OSHITUKULWA SHOKUKONAKONWA 29
Owe lilongekidila ngoo oudjuu munene?
“Kaleni mwe lilongekida.” — MAT. 24:44.
EIMBILO 150 Kongeni Kalunga opo mu ka xupifwe
EXUKU LOSHITUKULWA a
1. Omolwashike shi li pandunge okulilongekidila oshiponga?
OKULILONGEKIDA ohaku xupifa eemwenyo. Pashihopaenenwa, ngeenge pa holoka oshiponga, ovanhu ovo hava hangwa ve shi lilongekidila, luhapu ohava xupu nohava dulu okukwafela vamwe. Ehangano limwe moEuropa, olo hali kendabala okukwafela ovanhu, ola ti: “Okulilongekida nawa otaku dulu okuxupifa eemwenyo.”
2. Omolwashike tu na okulilongekidila oudjuu munene? (Mateus 24:44)
2 “Oudjuu munene” otau uya ombadilila. (Mat. 24:21) Mepingafano noiponga ihapu, oudjuu munene itau ka hanga ovanhu aveshe ombadilila. Oule womido 2 000 lwaapo da pita, Jesus okwa londwela ovashikuli vaye ve lilongekidile efiku olo. (Lesha Mateus 24:44.) Ngeenge otwe lilongekida, otashi ka kala shipu kufye okulididimikila efimbo olo lidjuu nohatu ka kwafela vamwe va ninge sha faafana. — Luk. 21:36.
3. Ongahelipi elididimiko, olukeno nohole tai tu kwafele tu lididimikile oudjuu munene?
3 Natu ka taleni komaukwatya atatu, oo tae tu kwafele tu lilongekidile oudjuu munene. Ohatu ke linyenga ngahelipi, ngeenge otwa lombwelwa tu udife etumwalaka la kwata moiti letokolo, ofimbo ovo vehe fi Eendombwedi tave tu pataneke? (Eh. 16:21) Ohatu ka pumbwa elididimiko, opo tu dulike kuJehova, tu na elineekelo kutya ote ke tu amena. Ohatu ka ninga po shike, ngeenge ovamwatate ova kanifa oinima yavo imwe, ile aishe yopamaliko? (Hab. 3:17, 18) Ohatu ka pumbwa olukeno, opo li tu linyengife tu va kwafele meemhumbwe davo. Ohatu ke linyenga ngahelipi ngeenge eshi hatu ka ponokelwa koiwana ye limanga kumwe, otashi ke tu pula tu kale ponhele imwe aike novamwatate novamwameme oule wefimbo lonhumba? (Hes. 38:10-12) Ohatu ka pumbwa ohole ya twa kekipa yoku va hola, opo i tu kwafele tu pite mefimbo olo lidjuu.
4. Ombiibeli otai ulike ngahelipi kutya otu na okutwikila okukulika elididimiko, olukeno nohole?
4 Eendjovo daKalunga otadi tu ladipike tu twikile okukulika elididimiko, olukeno nohole. Lukas 21:19 okwa ti: “Ngeenge omwe lididimike, otamu ke lixupifila eemwenyo deni.” Ovakolossi 3:12 ova ti: “Djaleni . . . olukeno.” 1 Ovatessalonika 4:9, 10 ova ti: “Kalunga okwe mu honga mu kale mu holafane. . . . Ashike ohatu mu ladipike ovamwatate mu twikile okuninga ngaho pauyadi.” Eevelishe odo oda li da shangelwa ovahongwa ovo va hangwa nale hava ulike elididimiko, olukeno nohole. Ashike ova li va pumbwa okutwikila okukulika omaukwatya oo. Nafye otu na okuninga sha faafana. Opo shi tu kwafele, ohatu ka konakona nghee Ovakriste votete va li va ulika oukwatya keshe. Opo nee ohatu ka tala nghee hatu dulu okuhopaenena ovahongwa ovo, noshidjemo, ohatu ka kala twe lilongekidila oudjuu munene.
