OVANHU vahapu ove shii nawa ehokololo laJesus li na sha naashi a li a endjelelekwa nokuvalelwa komuti e li pokati kovakolokoshi vavali. (Mat. 27:35-38) Ashike ovanhu vamwe ova itavela kutya Ombiibeli kai li mondjila, eshi ya popya kutya oshimhu shaJesus osha li sha longekidilwa epako nosha pakwa mombila.​— Mark. 15:42-46.

Ovakembauli vamwe vOmavaengeli ova li tave lipula va limbililwa kutya omunhu, oo a valelwa komuti, okwa li e na ngeno okupakwa pamulandu, ngaashi okupakwa mombila. Ponhele yaasho, ovakembauli ovo ova li va itavela kutya ovo va valelwa va talika ko ve li ovakolokoshi ova li hava ungaungiwa navo monghedi i lili. Omutoolinghundana umwe wedina Ariel Sabar, okwa shanga moshifo Smithsonian, a yelifa kutya omolwashike ovanhu vamwe va li ve na etaleko la tya ngaho. Okwa ti: “Okuvalela umwe komuti osha li shi li ehandukilo olo la li hali pewa ovakolokoshi momudingonoko. Ovanawino vamwe ova popya kutya osha li sha nyika oulai okudiladila kutya Ovaroma ova li hava fimaneke ovanhu va tya ngaho moku va paka pamulandu.” Ovaroma ova li hava tokola ovakolokoshi moku va fifa ohoni neenghono ngaashi tashi dulika. Onghee oimhu yavo ova li have i efa i kale komuti, opo i li ke po koilyani. Oipongolo oya li hai pakwa mombila.

Ovalafululi voikulunima ova li va mona oshinima shimwe shi lili, shi na sha noipongolo yOvajuda vamwe ovo va li va dipawa. Mo 1968, ova li ve litwa omakipa ovalumenhu ovo va li va dipawa pefimbo lovayapostoli vaJesus. Ova li ve a hanga mombila youkwaneumbo wOvajuda i li popepi naJerusalem. Ova hanga oipongolo oyo moshikefa shi li mombila. Limwe lomoipongolo oyo, ekipa lokoshififinwa. Ola li la valelwa koshipilangi nombosha i na eesendimeta 11,5. Sabar okwa ti: “Ekipa lokoshififinwa olo olomulumenhu wedina Yehochanan, naasho osha li she tu kwafela tu kandule po eemhata odo da kala po efimbo lile di na sha nomahokololo Omavaengeli, oo a popya okupakwa kwaJesus mombila. Shididilikwedi, oipongolo yoshififinwa shaYehochanan oya li ya yandjwa i li oshihopaenenwa shovalumenhu, ovo va li va dipawa pefimbo laJesus nova pitikwa kOvaroma va pakwe monghedi yOshijuda.”

Natango ovanhu ova li ve na omataleko a yoolokafana e na sha noipongolo oyo yokoshififinwa nghee tai tu kumwe nanghee Jesus a li a endjelela komuti. Ashike ouyelele wa yela oyoo kutya ovakolokoshi vamwe, ovo va li va dipawa, ova li va pakwa, ndele haipongolo ashike ya li ya ekelwa mombila. Oumbangi oo otau tu kumwe naasho Ombiibeli ya popya kombinga yaJesus, eshi oshimhu shaye sha longekidwa nokupakwa mombila.

Osho sha fimanenena oshosho kutya Jehova okwa li a xunganeka kutya Jesus ota ka pakwa mombila yomulumenhu oshipuna, nokape na nande oumwe ta dulu okwiimba Jehova a wanife po Eendjovo daye.​— Jes. 53:9; 55:11.