Mbela efyo oli na eenghono li dule Kalunga? Hasho nandenande! Ongahelipi efyo ile “omutondi” umwe vali ta dulu okukala e na eenghono e dule ‘Kalunga Omunamapangelo aeshe’? (1 Ovakorinto 15:26; Exodus 6:3) Kalunga oku na eenghono dokumangulula ovanhu mefyo okupitila menyumuko, nokwa udaneka kutya ota ka ninga ngaho mounyuni mupe. a Mbela eudaneko olo oli shii ngoo okulineekelwa? Omona waKalunga, Jesus okwa longifa omautumbulilo oo tae tu kwafele tu kale tu na eteelelo. — Lesha Mateus 22:31, 32.

Eshi Jesus a li ta popi nOvasadukai ovo inava itavela menyumuko, okwa ti: “Mokupopya enyumuko lovafi, hamba, inamu lesha odo mwe di lombwelwa kuKalunga eshi ta ti: Aame Kalunga kaAbraham naKalunga kaIsak naKalunga kaJakob? Kalunga Oye ke fi Kalunga koonakufya, ndelenee okovanamwenyo.” Pomhito opo Jesus okwa li ta popi shi na sha neenghundafana odo da li pokati kaKalunga naMoses poshixwa sha tema, pa pita paife omido 3 500 lwaapo. (Exodus 3:1-6) Jesus okwa ti Jehova okwa lombwela Moses kutya ‘oye Kalunga kaAbraham, Kalunga kaIsak naKalunga kaJakob,’ osho tashi ulike kutya eudaneko lenyumuko otali ka wanifwa shili. Ngahelipi mbela?

Natu konakoneni tete oshikalimo. Pefimbo opo Jehova a li ta popi naMoses, tatekulululwa Abraham, Isak naJakob ova hangwa va fya nale pa pita efimbo lile. Abraham okwa hangwa a fya pa pita omido 329, Isak 224 ofimbo Jakob 197. Ndele nande ongaho, Jehova okwa ti “Aame” Kalunga kavo, ashike ina tya “onda li” Kalunga kavo. Jehova okwa popya shi na sha nootatekulululwa vatatu ovo va fya va fa natango ve na omwenyo. Omolwashike mbela?

Jesus okwa ti: “Kalunga [Jehova] Oye ke fi Kalunga koonakufya, ndelenee okovanamwenyo.” Eendjovo odo daJesus otadi tu kwafele tu ude ko oshinima sha fimana shi na sha nenyumuko. Ngeenge ka ku na enyumuko, Abraham, Isak naJakob otava kala ashike moshovafi fiyo alushe. Ndele ngeenge ngeno osho ngaho, Jehova oKalunga kovafi. Naasho ngeno osha hala okutya efyo oli na eenghono li mu dule, sha fa ngeno kutya ke na eenghono dokumangulula ovapiya vaye ovadiinini meemango defyo.

Otu na okufika pexulifodiladilo lilipi shi na sha novapiya vaJehova aveshe ovadiinini ovo va fya, mwa kwatelwa Abraham, Isak, naJakob? Jesus okwa ti: “Aveshe ove nomwenyo moku mu kalela.” (Lukas 20:38) Otu na oushili kutya elalakano laJehova lokunyumuna ovapiya vaye ovadiinini otali ka wanifwa po shili molwaashi okwe va tala ko va fa ve na omwenyo. (Ovaroma 4:16, 17) Jehova ota kaleke momadiladilo ovadiinini vaye aveshe ovo va fya fiyo osheshi efimbo laye loku va alulila momwenyo la fika.

Mbela etimaumbwile loku ka hangana vali novaholike vetu ovo va fya otali ti sha ngoo kwoove? Ngeenge osho, dimbuluka kutya Jehova oku na eenghono dinenenene e dule efyo. Kape na osho tashi dulu oku mu imba a wanife po eudaneko laye lokunyumuna oonakufya. Omolwashike ito lihongo shihapu shi na sha neudaneko lenyumuko nosho yo kombinga yaKalunga oo te ke li wanifa po? Okuninga ngaho otaku ke ku ehenifa popepi elela naJehova, ‘Kalunga kovanamwenyo.’