PAMEKA ELIDIDIMIKO LOYE
5. Ongahelipi Ovakriste votete va li ve lididimikila omayeleko?
5 Ovakriste votete ova li va pumbwa elididimiko. (Heb. 10:36) Kakele komaupyakadi oo haa shakenekwa kovanhu aveshe, ova li va taalela omayeleko a wedwa po. Vahapu vomuvo kava li ashike tava hepekwa kovawiliki velongelokalunga lOshijuda nosho yo kepangelo laRoma, ndele ova li yo tava hepekwa koilyo yomaukwaneumbo avo. (Mat. 10:21) Ova li yo ve na okushilipaleka meongalo kutya omahongo oipupulu ovashunimonima, ovo va li tava kendabala okutukaula eongalo, inae va nwefa mo. (Oil. 20:29, 30) Ndele nande ongaho, Ovakriste ovo ova li ve lididimika. (Eh. 2:3) Ove shi enda ngahelipi? Ova li va dilonga koihopaenenwa yopaMishangwa yelididimiko, ngaashi shaJob. (Jak. 5:10, 11) Ova li va ilikana va pewe eenghono. (Oil. 4:29-31) Ova li yo va yandja elitulemo koidjemo iwa yelididimiko lavo. — Oil. 5:41.
6. Oshike to lihongo kwaasho Merita a li a ninga, opo e lididimikile omapataneko?
6 Nafye ohatu dulu okulididimika, ngeenge otwa kala hatu konakona pandjikilile oihopaenenwa i na sha nelididimiko oyo i li mEendjovo daKalunga nomoishangomwa yetu nokudilonga kuyo. Eshi omumwameme Merita wokoAlbania a li a ninga ngaho, osha li she mu kwafela e lididimikile omapataneko a kwata moiti okudilila koukwaneumbo wavo. Okwa ti: “Onda li nda tuwa omukumo neenghono, eshi nda konakona ehokololo lopaMbiibeli li na sha naJob. Job okwa li a mona oixuna neenghono noka li e shii kutya olyelye a li te i mu etele. Ashike okwa ti: ‘Fiyo ohandi ka fuda mo omufudo wange, itandi ekeleshi ouyuki wange.’ (Job 27:5) Onda li nda diladila kunghee omaupyakadi aJob a li madjuu unene okuyelekanifa naao ange. Job ka li e shii oo a li te mu etele omaupyakadi, ashike ame ondi shii ou te a etele nge.”
7. Nokuli nonande inatu taalela omayeleko a kwata moiti paife, oshike tu na okulihonga okuninga paife?
7 Ohatu dulu yo okupameka elididimiko letu mokwiilikana kuJehova pandjikilile noku mu lombwela osho hatu lipula nasho. (Fil. 4:6; 1 Tes. 5:17) Otashi dulika ino taalela eyeleko la kwata moiti paife. Ndele nande ongaho, mbela oho kongo ngoo ewiliko kuJehova, ngeenge wa handuka, wa lyalyakana, ile wa wililwa po? Ngeenge owa kala ho kongo ewiliko kuKalunga ketu pandjikilile, eshi to ungaunga nomashongo efiku nefiku paife, ito ka ongaonga oku shi ninga, eshi to ka taalela omashongo a kwata moiti monakwiiwa. Oto ka kala u na elineekelo kutya Jehova oku shii kutya onaini e na oku ku kwafela nongahelipi e na oku shi ninga. — Eps. 27:1, 3.
ELIDIDIMIKO
Eyeleko keshe olo hatu lididimikile otali tu pameke tu ke lididimikile olo tali landula ko (Tala okatendo 8)
8. Ongahelipi oshihopaenenwa shaMira sha ulika kutya okulididimikila omayeleko paife otaku dulu oku tu kwafela tu ke lididimikile omayeleko omonakwiiwa? (Jakob 1:2-4) (Tala yo efano.)
8 Ohatu ka dula okulididimikila oudjuu munene, oo twa taalela monakwiiwa, ngeenge ohatu lididimikile omayeleko paife. (Rom. 5:3) Omolwashike hatu dulu okutya ngaho? Ovamwatate novamwameme vahapu ova ti kutya efimbo keshe tave lididimikile onghalo idjuu ohashi va kwafele ve lididimikile omayeleko a shikula ko. Ngeenge ove lididimikile oupyakadi kekwafo laJehova, ohava kala ve na elineekelo kutya okwa hala oku va kwafela. Kungaho, eitavelo lavo ohali va kwafele ve lididimikile eyeleko tali shikula ko. (Lesha Jakob 1:2-4.) Mira, omukokolindjila wokoAlbania, okwa mona kutya, eshi e lididimika monakudiwa oshe mu kwafela, opo a twikile okulididimika. Okwa dimina kutya omafimbo amwe oha kala e udite kutya oye ashike e na omaupyakadi mahapu. Ashike okwa didilika ashishe osho Jehova a ninga moule womido 20 da pita, opo e mu kwafele, nokwe lilombwele ta ti: ‘Kala omudiinini. Ino efa po okulongela Jehova paife konima eshi e ku kwafela u lididimikile eenghalo dihapu didjuu.’ Naave oto dulu okudiladila kunghee Jehova e ku kwafela nale u lididimike. Kala u na elineekelo kutya oku ku wete efimbo keshe to lididimikile eyeleko nosho yo kutya ote ke ku pa ondjabi. (Mat. 5:10-12) Opo nee ngeenge oudjuu munene owa hovele, owe lihonga nale nghee u na okulididimika noto ka kala wa tokola toko okutwikila okulididimika.
