Opulaneta yetu oya shitwa monghedi omo taku dulu okukala oinima i na omwenyo. Oi yadi omeva mahapu oo a pumbiwa koishitwa opo i dule okukala nomwenyo. Onghedi omo edu hali dingonoka nosho yo okukala medingonokondjila li li mondjila ohashi kwafele omeva efuta aha ninge oikangwameva ile aha kale taa fuluka. Ewangadjo nosho yo eenghono domangenete edu ohadi kwafele edu liha lungwine po koitandu ya nyika oshiponga oyo hai u mewangadjo. Onghedi omo oimeno nosho yo oinamwenyo hai longele kumwe oikumwifi shili. Onghee hano, ovanhu vahapu ova fika pexulifodiladilo kutya edu ola shitwa nelalakano. — Lesha Jesaja 45:18.

Ndele otashi dulika u lipule kutya, ‘mbela okumona oixuna nokuhenouyuki nako oshitukulwa shelalakano olo?’ — Lesha Deuteronomion 32:4, 5.

Edu ola li la shitwa nelalakano opo li kale onhele ihafifa yovanhu ovo hava fimanekafana nove hole Omushiti wavo. Ovanhu ova shitwa nelalakano li dule loimeno noinamwenyo. Ohatu dulu okushiiva kutya Omushiti wetu olyelye, okukala twe mu lenga nokuhopaenena ohole nouyuki waye. — Lesha Omuudifi 12:13; Mika 6:8.

Omushiti wetu ota dulu okuwanifa po omaudaneko aeshe oo a lalakanena. Onghee hano, ohatu dulu okukala noushili oo kutya ota ka xulifa po okumona oixuna, okuhenouyuki nokuninga opulaneta yedu i kale onhele yovanhu va hafa nova wanenena. — Lesha Epsalme 37:11, 29; Jesaja 55:11.