DON, oo e li umwe womEendombwedi daJehova moCanada, oha ningi eenghendabala de likalekelwa a popye novanhu aveshe momapandavanda. Don okwa popya kombinga yaumwe a ti: “Omulumenhu Peter oo a li ehe na eumbo oye a li umwe womovanhu va kaka neenghono inandi mona nande onale momapandavanda. Okwa li mu tilifa noku na po ondunge yokukaleka ovanhu kokule naye. Okwa kala ha anye lwoikando omakwafo oo ta pewa kovanhu.” Ndele nande ongaho, moule womido di dulife 14, Don okwa kala ta ningi eenghendabala opo a ulikile omulumenhu oo olukeno.

Efiku limwe, Peter okwa li a pula Don, a ti: “Omolwashike ho lipula naame? Ovanhu aveshe ova efa nge. Omolwashike u na ko nasha naame?” Don okwa li a longifa noukeka omishangwa nhatu, nelalakano lokuhanga omutima waPeter. Tete, okwa pula Peter ngeenge oku shii ngoo kutya Kalunga oku na edina, ndele te mu pula e li leshe odikilila mOmbiibeli mEpsalme 83:18. Shikwao, opo e mu ulikile kutya omolwashike e na ko nasha naye, okwa pula Peter a leshe Ovaroma 10:13, 14, ovo va yelifa kutya “keshe tuu ou ta ifana edina lOmwene, oye ota xupifwa.” Xuuninwa, Don okwa lesha omushangwa waMateus 9:36, ndele ta pula vali Peter e u lileshele ye mwene. Ovelishe oyo oya ti: “Ndele eshi a tala eengudu dovanhu [Jesus] okwe di uditila onghenda, osheshi ovo va li va hepekwa, ndele va loloka va fa eedi dihe na omufita.” Peter okwa li a kengela omahodi, ndele ta pula Don, ta ti: “Mbela naame oumwe womeedi odo?”

Okudja opo, Peter okwa hovela okuninga omalunduluko. Okwa kala he likosho, ha kulula nawa eendjedi daye noha djala oikutu i li xwepo oyo a pewa kuDon. Okwa twikila nokuli okukala he lifile oshisho nawa.

Peter okwa li e na okambo kokuninga omadidilikoshango. Oinima oyo a shanga mo pehovelo oya li ii noinyikifa oluhodi, ashike oinima oyo opo a li a shange mo oya li ya yooloka ko. Shimwe shomuyo otashi ti ngaha: “Onde lihonga edina laKalunga nena. Paife ngeenge handi ilikana, ohandi dulu okwiilikana kuJehova. Oshihafifa shili okushiiva edina laye. Don okwa ti kutya Jehova ota dulu okuninga  kaume kange, molwaashi alushe okwe lilongekida okupwilikina kwaame, kashi na nee mbudi kutya onaini ile otashi pula shike.”

Eendjovo daxuuninwa odo Peter a popya okwa li e di nunina ovamwaina. Okwa shanga a ti:

“Kandi udite nawa nena. Ondi wete kutya omido paife oda ya. Nonande eli olo efiku lange laxuuninwa, ondi shii kutya ohandi ka mona kaume kange [Don] mOparadisa. Eshi tamu lesha eendjovo edi, ame kandi po vali. Ashike ngeenge omwa mono omulumenhu pefudiko lange muhe mu shii, popyeni naye, ndele alikana lesheni okambo kambulau kanini [ta ulike kokambo kokukonakona Ombiibeli, “Oshili oyo tai twala komwenyo waalushe,” oko kwa li a pewa omido da pita]. * Okambo oko oka popya kutya ohandi ka mona vali kaume kange mOparadisa. Onde shi itavela nomutima wange aushe. Omumwanyoko omuholike, Peter.”

Konima yefudiko, omumwainakadona waPeter, Ummi okwa ti: “Hanga oule womido mbali da ka lupuka, Peter okwa li e uya kwaame. Osha li oshikando shotete ta monika a hafa. Okwa li te limemesha nokuli.” Ummi okwa lombwela Don a ti: “Okambo ohandi ke ka lesha molwaashi oshinima osho sha dula okuhanga omutima wamumwameme oshi na okukala she likalekelwa.” Ummi okwa li yo a dimina va kale hava konakona naumwe womEendombwedi daJehova embo olo opo la li la piti Ombiibeli otai hongo lela shike?

Sha faafana, nafye ohatu dulu okukala ihatu tale ashike keholokepo lovanhu lokombada, hatu va ulikile ohole yashili nokukala tu na onheni novanhu vomaludi aeshe. (1 Tim. 2:3, 4) Ngeenge otwa kala hatu ningi ngaho, ohatu ka dula okulinyengifa omitima dovanhu ovo va fa Peter, tashi dulika ihava monika nawa momesho, ashike ove na omitima diwa. Ohatu dulu okukala noushili kutya Kalunga oo ha “tale omutima,” ota ka kulika oshili mwaavo ve na omitima diwa. — 1 Sam. 16:7; Joh. 6:44.