Onda putukila muWarialda, odoolopa inini i li moNew South Wales. MuWarialda omu na ovanhu vamwe hava munu eedi, vamwe eengobe navamwe ohava longo oilikolomwa yomepya i lili noku lili. Odoolopa oyo oya koshoka nokamu na naanaa ekaulonyanga.

Molwaashi ame aame shiveli nonda shikulwa kounona omulongo, eshi nda li ndi na omido 13, onda li nda hovela okulonga oilonga yokulikongela omboloto opo ndi kwafele oukwaneumbo wetu. Molwaashi kanda li nda mona ehongo lela, onda li ashike nda mona oilonga yokulonga meefaalama. Eshi nda li ndi na omido 15, onda li handi longo oilonga yokudeula eenghambe domofuka.

Okulonga mofaalama osha li shi na ouwa nowii. Ashike onda li handi hafele lela oilonga nosho yo omudingonoko. Onda li handi kala omutumba pomundilo oufiku handi tale omwedi neenyofi nokuuda omadimba oixwa oo taa etwa kokamhepo kokonguloshi. Ohandi dimbuluka efiku limwe eshi nda li handi diladila kutya ope na okukala Umwe oo a shita oinima aishe oyo ikumwifi. Kakele kaasho, meefaalama omwa li yo mu na enwefemo lii. Onda li alushe handi udu ovanhu tava tukana notava shili omakaya. Okudja opo okushila omakaya nokutukana okwa ninga oshitukulwa shonghalamwenyo yange.

Eshi nda wanifa omido 18, onda li nda tembukila kuSydney. Onda li nda hala okuya moukwaita ashike kanda li nda tambulwa molwaashi inandi mona lela ehongo. Onda li nda mona oilonga ndele handi kala muSydney oule womudo. Omudo oo oo nda shakena nEendombwedi daJehova oshikando shotete. Onda li nda dimina okuya kokwoongala kwado kumwe nonda li nda didilika diva kutya omahongo ado ooshili.

Efimbo lixupi konima yaasho, onda li nda tokola opo ndi shune kofaalama. Ndele onda ka ya ashike kodoolopa yedina Goondiwindi, moQueensland. Onda li nda mona oilonga, handi hombola, ashike mupya munene onda li yo nda hovela okunwa sha pitilila.

Omukulukadi wange okwa li a mona ounona vavali. Konima yokudalwa kwovanamati vetu, onda li nda hovela okudiladila da mana mo kutya onghalamwenyo yange oya yuka peni. Onda li  nda dimbuluka osho nda udile kokwoongala kwEendombwedi muSydney, nonda li nda tokola okuninga po sha kombinga yaasho.

Onda li nda mona oshifo shOshungonangelo shikulu, omo mu na ondjukifi yoshitaimbelewa shEendombwedi daJehova muAustralia. Onda li nda shangela ko onhumwafo, handi pula ndi kwafelwe. Ondombwedi inahole noinalukeno oya li ya talela nge po. Diva konima yaasho, oya li ya hovela okukonakona Ombibeli naame.

Eshi nda li handi konakona Ombibeli, onda li nda mona kutya onda pumbwa okuninga omalunduluko manene monghalamwenyo yange. Ovelishe yOmbibeli imwe oyo ya li unene ya kuma nge 2 Ovakorinto 7:1. Ovelishe oyo oye tu ladipika tu ‘likosheni kedilo keshe lombelela.’

Onda li nda tokola opo ndi efe po okushila omakaya nokunwa omalodu sha pitilila. Kasha li shipu okuninga omalunduluko a tya ngaho, molwaashi onda kala ndi na onghedindjikilile ya tya ngaho oule wefimbo lile. Ndele onda li nda tokola toko opo ndi kale nonghedi yokukalamwenyo oyo tai hafifa Kalunga. Osho sha kwafela nge unene okutula moilonga efinamhango olo li li mOvaroma 12:2 tali ti: “Inamu fafana nounyuni ou, ndelenee shitukeni vape momadiladilo eni.” Onda didilika kutya opo ndi efe po eenghedindjikilile dange donale, onda li ndi na okulundulula omadiladilo ange nokutala ko eenghedindjikilile da tya ngaho kutya oda nyika oshiponga ngaashi Kalunga e di tala ko. Kekwafo laKalunga onda efa po okushila omakaya nokunwa omalodu sha pitilila.

Osho sha li eshongo unene kwaame, okweefa po okutukana. Ondi shii kutya Ombibeli oya yandja omayele oo e li mOvaefeso 4:29 taa ti: “Momakanya eni mu ha pite nande ondjovo ya nyata.” Ndele nande ongaho, osha li sha pula nge efimbo lile opo ndi lundulule onghedi yange yokupopya inai koshoka. Onda kwafelwa kokudilonga keendjovo odo di li muJesaja 40:26. Ovelishe oyo oya popya shi na sha neenyofi ya ti: “Yeluleni omesho eni pombada, nye mu tale: Olyelye a shita oinima ei? Oye tuu ou ta pitifa mo eengudu dayo da wana komuvalu wado. Oye ote i ifana aishe komadina ayo; eenghono daye odinene, nokudula kwaye okuhapu, kape na nande shimwe, tashi mu koyelele po.” Onde lipula kutya ngeenge Kalunga oku na eenghono dokushita eshito linenenene, olo ndi hole okutala kulo, nopehe na omalimbililo, ota ka pa nge eenghono ndi dule okuninga omalunduluko opo ndi mu hafife. Omolwokwiilikana nda mana mo nokuninga eenghendabala, onda li nda dula okupangela elaka lange mokweendela ko kwefimbo.

Molwaashi onda li handi deula eenghambe, kanda li lela ndi na omhito yokupopya novanhu shaashi meefaalama omo nda li handi longo kamwa li naanaa mu na ovanhu vahapu. Ndele okupitila medeulo olo hali yandjwa pokwoongala kwEendombwedi daJehova, onda li nde lihonga nghee ndi na okuninga eenghundafana novanhu. Edeulo olo ola kwafela nge ndi dule okulombwela vamwe onghundana iwa yOuhamba waKalunga. — Mateus 6:9, 10; 24:14.

Ohandi hafele okuyakula meongalo ndi li omukulunhuongalo momukokomoko womido donhumba da pita. Oshi li oufembanghenda kwaame okuninga ngaashi handi dulu opo ndi kwafele ovaitaveli vakwetu. Ndele enangeko noupuna linenenene kwaame okulongela Jehova twa hangana pamwe nomukulukadi wange omudiinini nomunahole nosho yo ovana vetu.

Ohandi pandula Jehova eshi a pitika nge ndi hongwe kuye nonande inandi mona lela ehongo lomounyuni. (Jesaja 54:13) Onda dimina filufilu eendjovo odo di li mOmayeletumbulo 10:22, odo tadi ti: “Enangeko noupuna lOmwene, olo tali likolifa.” Ame noukwaneumbo wange otwa teelela nodjuulufi okulihonga shihapu kombinga yaJehova noku mu longela fiyo alushe.