ULIKA OLUKENO
9. Ongahelipi eongalo lomuAntiokia shomuSiria la li la ulika olukeno?
9 Natu ka taleni kutya oshike sha li sha ningwa po, eshi Ovakriste vomuJudea va li va taalela ondjala inene. Eshi eongalo lomuAntiokia shomuSiria la li la uda kombinga yondjala oyo, nopehe na omalimbililo, ola li la udila olukeno ovamwaxe vomuJudea. Opo nee ova li va ulika olukeno lavo moilonga. Ova li va “pangela omhangela va yandje oikwafa keshe umwe shi fike pwaasho ta dulu, opo ve i tumine ovamwatate vokuJudea.” (Oil. 11:27-30) Nonande ovamwaxe ovo va li va kumwa kondjala ova li kokule, Ovakriste vomuAntiokia ova li va tokola oku va kwafela. — 1 Joh. 3:17, 18.
OLUKENO
Oiponga yopaushitwe ohai tu pe omhito tu ulike olukeno (Tala okatendo 10)
10. Omeenghedi dilipi hatu dulu okuulika olukeno, ngeenge ovaitaveli vakwetu va kumwa koshiponga? (Tala yo efano.)
10 Nafye ohatu dulu okuulika olukeno kunena, ngeenge ovaitaveli vakwetu ova kumwa koshiponga. Ohatu katuka onghatu diva tu kwafele, tashi dulika mokupula ovakulunhuongalo, ngeenge ohatu dulu okukwafela moprojeka, mokuyandja omayambidido omolwoilonga yomounyuni aushe, ile mokwiilikanena ovo va kumwa koshiponga. b (Omayel. 17:17) Pashihopaenenwa, mo 2020, opa li pa totwa Eekomitiye dOkuyandja Oikwafa mounyuni aushe di dulife po 950, opo di file oshisho ovo va kumwa komukifi wekomba wo-COVID-19. Ovo hava longo meekomitiye dokuyandja oikwafa ova wana okupandulwa. Molwaashi ove linyengifwa kolukeno lokukenukila ovamwaxe, ova yandja oikwafa nosho yo efiloshisho lopamhepo. Peemhito dimwe, ova wapekulula, ile va tungulula omaumbo nosho yo eenhele dokwoongalela. — Yelekanifa 2 Ovakorinto 8:1-4.
11. Ongahelipi oilonga yetu yolukeno tai fimanekifa Tate yetu womeulu?
11 Ngeenge twa ulika olukeno konima yoshiponga, vamwe ohava didilike omaliyambo oo twa ninga. Pashihopaenenwa, mo 2019, oshikungulu shedina Dorian osha li sha hanauna po Olupale lOuhamba moBahamas. Eshi ovamwatate va li tava tungulula olupale, ova li va pula omutungi umwe, oo ehe fi Ondombwedi, kutya ota pula ingapi okukwafela moilonga imwe. Okwa li e va lombwela, a ti: “Onda hala okulonga, okuyandja omayambidido . . . oilongifo nosho yo oitungifo. . . . Onda hala okuningila ngaho ehangano leni. Onde linyengifwa kunghee [mu] uditile ookaume keni.” Ovanhu vahapu mounyuni kave shii Jehova. Ashike vahapu ohava mono osho Eendombwedi daJehova tadi ningi, opo di kwafele vamwe. Kashi fi tuu oufembanghenda okushiiva kutya oilonga yetu yolukeno otai dulu okunanena ovanhu Kwaao e na ‘efilonghenda linene’! — Ef. 2:4.
