1. Paulus okwa li a uda onghundana ihafifa ilipi i na sha nOvakriste vokuKorinto?

MOMUDO 55, omuyapostoli Paulus okwa li a uda kutya ovamwaxe vomuKorinto ohava kala alushe ve na eenhamanana. Okwa li e va hole ngaashi xe e hole ovana vaye, nomolwaasho okwa li e va shangela onhumwafo opo e va pukulule. (1 Kor. 1:11; 4:15) Okwa li yo e va tumina omulongi pamwe naye Titus, nokwa li e mu pula e mu alukile muTroas opo e mu lombwele osho sha ningwa po. Paulus okwa kala muTroas oule weemwedi a teelela Titus a aluke e mu lombwele kutya ovamwaxe vomuKorinto otave shi endifa ngahelipi. Ndele mupya munene, Titus ka li a alukila kuTroas, na Paulus okwa li a ya noshikepa kuMakedonia, naako oko a ka shakena naTitus. Opo nee Titus okwa li a hokololela Paulus kutya ovamwaxe vokuKorinto ova tula moilonga omayele aye nonokutya ova li va djuulukwa okumona Paulus. Eshi Paulus a li a uda onghundana oyo iwa, ‘ehafo laye ola li la hapupala.’ — 2 Kor. 2:12, 13; 7:5-9.

2. (a) Paulus okwa li a popya shike eshi a li a shangela Ovakorinto shi na sha neitavelo nehafo? (b) Ohatu ka kundafana omapulo elipi?

² Konima yefimbo lixupi, Paulus okwa li vali a shangela Ovakorinto onhumwafo imwe. Okwa li e va lombwela a ti: “Hakutya fye twa hala okupangela eitavelo leni, ndelenee fye ovayakuli [ile tu tye, “ovalongi,” NW] pamwe nanye omolwehafo leni; osheshi meitavelo omwa pama.” (2 Kor. 1:24) Mbela Paulus okwa li a hala okutya ngahelipi eshi a popya eendjovo odo? Ovakulunhuongalo otava dulu okulihonga shike meendjovo odo?

3. (a) Paulus okwa li a hala okutya shike eshi a ti: ‘Meitavelo omwa pama’? (b) Ovakulunhuongalo kunena ohava landula ngahelipi oshihopaenenwa shaPaulus?

³ Paulus okwa popya kutya eitavelo nehafo omaukwatya  a fimanenena oo Ovakriste ve na okukala ve na. Tete Paulus okwa tumbula eitavelo ndele ta ti: ‘Hakutya fye twa hala okupangela eitavelo leni, osheshi meitavelo omwa pama.’ Paulus okwa li e shii kutya ovamwaxe vomuKorinto ova li ovadiinini omolweitavelo lavo muKalunga, ndele hamolwaye ile omunhu wonhumba. Okwa li e shii kutya ove hole shili Kalunga nova hala okulonga osho sha yuka. Onghee hano, ka li e na okupangela eitavelo lovamwaxe, noka li a hala oku shi ninga. (2 Kor. 2:3) Kunena, ovakulunhuongalo ohava hopaenene Paulus nove shii kutya ovamwaxe ova itavela Kalunga notave mu longele nomalinyengotomheno a yuka. (2 Tes. 3:4) Ponhele yokutula po eemhango tadi dengele vamwe kongudi meongalo, ohava longifa omafinamhango Ombibeli nosho yo ewiliko olo hali di kehangano laJehova. Onghee hano, ovakulunhuongalo kunena ihava pangele eitavelo lovamwaxe. — 1 Pet. 5:2, 3.

4. (a) Paulus okwa li a hala okutya shike eshi a ti: “Fye ovayakuli [ile tu tye, “ovalongi,” NW] pamwe nanye omolwehafo leni”? (b) Ovakulunhuongalo kunena ohava hopaenene ngahelipi Paulus?

