwao vali, kanda li ndi shii kutya omolwashike ovanailonga va li va indika nge ndiha popye nounona vakwetu, nounona vakwetu ova li nokuli hava henuka okweendafana naame. Onda li handi kala ndi udite ndi li aame andike, nonda li handi kala nda djuulukwa okuya keumbo oule weemwedi mbali kumeme oo a li ha kenukile nge nokuulikila nge ohole. Shinyikifa oluhodi, eshi nda li ndi na omido omulongo, meme okwa xulifa. Onda li ndi udite nda kanifa omunhu oo a li e hole nge neenghono shi dulife ovanhu aveshe mounyuni; onda li nda lyalyakana neenghono.

Eshi nda li ndi na omido 11, onda li nda shuna kodoolopa oko nda dalelwa nonda li handi di nomukulu wange nosho yo oukwaneumbo wavo. Ova li hava file nge oshisho palutu, ashike kava li tava dulu okukwafela nge pamaliudo. Omafimbo amwe, onda li handi lili nokupula Kalunga kutya: “Omolwashike meme a fya? Omolwashike ndi na okukala omupofi?” Ovanhu ova li hava lombwele nge kutya oinima oyo oya li ehalo laKalunga. Onda li nda fika pexulifodiladilo kutya Kalunga ke na onghenda noke li omuyuki. Etomheno molwaashi inandi likufa omwenyo ololo kutya kanda li ndi na nghee ndi na oku shi ninga.

Oupofi owa etela nge ounghundi wopalutu nowopamaliudo. Eshi nda li okamatyona, onda li nda hepekwa pamilele lwoikando. Kanda li nda lopota omunyonena oo, molwaashi onda li handi diladila kutya kape na ou e na ko nasha. Ovanhu kava li hava popi naame naanaa, onghee naame kanda li handi popi nomunhu. Onda li handi kala nde likalela, nda polimana nokanda li nde lineekela omunhu.

Eshi nda li omunyasha, ovalihomboli vavali vEendombwedi daJehova ova li ve uya kwaame pefimbo lokafudepo kofikola yetu. Omuhongi umwe pofikola yetu, oo a li e na ko nasha nonghalo yange, oye a li e va pula va talele nge po. Ova li va lombwela nge kutya Ombiibeli oya udaneka kutya ovafi otava ka nyumunwa nosho yo kutya efiku limwe ovapofi otava ka mona ko vali. (Jesaja 35:5; Johannes 5:28, 29) Onda li ndi hole osho va honga nge, ashike osha li shidjuu kwaame okupopya navo, molwaashi kanda li nda ikilila okupopya novanhu. Nonande onda li handi kala nde limwenena nokulikalela, ova li ve lididimika nokutwikila okutalela nge po opo va honge nge kombinga yOmbiibeli. Ovalihomboli ovo ova li hava ende eekilometa 10 lwaapo tava tauluka eemhunda opo ve uye kodoolopa yetu.

Omukulu wange okwa li a lombwela nge kutya ovanhu va tya ngahelipi nonokutya ohava djala va fewa nonande oikutu yavo kaya li yondilo. Ndele nande ongaho, ova li alushe hava ulikile nge kutya ove na ko nasha naame mokweetela nge eeshali. Onda li ndi udite kutya Ovakriste vashili ovo ashike tava dulu okuninga omaliyambo a tya ngaho.

Onda konakona Ombiibeli noishangomwa i li meendada doshipofi. Nonande onda li ndi udite ko osho nda li handi lihongo, osha li shidjuu kwaame okutambula ko oinima imwe pamaliudo. Pashihopaenenwa, osha li shidjuu kwaame okwiitavela kutya Kalunga oku na ko nasha naame pauhandimwe nosho yo kutya vamwe ove na yo ko nasha naame, ngaashi ashike Kalunga. Onda li ndi udite ko kutya omolwashike Jehova a efa oukolokoshi u kale ko, ashike osha li shidjuu kwaame oku mu tala ko e li shili Tate omunahole. *

Lwanima,osho nde lihongo mOmishangwa osha kwafela nge ndi lundulule etaleko lange. Pashihopaenenwa, onde lihonga kutya Kalunga oha kala e uditile ovo tava mono oixuna oukwao wananghali. Ngeenge tashi uya povalongeli vaye ovo va li hava ungaungiwa navo nai, Kalunga okwa ti: “Ame onda mona okuhepekwa kwoshiwana shange . . . Ondi wete oudjuu wavo.” (Exodus 3:7) Eshi nda hovela okudilonga komaukwatya aJehova, osha li she linyengifa nge ndi mu liyapulile. Onda ninginifwa ndi li umwe womEendombwedi daJehova mo 1998.

Momukokomoko wodula oyo nda ninginifwa, onda li nda ya kofikola yovapofi modoolopa yaEscuintla. Omukulunhuongalo womoshitukulwa sheongalo omo, okwa li a uda omashongo oo nda li nda taalela okuuya kokwoongala modoolopa omo handi kala. Eongalo olo la li popepi naame ololo li li oshinano sha faafana naasho sha li hashi endwa kovalihomboli ovo va li have uya okukonakona naame, naasho osha li shidjuu kwaame okweenda oshinano osho. Opo a kwafele nge, omukulunhuongalo oo okwa li a unganeka opo ndi kale handi di noukwaneumbo umwe moEscuintla, oo tau dulu okukwafela ndi kale handi i kokwoongala. Fiyo opaife, ohava file nge oshisho onga oshilyo shoukwaneumbo wavo.

Ondi na oihopaenenwa ihapu i na sha nanghee oilyo yeongalo ya ulikila nge ohole yashili. Oimoniwa oyo oya kwafela nge ndi kale nda tomhwa kutya, ndi li umwe mEendombwedi daJehova, ondi li mokati kOvakriste vashili. — Johannes 13:34, 35.

Kandi udite vali ndihe na oshilonga nondihe na eteelelo lasha. Paife onghalamwenyo yange oi na eityo. Ndi li omulongi wefimbo li yadi moilonga yokuhonga ovanhu Ombiibeli, ohandi yandje elitulemo kokukwafela vamwe ve lihonge oshili yOmbiibeli ponhele yokuyandja elitulemo kounghundi wange. Ondi na yo oufembanghenda wokukala omukulunhuongalo, nohandi yandje oipopiwa yomoipafi momaongalo omoshitukulwa. Onda mona yo oufembanghenda wokuyandja oipopiwa koshoongalele shoshitukulwa oko haku kala ovanhu omayovi.

Mo 2010, onda galaduweita kOfikola yOkudeula mOukalele (oyo paife hai ifanwa Ofikola yOvaudifi vOuhamba) moEl Salvador. Ofikola oyo oya kwafela nge ndi dule okuwanifa po oinakuwanifwa yange meongalo shi dulife nale. Edeulo olo ola kwafela nge ndi kale ndi udite lela kutya Jehova okwa lenga nge noku hole nge.

Jesus okwa ti: “Okuyandja ohaku eta ehafo shi dulife okupewa.” (Oilonga 20:35) Paife, ohandi dulu okutya onda hafa shili, nonande nale kanda li ndi wete osho tashi shiiva; paife ondi udite kutya ohandi dulu okukwafela vamwe.