12. Ongahelipi okukulika olukeno kunena taku tu kwafele tu lilongekidile oudjuu munene? (Ehololo 13:16, 17)
12 Omolwashike hatu ka pumbwa oku ka ulika olukeno pefimbo loudjuu munene? Ombiibeli oya ulika kutya ovo itava yambidida oinima yopapolotika, otava ka taalela omashongo paife nosho yo pefimbo loudjuu munene. (Lesha Ehololo 13:16, 17.) Ovamwatate novamwameme otashi dulika tava pumbwa ekwafo, opo va mone oinima oyo va pumbwa va dule okuxupa. Eshi Ohamba yetu, Kristus Jesus, tai ke uya okutokola, nai hange hatu ulike olukeno, opo i ke tu shive tu “fyuulule Ouhamba.” — Mat. 25:34-40.
PAMEKENI OHOLE YENI
13. Ngaashi sha ulikwa mOvaroma 15:7, ongahelipi Ovakriste votete va li va pameka ohole yavo yokuholafana?
13 Ohole oya li oshinima osho sha li sha didilikifa mo Ovakriste votete. Ndele mbela ova li ngoo hava mono shipu okuulikilafana ohole? Didilika kutya meongalo lomuRoma omwa li ovanhu va yoolokafana. Kamwa li ashike Ovajuda, ovo va putuka hava dulika kOmhango yaMoses, ndele omwa li yo ovanhu vomoiwana imwe, ovo va li ve na eputuko la yooloka ko filufilu. Ovakriste vamwe otashi dulika va li ovapika, ofimbo vamwe vaha li ovapika tashi dulika vamwe vomuvo va li nokuli oovene vovapika. Ongahelipi Ovakriste ovo va li va twikila okuulika ohole, nonande opa li omayoolokafano a tya ngaho? Omuyapostoli Paulus okwe va ladipika, a ti: “Tambulafaneni.” (Lesha Ovaroma 15:7.) Okwa li a hala okutya ngahelipi? Oshitya osho sha tolokwa “tambula” otashi ti okutambula ko umwe nonghenda, ile oku mu yakula, ngaashi oku mu tambula ko meumbo loye, ile a ninge kaume koye. Pashihopaenenwa, Paulus okwa li a lombwela Filemon nghee a li e na okutambula ko omupika Onesimus, oo a li a ya onhapo, a ti: “Mu tambula ko nombili.” (Filem. 17) Priskila naAkwila ova li va tambula ko Apollos, oo a li ehe shii shihapu kombinga yOukriste ngaashi vo, eshi va li ‘ve mu ifana po.’ (Oil. 18:26) Ovakriste ovo kava li va efa omayoolokafano a etife omaupyakadi pokati kavo, ndele ponhele yaasho, ova li va tambulafana ko.
OHOLE
Otwa pumbwa okukala tu hole ovamwatate novamwameme aveshe (Tala okatendo 15)
14. Ongahelipi Anna nomushamane waye va ulika ohole?
14 Nafye ohatu dulu okuulikila ovamwatate novamwameme ohole moku va tambula ko va ninge ookaume ketu. Oshidjemo, navo otave ke tu ulikila ohole. (2 Kor. 6:11-13) Natu ka taleni koshimoniwa shaAnna nomushamane waye. Diva konima eshi va tembukila koshinakuwanifwa shavo shipe ve li ovatumwa muAfrica lokOuninginino, omukifi wekomba wo-COVID-19 owa li wa hovela. Molwaashi opo va li va fiki ko, kava li tava dulu okwoongala neongalo komudidi. Ongahelipi ovalihomboli ovo va li tava ka ulika ohole yavo? Ova li hava kwatafana novamwatate novamwameme pavidio noku va lombwela nghee va hala oku va shiiva nawa. Osho osha li sha kuma omaukwaneumbo, nova li have va dengele noku va tumina omatumwalaka luhapu. Omolwashike ovalihomboli ovo va li va katuka onghatu oyo? Anna okwa ti: “Ohole oyo ame noukwaneumbo wetu twa li twa ulikilwa momafimbo mawa nomomafimbo mai, oya li ya findilwa momutima nomomadiladilo ange noye linyengifa nge ndi ulike ohole.”
15. Oshike to lihongo koshihopaenenwa shaVanessa shi na sha nokukala u hole ovamwatate novamwameme aveshe? (Tala yo efano.)