⁴ Paulus okwa ti vali: “Fye ovayakuli [ile tu tye, “ovalongi,” NW] pamwe nanye omolwehafo leni.” Paulus okwa longifa outumbulilo “ovalongi pamwe” ta ulike kwaavo va longa noudiinini pamwe naye opo a kwafele Ovakorinto. Osho otu shi shii ngahelipi? Omolwaashi Paulus okwa tumbula vavali vomuvo monhumwafo oyo tuu oyo eshi a ti kutya Jesus ‘okwa udifwa mokati keni kufye, kuame naSilvanus naTimoteus.’ (2 Kor. 1:19) Kakele kaasho, keshe opo Paulus a longifa outumbulilo “ovalongi pamwe” meenhumwafo daye, ota popi ovo va longa noudiinini pamwe naye moilonga yokuudifa, ngaashi Apollos, Akuila, Priskila, Timoteus naTitus. (Rom. 16:3, 21; 1 Kor. 3:6-9; 2 Kor. 8:23) Onghee hano, eshi Paulus a ti kutya “fye ovayakuli [ile tu tye, “ovalongi,” NW] pamwe nanye omolwehafo leni,” okwa li ta lombwele Ovakorinto kutya ye nosho yo ovo tava longo pamwe naye ova hala okuninga keshe osho tava dulu opo ve va kwafele va longele Kalunga nehafo. Kunena, ovakulunhuongalo Ovakriste navo ova hala okuninga sha faafana. Ova hala okuninga keshe osho tava dulu opo va kwafele ovamwaxe va ‘longele Omwene nehafo.’ — Eps. 100:2; Fil. 1:25.

5. Ovamwatate novamwameme vamwe ova li va pulwa epulo lilipi, noshike u na okuninga eshi hatu kundafana omanyamukulo avo?

⁵ Efimbo opo la di ko, ovamwatate novamwameme vamwe ovaladi va dja koilongo i lili noku lili ova li va pulwa epulo eli kutya: “Eendjovo noilonga yomukulunhuongalo wonhumba ilipi ye ku kwafela u kale wa hafa?” Eshi hatu kundafana omanyamukulo avo, diladila koinima oyo ovakulunhuongalo va popya ile va ninga oyo ye ku kwafela u kale wa hafa neenghono. Kakele kaasho, atusheni natu diladile kwaasho hatu dulu okuninga po opo tu xumife komesho ehafo meongalo letu. *

6, 7. (a) Omonghedi imwe ilipi omo ovakulunhuongalo tava dulu okuhopaenena Jesus, Paulus novapiya vaKalunga vamwe? (b) Omolwashike ovamwatate hava kala va hafa ngeenge hatu longifa omadina avo?

⁶ Ovamwameme novamwatate vahapu ova ti kutya ohava kala va hafa ngeenge ovakulunhuongalo ohave va ulikile kutya ove na ko nasha navo. Onghedi imwe omo ovakulunhuongalo hava ningi ngaho omokuhopaenena David, Elihu naJesus. (Lesha 2 Samuel 9:6; Job 33:1; Lukas 19:5.) Ovapiya vaKalunga ovo ova kala hava ulike kutya ove na ko nasha navamwe mokulongifa omadina avo. Paulus naye okwa li e shii kutya osha fimana okudimbuluka nokulongifa omadina ovamwaxe. Pexulilo lonhumwafo imwe yomeenhumwafo odo a li a shanga, okwa li a tumbula komadina ovamwatate novamwameme ve dulife po 25. Umwe womwaavo okwa li Persis  oo Paulus a popya shi na sha naye, a ti: “Kundileni po Persis, omuholike.” — Rom. 16:3-15.

⁷ Ovakulunhuongalo vamwe ohava mono shidjuu okudimbuluka omadina avamwe. Ndele ngeenge omukulunhuongalo okwa ningi eenghendabala dokukala ha dimbuluka omadina ovamwaxe, otava ka kala ve udite kutya oku na ko nasha navo. (Ex. 33:17) Ovamwatate ohava kala va hafa ngeenge ovakulunhuongalo tave va tumbula komadina pefimbo lEkonakono lOshungonangelo ile pokwoongala kumwe vali. — Yelekanifa naJohannes 10:3.

