Eshi ovakokolindjila vamwe vali va shivwa meumbo lonhumba moKenya, ova li va kumwa eshi va mona omulumenhu umwe wokalutu nouwooko vanini neenghono a nangala pombete. Eshi ve mu leshela shi na sha neudaneko laKalunga olo kutya “oshingudu otashi ka nuka ngaashi omenye,” okwa li e limemesha. — Jes. 35:6.

Ovakokolindjila ovo ova li va uda kutya Onesmus, oo paife e na omido 30 nasha, okwa dalwa noudu womakipa inaa kola. Omakipa aye omapu neenghono nohaa dulu okuteka shimha a diininwa ashike nande okanini. Molwaashi kape na ouhaku womukifi oo, Onesmus okwa kala e shii kutya ota kala ashike mokatemba kaye nouyahame waye onghalamwenyo yaye aishe.

Onesmus okwa li a tambula ko ekonakonombibeli. Ashike ina ka li e mu pitika a ye kokwoongala kwopaKriste, molwaashi vati otashi dulika a mone oshiponga ile shi wedele ko kouyahame waye. Onghee hano, ovamwatate ova li hava kwata oipopiwa oyo ya kundafanwa pokwoongala ndele tava twaalele Onesmus keumbo a ka pwilikine. Konima eshi a konakona oule weemwedi nhano, okwa li a tokola a ye kokwoongala kashi na nee mbudi kutya pamwe osha nyika oshiponga.

Mbela okuya kokwoongala okwa li kwa wedela ko kouyahame waOnesmus? Hasho nandenande. Okwa ti: “Ouyahame oo nda kala nao owa li hau shuna pedu ngeenge ndi li pokwoongala.” Okwa li e wete kutya eteelelo lonakwiiwa olo le mu kwafela a kale e li xwepo. Ina yaOnesmus okwa li a hafa eshi a mona elunduluko momaliudo omonamati naasho oshe mu linyengifa a tambule ko ekonakonombibeli. Okwa li a popya ta ti: “Okulongela Kalunga oko ouhaku womumwangemati.”

Lwanima, Onesmus okwa ka ninga omuudifi ina ninginifwa. Opo nee okwa ka ninginifwa, nopaife oku li omuyakuliongalo. Nonande omaulu aye ihaa longo nosho yo okwooko kaye kamwe, Onesmus okwa kala a halelela okuninga keshe osho ta dulu moilonga yaJehova. Okwa li a hala okukufa oukwafelikokolindjila, ndele okwa kala ta ongaonga okuninga eindilo. Omolwashike mbela? Okwa li e shii kutya okwa pumbwa umwe oo ta kala ha undula okatemba kaye. Eshi a li eshi lombwela Ovakriste vakwao, ova li ve mu udanekela kutya otave ke mu kwafela. Naasho osho va li va ninga.

Onesmus okwa ka kala vali a hala a ninge omukokolindjila wondjikilile, ashike natango okwa li te lipula kutya olyelye ta ka undula okatemba kaye. Ndele pomhito imwe, okwa li a lesha omushangwa wefiku oo wa li we mu ladipika. Owa li wa kanghamena kEpsalme 34:9 olo tali ti: “Makeleni, nye mu tale ouwa wOmwene apa u fike.” Konima eshi a dilonga komushangwa oo, okwa tokola a ninge omukokolindjila wondjikilile. Paife oha udifa omafiku ane moshivike noku na ovakonakoni vahapu tava ningi exumokomesho lopamhepo. Mo 2010, okwa li a ya kOfikola yOkudeula Ovakokolindjila. Onesmus ka li tuu a hafa eshi umwe oo a li te va hongo a li umwe womwaavo va li va kundafana naye kombinga yOmbibeli oshikando shotete!

Ovadali vaOnesmus paife ova fya, ashike ovamwatate novamwameme vomeongalo lavo otava file oshisho eemhumbwe daye dakeshe efiku. Okwa hafa neenghono omolwomanangeko noupuna oo ta hafele, nokwa teelela efimbo olo eshi itapa ka kala “nande umwe ta ti: Aame oshingone.” — Jes. 33:24.