OSHIPALANYOLE SHOKOMBADA | KALUNGA OKU NA KO NGOO NASHA NAAVE?
Kalunga okwa hala u kale nekwatafano naye
“Kape na ou ta dulu okuuya kuame okuninga Tate, ou a tuma nge, te mu shili.” — JOHANNES 6:44.
OMOLWASHIKE VAMWE VE LI MOMALIMBILILO: Ovanhu vahapu ovo va itavela muKalunga ove udite kutya oku li kokule navo. Omukainhu umwe wedina Christina wokoIreland, oo ha i kongeleka oshivike keshe, okwa ti: “Onde mu tala ko ashike eli Kalunga oo a shita oinima aishe. Ashike nghi mu shii. Nghi na fiku nda kalele ndi udite ndi na ekwatafano naye.”
OSHO EENDJOVO DAKALUNGA TADI HONGO: Ngeenge tu udite twa fa tuhe nekwafo la sha, Jehova iha efa oku tu kwafela. Jesus okwa li a longifa efaneko eli opo a ulike nghee Kalunga e na ko nasha nafye, a ti: “Ngenge ku nomunhu e needi efele limwe, ndele imwe yomudo tai kana, ita fii po ngeno keemhunda odo 99 ndee ta ka konga inya ya kana?” Oshike hatu lihongo mo mefaneko olo? “Osho tuu kashi fi ehalo laXo yeni meulu, pa kane nande okamwe komuava vanini.” — Mateus 18:12-14.
Keshe ‘kamwe komuava vanini’ oke na ondilo kuKalunga. Ongahelipi Kalunga ha “ka konga inya ya kana”? Pamushangwa oo wa tofwa pehovelo loshitukulwa eshi, Jehova oha shilile ovanhu kuye.
Kunena oolyelye hava talele po ovanhu momaumbo avo nomeenhele daaveshe opo va kundafane navo etumwalaka lOmbibeli li na sha naKalunga?
Natu ka tale kunghee Kalunga ha katuka eenghatu opo a shilile ovanamitimadiwa kuye. Mefelemudo lotete O.P., Kalunga okwa li a tuma Omukriste omuhongwa Filippus a ka shakeneke elenga lokuEtiopia olo la li metemba nokukundafana nalo eityo lexunganeko lOmbibeli olo elenga la li tali lesha. (Oilonga 8:26-39) Lwanima, Kalunga okwa li a lombwela omuyapostoli Petrus a ye keumbo lomunefele Omuroma wedina Kornelius oo a kala ha ilikana noha kendabala okulongela Kalunga. (Oilonga 10:1-48) Kalunga okwa li yo a wilika omuyapostoli Paulus novaendi pamwe naye va ye komulonga u li kondje yoshilando shaFilippi. Ova li va shakeneka ko omukainhu omutilikalunga wedina Lidia ‘nOmwene okwa yeulula omutima waye opo a tambule ko odo da tongwa.’ — Oilonga 16:9-15.
Pomhito keshe, Jehova okwa li a shilipaleka kutya ovo tave mu kongo ova mona omhito yoku mu shiiva. Oolyelye kunena hava talele po ovanhu momaumbo avo nomeenhele daaveshe opo va kundafane navo etumwalaka lOmbibeli li na sha naKalunga? Vahapu otashi dulika va tye, “Eendombwedi daJehova.” Lipula kutya, ‘Mbela Kalunga haye nande te va longifa va kwafele nge ndi kale ndi na ekwatafano naye?’ Ohatu ku ladipike u ilikane kuKalunga e ku kwafele u katuke metwokumwe neenghendabala daye doku ku shilila kuye. a
a Opo u mone ouyelele muhapu, tala okavidio Omolwashike u na okukonakona Ombibeli? ko-www.isa4310.com/kj.
Otashi dulika yo u hafele oikundafanwa ei
KOMBINGA YETU
Omolwashike u na okukonakona Ombibeli?
Ombibeli otai kwafele ovanhu omamiliyona mounyuni aushe va mone omanyamukulo omapulo oo a fimanenena monghalamwenyo. mbela ino hala okukala umwe womuvo?