8. Omonghedi imwe ya fimana ilipi Paulus a li a hopaenena Jehova naJesus?

⁸ Paulus okwa li ha ulike kutya oku na ko nasha navamwe moku va pandula. Ovakulunhuongalo navo otava dulu okuninga ngaho opo va kwafele ovalongelikalunga vakwao va longele Jehova nehafo. Eshi Paulus a li a shangela Ovakorinto, okwa li e va lombwela kutya oku udite etumba omolwavo, a ti: ‘Ondi nokulitanga kuhapu omolweni.’ (2 Kor. 7:4) Nopehe na omalimbililo, eendjovo daPaulus oda li de linyengifa ovamwaxe ovo va kale va hafa. Okwa li yo a pandula omaongalo amwe vali omolwoilonga yao iwa. (Rom. 1:8; Fil. 1:3-5; 1 Tes. 1:8) Eshi a tumbula Persis monhumwafo yaye oyo a shangela eongalo lokuRoma, okwa ti yo kutya Persis okwa “longa noudiinini mOmwene.” (Rom. 16:12) Persis ka li tuu a tuwa omukumo keendjovo odo! Eshi Paulus a li a pandula ovamwaxe, okwa li a hopaenena Jehova naJesus. — Lesha Markus 1:9-11; Johannes 1:47; Eh. 2:2, 13, 19.

9. Omolwashike oilyo yeongalo hai kala ya hafa ngeenge tai pandulafana?

⁹ Kunena ovakulunhuongalo navo ove shii kutya osha fimana okupandula ovamwaxe. (Omayel. 3:27; 15:23) Ngeenge Omukulunhuongalo ta pandula ovamwaxe, otashi ulike kutya oku na ko nasha navo noha didilike oilonga yavo. Ovamwatate novamwameme meongalo ova pumbwa okutuwa omukumo kovakulunhuongalo. Omumwameme umwe womido 50 nasha okwa ti: “Ihandi pandulwa naanaa koilonga yetu. Ovanhu kave na ko nasha navakwao nohava kala ashike tava ningi omafiyafanepo. Onghee hano, ngeenge omukulunhuongalo a pandula nge shi na sha naasho nda longa meongalo, ohandi kala nda hafa neenghono. Osho ohashi ningifa nge ndi kale ndi udite kutya ondi holike kuTate womeulu.” Omumwatate umwe oo ta tekula ounona vavali oye aeke okwa ti kutya omukulunhuongalo umwe okwe mu pandula efimbo opo la di ko omolweenghendabala daye. Okwa ti: “Eendjovo domukulunhuongalo oo oda li da twa nge omukumo neenghono.” Osho otashi ulike kutya ngeenge ovakulunhuongalo tava pandula ovamwaxe, ohave va kwafele opo va twikile okulongela Kalunga nehafo nopehe na ‘okuloloka.’ — Jes. 40:31.

10, 11. (a) Ongahelipi ovakulunhuongalo tava dulu okulandula oshihopaenenwa shaNehemia? (b) Ongahelipi omukulunhuongalo ta dulu okupameka eitavelo lovamwaxe pefimbo letalelepo loufita?

¹⁰ Omonghedi vali ya fimana ilipi ovakulunhuongalo tava dulu okuulikila ovamwaxe ohole noku va kwafela va longele Kalunga nehafo? Omokukatuka eenghatu va kwafele ovo va pumbwa etwomukumo. (Lesha Oilonga 20:28.) Kungaho, otava hopaenene ovapiya vaKalunga ovadiinini vopefimbo lOmbibeli. Pashihopaenenwa, Ombibeli oya popya kutya eshi Nehemia a li a didilika kutya ovamwaxe vamwe Ovajuda ova teka omukumo, okwa li a katuka eenghatu meendelelo opo e va twe omukumo. (Neh. 4:14) Kunena, ovakulunhuongalo navo ove na okuninga sha faafana. Ngeenge ovamwaxe va teka omukumo, ohava ningi keshe osho tava dulu opo ve va twe omukumo. Ovakulunhuongalo ohava kendabala oku ke va talela po komaumbo avo noku va pa ‘eeshalinghenda dopamhepo,’ sha hala kutya, okupopya navo kombinga yaasho tashi pameke eitavelo lavo. (Rom. 1: 11) Oshike tashi dulu okukwafela ovakulunhuongalo va ninge ngaho?