15 Vahapu vomufye otu li momaongalo omo mu na ovamwatate novamwameme va dja momaputuko a yoolokafana nove na omaukwatya a yoolokafana. Ohatu dulu okupameka ohole yetu yoku va hola aveshe mokuyandja elitulemo komaukwatya avo mawa. Omumwameme wedina Vanessa, oo ta longele koNew Zealand, kava li hava tu va fife navamwe meongalo lavo. Ashike ponhele yoku va henuka, okwa li a tokola a kale efimbo lihapu naavo ve na omaukwatya, oo a li hae mu kenyaneke. Okuninga ngaho, oshe mu kwafela a mone kutya oshike Jehova e hole kombinga yavo. Okwa ti: “Okudja eshi omushamane wange a ninga omupashukilishikandjo, otwa kala hatu kala efimbo novamwatate novamwameme vahapu ve na omaukwatya a yoolokafana, nosha kala shipu kwaame okulongela kumwe navo. Paife ondi hole ovanhu va yoolokafana. Jehova naye osho e hole ngaho, nomolwaasho a pitika ovanhu va yoolokafana ve mu longele.” Ngeenge otwe lihongo okutala ko vamwe ngaashi Jehova he va tale ko, ohatu ka ulika kutya otu va hole. — 2 Kor. 8:24.
Poudjuu munene, ohatu ka mona eameno olo Jehova e tu udanekela, ngeenge otwa twikile okukala twa hangana novaitaveli vakwetu (Tala okatendo 16)
16. Omolwashike ohole tai ka kala ya fimanenena pefimbo loudjuu munene? (Tala yo efano.)
16 Ohole otai ka kala ya fimanenena pefimbo loudjuu munene. Openi hatu ka hanga eameno, ngeenge oudjuu oo owa hovele? Didilika osho Jehova a li a lombwela oshiwana shaye shi ninge, eshi sha li sha ponokelwa kuBabilon shonale. Okwa ti: “Hano oove, oshiwana shange, liidilila monduda yoye, u ka hondame okafimbo kanini, fimbo oupyuhandu tau pitilile po.” (Jes. 26:20) Osha fa shi li ngaha kutya eendjovo odo otadi longo yo nokufye ovo twa taalela oudjuu munene. “Onduda” otashi dulika tai ulike komaongalo etu. Pefimbo loudjuu munene, ohatu ka mona eameno olo Jehova e tu udanekela, ngeenge otwa twikile okukala twa hangana novaitaveli vakwetu. Onghee hano, otu na okulonga noudiinini paife, opo tu kale tu na ohole ya xwama yokuhola ovamwatate novamwameme. Exupifo letu ole li kolelela kwaasho.
LILONGEKIDA PAIFE
17. Ohatu ka dula okuninga shike pefimbo loudjuu munene, ngeenge otwe lilongekida paife?
17 “Efiku linene lOmwene” otali ka kala efimbo lidjuu neenghono kovanhu aveshe. (Sef. 1:14, 15) Oshiwana shaJehova nasho otashi ka taalela eenghalo didjuu. Ashike ngeenge otwe lilongekida paife, ohatu ka kala twa ngungumana nokukwafela vamwe. Ohatu ke lididimikila eshongo keshe olo hatu shakeneke. Ngeenge ovaitaveli vakwetu tava mono oixuna, ohatu ka ninga ngaashi hatu dulu, opo tu va kwafele moku va ulikila olukeno nokufila oshisho eemhumbwe davo. Ohatu ka kala tu na ekwatafano liwa novamwatate novamwameme ovo twa kulika nale ohole yoku va hola. Opo nee Jehova ote ke tu pa ondjabi yomwenyo waalushe mounyuni omo oiponga aishe nomaudjuu taa ka dimbuwa. — Jes. 65:17.
EIMBILO 144 Kala wa tala kondjabi!
a Oudjuu munene otau ka hovela mafiku. Omaukwatya ngaashi elididimiko, olukeno nohole otae ke tu kwafela tu lilongekidile oiningwanima oyo tai ka ningwa. Didilika nghee Ovakriste votete va li va kulika omaukwatya oo, nghee hatu dulu okuninga sha faafana kunena nanghee omaukwatya oo tae tu kwafele tu lilongekidile oudjuu munene.
b Ovo va hala okukwafela moprojeka yokuyandja oikwafa, tete ove na okuyadeka ofooloma yo-Local Design/Construction Volunteer Application (DC-50), ile Application for Volunteer Program (A-19), opo nee tava teelele va shivwe va ka kwafele moprojeka oyo.