Eshi outondwe itau ka kala po vali fiyo alushe!
Nonande fye ohatu dulu okweefa po outondwe, itatu dulu okuningifa vamwe ve u efe po. Ovanhu vahapu ovo vehe na ondjo, ove li oihakanwa youtondwe. Olyelye mbela ta dulu okuxulifa po outondwe fiyo alushe?
Jehova Kalunga oye ashike ta dulu okuxulifa po filufilu outondwe oo u li ko kunena. Ombiibeli oya udaneka kutya osho ta ka ninga. — Omayeletumbulo 20:22.
KALUNGA OTA KA KUFA PO OINIMA OYO HAI ETIFA OUTONDWE
-
1. SATANA ONDIABOLI. Satana, oo e li omweengeli omunashibofa, oye ta xumifa komesho outondwe kunena. Kalunga ota ka hanauna po Satana naaveshe ovo ve tonde vamwe ngaashi ye. — Epsalme 37:38; Ovaroma 16:20.
-
2. OUNYUNI WASATANA OO U YADI OUKOLOKOSHI. Kalunga ota ka xulifa po oinima oyo hai xumifa komesho oukolokoshi mounyuni, mwa kwatelwa ovanapolitika nosho yo ovawiliki vomalongelokalunga, ovo hava xumifa komesho outondwe. Kalunga ota ka xulifa po yo ovanangeshefa ovanalwisho, va nyonauka nohava nyeke ovanhu oimaliwa. — 2 Petrus 3:13.
-
3. OKUHAWANENENA KWOVANHU. Ombiibeli oya yelifa kutya ovanhu aveshe ova fyuulula okuhawanenena, eamo lokukala to diladila, u udite, ile okulonga osho shii. (Ovaroma 5:12) Mwa kwatelwa okukala u tonde vamwe. Kalunga ota ka kwafela ovanhu va xulife po omaamo oo a puka, opo nee outondwe otau ka xulifwa po fiyo alushe. — Jesaja 54:13.
OMBIIBELI OYA UDANEKA OUNYUNI U HE NA OUTONDWE
-
1. ITA PU KA KALA VALI OKUHENOUYUKI. Ounyuni otau ka pangelwa kOuhamba waKalunga, oo tau ka pangela okudja meulu notau ka eta ouyuki fiyo alushe. (Daniel 2:44) Ita pu ka kala vali onhondo. Kalunga ota ka xulifa po okuhenouyuki oko haku ningilwa ovanhu kunena. — Lukas 18:7.
-
2. KESHE UMWE OTA KA KALA E NA OMBILI. Kaku na oo ta ka mona oixuna omolwoukolokoshi, ile oita. (Epsalme 46:9) Edu otali ka kala onhele ya amenwa oko ku na ovanhu ovanambili. — Epsalme 72:7.
-
3. KESHE UMWE OTA KA KALA NOMWENYO FIYO ALUSHE A WANENENA. Ovanhu otava ka kala ve holafane. (Mateus 22:39) Kaku na oo ta ka mona oixuna, nokuli nokomaliudo, ile omadiladilo mai. (Jesaja 65:17) Konima eshi outondwe wa xulifwa po, ovanhu otava “ka hafela ombili inene.” — Epsalme 37:11.
Mbela owa hala oku ka kala mounyuni watya ngaho? Ovanhu kunena, otave lihongo okweefa po outondwe mokutula moilonga omafinamhango Ombiibeli. (Epsalme 37:8) Eendombwedi daJehova omamiliyona mounyuni aushe otadi ningi naanaa sha faafana. Nonande oda dja momaputuko a yoolokafana, oda hangana nodi holafane. — Jesaja 2:2-4.
Eendombwedi daJehova otadi ka kala da hafa okutukulilafana naave osho de lihonga kombinga yanghee to dulu okulididimikila okuhenouyuki nosho yo okatongo. Osho to lihongo otashi ke ku kwafela u kale u udite u holike ponhele yokutondika. Oto dulu okulihonga nghee to dulu okuulikila vamwe ohole nonande kave na olupandu, ile ve na outondwe. Oshidjemo, oto ka kala wa hafa noto ka kala u na ekwatafano liwa navamwe. Komesho yaaishe, oto ke lihonga osho u na okuninga, opo u dule oku ka kala koshi yepangelo laKalunga, eshi outondwe itau ka kala po vali. — Epsalme 37:29.
Otashi dulika yo u hafele oikundafanwa ei
OSHUNGONANGELO
Ouhamba waKalunga otau uya okuninga shike?
Jesus okwa li e shii kutya Ouhamba waKalunga oo ashike epangelo tali dulu okukandula po omaupyakadi kombada yedu. Ouhamba waKalunga owa ninga nale shike opo tu kale twe u lineekela?