¹¹ Fimbo omukulunhuongalo i na ninga etalelepo loufita, oku na tete okudiladila nawa kombinga yaavo a hala oku ka talelapo. Pashihopaenenwa, ota dulu okulipula kutya: ‘Mbela omunhu ou oku na omaupyakadi elipi? Ongahelipi handi dulu oku mu twa omukumo? Omushangwa ulipi ile ehokololo lonhumba lomunhu womOmbibeli tali dulu oku mu twa omukumo?’ Ngeenge omukulunhuongalo okwa diladila komesho yefimbo shi na sha nomumwaxe oo ta ka talela po, ota ka dula okupopya naye oinima oyo tai mu tu omukumo, ponhele ashike yokupopya oinima yakwalukeshe. Pefimbo letalelepo loufita, omukulunhuongalo oha pe ovamwaxe omhito va popye va manguluka omanga ye ta pwilikine. (Jak. 1:19) Omumwameme umwe okwa ti: “Ohashi hekeleke neenghono ngeenge omukulunhuongalo ta pwilikine kwoove nelitulemo.” — Luk. 8:18.

12. Oolyelye va pumbwa okutuwa omukumo meongalo, nomolwashike?

¹² Mbela oolyelye va pumbwa okutuwa omukumo kovakulunhuongalo? Paulus okwa ladipika ovakulunhuongalo Ovakriste a ti kutya nava ‘pashukile oshiunda ashishe.’ Oilyo aishe yeongalo oya pumbwa okutuwa omukumo, mwa kwatelwa ovaudifi novakokolindjila ovo va kala tava longele Jehova noudiinini oule womido dihapu. Mbela omolwashike va pumbwa etwomukumo lovakulunhuongalo? Omolwaashi omafimbo amwe ohava kala ve wete itava dulu vali okulididimikila omaupyakadi oo taa etifwa kounyuni ou woukolokoshi, nonande ove na eitavelo la kola. Ovapiya vaKalunga ovadiinini va tya ngaho navo ohava kala va pumbwa ekwafo omafimbo amwe, ngaashi hatu ke shi mona moshiningwanima osho sha li sha ningwa monghalamwenyo yohamba David.

13. (a) Jisbi-Benob okwa li a hala okuponokela David pefimbo lilipi? (b) Abisai okwa li a xupifa ngahelipi David?

¹³ Diva konima eshi omunyasha David a vaekwa a ninge ohamba, okwa li a lwifa omutongolume Goljat womepata lOvarefai. David okwa li omuladi nokwa li a dipaa omutongolume.  (1 Sam. 17:4, 48-51; 1 Omaf. 20:5, 8) Omido dihapu konima yaasho, David okwa li vali a lwifa omutongolume umwe eshi Ovaisrael va li tava lu nOvafilisti. Edina lomutongolume oo oJisbi-Benob, naye womepata lOvarefai. (2 Sam. 21:16) Ndele pomhito oyo, konyala omutongolume oo a dipae David. Omolwashike mbela? Hamolwaashi ngeno David a li a teka omukumo, ndele okwa li a loloka. Ombibeli oya ti: ‘David okwa li a loloka.’ Diva eshi Jisbi-Benob a li a mona kutya David okwa loloka, okwa li a diladila oku mu dipaa. Ndele fimbo omutongolume ina dipaa David, ‘Abisai yaSeruja okwe mu kwafa, nokwa denga Omufilisti nokwe mu dipaa.’ (2 Sam. 21:15-17) David ina xupa tuu koxulo yeonga! Nopehe na omalimbililo, David okwa li a hafa eshi Abisai a li a didilika kutya oku li monghalo ya tya ngahelipi ndele te mu kwafele diva eshi omwenyo waye wa li moshiponga. Oshike hatu dulu okulihonga mehokololo olo?

