NGEENGE owa talela po okanhunhu kedina Sangir Besar moIndonesia omido donhumba da pita, otashi dulika wa mona ovamwameme vatatu ve li komunghulofuta. Ova shiivika nawa mokanhunhu oko omolwoukalele wavo, okukwafela ovanhu va ude ko Ombiibeli. Ndele pomhito imwe, ova li tava ningi oshinima shimwe sha yooloka ko filufilu kwaasho.

Tete, ova ya momeva, tava hange mo omamanya a kula, ndele tave a twala komunghulofuta. Omamanya amwe okwa li a kula e fike petanga lokeemhadi. Opo nee ovakainhu ovo ova kala omutumba koupundi voiti, ndele tava kufa ohamala va tatule omamanya oo moupambu vanini ve dulike komai oxuxwa. Konima yaasho, ohava tula oumanya ovo mouvela voplastika, ndele tave va twala konhele oko hava kala. Opo nee ohava tula oumanya ovo momakutu a kula, oo taa dulu okulondekwa mololi, ndele taa ka longifwa okutunga opate.

Umwe womovamwameme ovo edina laye oHulda. Eenghalo daye ode mu pitika a longe efimbo lihapu moilonga oyo e dule vakwao. Luhapu oha longifa oimaliwa oyo ha mono mo, opo a lande oipumbiwa yomeumbo laye. Ndele paife ota longo e na elalakano vali limwe la wedwa po. Okwa hala oshikwaelektronika, oka-tablet, opo a dule okukala ha i ko-JW Library^®. Hulda okwa li e shii kutya ouvidio noinima imwe vali oyo i li kepandja olo lopaungoba otai dulu oku mu kwafela a xwepopaleke oukalele waye nosho yo eudeko laye lOmbiibeli.

Hulda okwa kala ha longo eevili mbali ongula keshe oule womwedi netata, ta tatula omamanya nokuyadeka okaloli. Xuuninwa, okwa kala e na oimaliwa ya wana okulanda oka-tablet.

Hulda okwa ti: “Nonande onda li handi kala nda loloka palutu nonda dinda kokutatula omamanya, onda dimbwa diva ouyehame aushe oo, eshi nda ka kala handi longifa oka-tablet oko kape, opo ka kwafele nge ndi kale handi wanifa po nawa oukalele wange nokulilongekidila noupu okwoongala kwopaKriste.” Okwa ti yo kutya oka-tablet oke mu kwafela eshi omukifi wekomba wa tukuka, molwaashi oilonga aishe yeongalo oya li hai longwa pamalungula. Otwa hafa pamwe naHulda, eshi a hanga elalakano laye.