14. (a) Oshike tashi dulu oku tu kwafela tu kale ovadiinini meenghalo didjuu neenghono? (b) Ongahelipi ovakulunhuongalo tava dulu okukwafela vamwe va twikile okukala ovadiinini nova kale vali va hafa? Yandja oshihopaenenwa.

¹⁴ Oshiwana shaJehova mounyuni aushe otashi mu longele nonande ope na omandangalati oo taa etifwa kuSatana novakalelipo vaye. Vamwe vomufye otwa shakeneka omaupyakadi oo a li taa monika a fa ovatongolume, ndele molwaashi otwe lineekela filufilu Jehova, otwa dula oku a finda ngaashi ashike David a li a pamekwa ndele ta dipaa Goljat. Ndele omafimbo amwe ohatu kala twa loloka notwa teka omukumo omolwokukondjifa ounyuni waSatana. Peemhito da tya ngaho, ohatu teka omukumo noupu komaupyakadi oo hatu dulu okulididimikila shito. Ndele omukulunhuongalo wonhumba otashi dulika a didilike kutya otu udite ngahelipi ndele te tu pe ekwafo olo twa pumbwa pefimbo olo opo tu dule okutwikila okulongela Kalunga nehafo. Vahapu vomufye otwa kwafelwa monghedi ya tya ngaho, pashihopaenenwa, omukokolindjila umwe womido 60 nasha okwa ti: “Efimbo la pita, onda li handi ehama nonda li handi kala nda loloka omolwokulonga momapya. Omukulunhuongalo umwe okwa li a didilika kutya onda loloka ndele ta kundafana naame. Otwa li twa ninga eenghundafana tadi tungu da kanghamena komishangwa donhumba dOmbibeli. Onda li nda tula moilonga omayele oo a pange, nonda li nda mona mo ouwa.” Okwa ti yo: “Omukulunhuongalo oo ke fi tuu omunahole eshi a didilika kutya onda loloka nokwa kwafela nge!” Otashi hekeleke eshi tu na ovakulunhuongalo ovo have tu pashukile nove lilongekida alushe oku tu kwafela, ngaashi naanaa Abisai a li e lilongekida okukwafela David.

15, 16. (a) Omolwashike Paulus a li e holike neenghono kovaitaveli vakwao? (b) Omolwashike tu hole ovakulunhuongalo?

¹⁵ Ovakulunhuongalo ohava longo noudiinini. Omafimbo amwe ihava kofa nawa molwaashi ohava kala tave lipula shi na sha novamwaxe, nohava penduka oufiku opo ve va ilikanene ile ve ke va kwafele. (2 Kor. 11:27, 28) Ndele nande ongaho, ohava wanifa po oinakuwanifwa yavo nehafo, ngaashi Paulus. Paulus okwa li a shangela Ovakorinto a ti: “Ame ohandi ka yandja aishe nehafo, ndele handi liyandjele eemwenyo deni.” (2 Kor. 12:15) Molwaashi okwa li e hole ovamwaxe, okwa li e liyandja opo e va pameke. (Lesha 2 Ovakorinto 2:4; Fil. 2:17; 1 Tes 2:8) Nomolwaasho ovamwaxe ova li ve mu hole neenghono. — Oil. 20:31-38.

¹⁶ Tu li ovapiya vaKalunga kunena, nafye otu hole ovakulunhuongalo nohatu pandula Jehova eshi he va longifa ve tu kwafele. Ohatu kala twa hafa ngeenge tava ulike kutya ove na ko nasha nafye pauhandimwe nosho yo eshi have tu talele po noku tu twa omukumo. Kakele kaasho, ohatu kala twa hafa eshi ve lilongekida alushe oku tu kwafela peemhito odo twa wililwa po komaupyakadi ounyuni ou. Ovakulunhuongalo va tya ngaho ove li ‘ovalongi pamwe nafye shili omolwehafo letu.’