1, 2. Ongahelipi Omuyapostoli Paulus a ulika kutya oku na olupandu lefilonghenda laKalunga?

OMUYAPOSTOLI Paulus okwa shanga shi na sha naKalunga ta ti: “Efilonghenda laye inali hepela mo muame.” (Lesha 1 Ovakorinto 15:9, 10.) Paulus okwa li e shii kutya kali a wana okufilwa onghenda kuKalunga molwaashi okwa kala omupataneki wOvakriste.

² Lwopexulilo lokukalamwenyo kwaye, Paulus okwa li a shangela omulongi pamwe naye Timoteus, a ti: “Ohandi pandula ou a pa nge eenghono, oKristus Jesus, Omwene wetu, eshi a tala nge ame omudiinini nokwa tula nge meyakulolonga.” (1 Tim. 1:12-14.) Eyakulolonga olo ola li lashike? Paulus okwa lombwela ovakulunhuongalo vokuEfeso shi na sha naasho sha kwatelwa meyakulolonga laye, a ti: “Ame kombinga yange ndi he na [naasho] shomwenyo wange, shamha tuu handi wanifa nehafo okweenda kwange noshilonga eshi nde shi pewa kOmwene Jesus, ndi hepaulule evangeli longhenda yaKalunga.” — Oil. 20:24.

3. Paulus okwa li a pewa oukalele we likalekelwa ulipi? (Tala efano pehovelo loshitukulwa.)

 ³ “Evangeli” lilipi Paulus a udifa olo la divilika efilonghenda laJehova? Okwa lombwela Ovakriste vokuEfeso a ti: ‘Omwa uda epangelo longhenda yaKalunga, nde li pewa molweni.’ (Ef. 3:1, 2) Paulus okwa li a pewa oshinakuwanifwa shokuudifila evangeli ovo vehe fi Ovajuda opo navo va dule okukwatelwa mwaavo tava ka kala pamwe naKristus mepangelo lOuhamba wopaMessias. (Lesha Ovaefeso 3:5-8.) Molwaashi Paulus okwa kala omuladi moukalele waye, okwa tula po oshihopaenenwa shiwa kOvakriste vokunena nokwa ulika kutya efilonghenda laKalunga “inali hepela” muye.

4, 5. Omolwashike hatu dulu okutya ‘evangeli lOuhamba’ ola faafana nonghundana iwa ‘yefilonghenda laKalunga’?

⁴ Pefimbo eli lexulilo, oshiwana shaJehova osha pewa oshilonga shokuudifa ‘evangeli lOuhamba mounyuni aushe li ningile oiwana aishe ondombwedi.’ (Mat. 24:14) Etumwalaka olo hatu udifa, nalo oli li “evangeli longhenda yaKalunga” molwaashi omanangekonoupuna aeshe oo twa teelela oku ka mona eshi Ouhamba tau ka pangela ohatu ke a mona okupitila monghenda yaJehova omolwaKristus. (Ef. 1:3) Mbela ohatu hopaenene ngoo Paulus mokuulika olupandu omolwefilonghenda laJehova mokukala hatu kufa ombinga nouladi moukalele? — Lesha Ovaroma 1:14-16.

⁵ Moshitukulwa sha tetekela, otwe lihonga nghee fye tu li ovalunde hatu mono ouwa mefilonghenda laJehova meenghedi dihapu. Hano nafye otu na oshinakuwanifwa shoku honga ovanhu aveshe va shiive nghee Jehova ha ulike ohole nosho yo nghee tava dulu okumona ouwa pauhandimwe. Omoinima imwe ilipi omo Kalunga a ulika efilonghenda hatu dulu okukwafela ovanhu va kale ve na olupandu?

6, 7. Omonghedi ilipi hatu dulu okutandavelifa onghundana iwa yefilonghenda laKalunga ngeenge hatu yelifile ovanhu shi na sha nekulilo?

⁶ Ovanhu vahapu ihava kala ve udite etimba ngeenge va nyona, nomolwaasho ihava kala ve shii kutya omolwashike twa li twa pumbwa exupifo. Ndele pefimbo opo tuu opo, vahapu ohava mono kutya onghalamwenyo youkakombolilifa ihai eta ehafo lashili. Vahapu ihava kala ve udite ko kutya oulunde oshike, nghee hau tu kumu nosho yo kutya oshike tu na okuninga opo tu manguluke ko kuo, fiyo osheshi va yelifilwa keendombwedi daJehova. Ovanamitima diwa ohava kala ve udite va pepelelwa eshi tave lihonga kutya Jehova okwa ulika ohole yaye inene nosho yo efilonghenda laye eshi a tuma omona kombada yedu opo e tu kulile moulunde nefyo. — 1 Joh. 4:9, 10.

⁷ Paulus okwa popya kombinga yaJesus omona waJehova a ti: “Muye otu nekulilo omolwohonde yaye, edimepo lomanyonauno okoupuna wonghenda yaye.” (Ef. 1:7) Ekuliloyambo laKristus oli li euliko lohole inene yaKalunga notali ulike ounene wefilonghenda laye. Itashi hekeleke tuu okushiiva kutya ngeenge otwa kala neitavelo mekuliloyambo laJesus, omatimba etu otaa ka dimwa po neliudo letu otali ka kala la koshoka! (Heb. 9:14) Oyo kai fi tuu onghundana iwa okulombwela vamwe!

8. Omolwashike ovanhu ovalunde va pumbwa okuhangana naKalunga?

⁸ Otu na oshinakuwanifwa shokushiivifila vakwetu kutya otava dulu okupanga oukaume nOmushiti wavo. Ngeenge ovanhu kave na eitavelo mekuliloyambo laJesus, Kalunga okwe va tala ko ve li ovatondi vaye. Omuyapostoli Johannes okwa shanga a ti: “Ou ta itavele Omona, oye e nomwenyo waalushe; ndelenee ou iha dulika kOmona, ita ka mona omwenyo, ndelenee ehandu laKalunga otali kala kombada yaye.” (Joh. 3:36) Oshihafifa eshi ekuliloyambo laKristus le shi ninga tashi shiiva opo ovanhu va kale va hangana naKalunga. Paulus okwa ti: “Nanye yo ava mwa li nale ovaliteeki novatondadi vaye momadilongo eni molwoilonga ii, Ye e mu hanganifa paife molutu lombelela yaye omolwefyo laye, opo e mu tule koshipala shaye ovayapuki, mu he noshipo nomu he noushima.” — Kol. 1:21, 22.

9, 10. (a) Oshinakuwanifwa shilipi Kristus a pa ovamwaxe ovavaekwa? (b) Ongahelipi “eedi dimwe” hadi kwafele ovamwaxe ovavaekwa?

⁹ Kristus okwa pa ovamwaxe ovavaekwa vokombada yedu osho Paulus e shi ifana kutya “oshilongayakulo shehanganifo.” Paulus okwa li a shangela Ovakriste ovavaekwa vomefelemudo lotete opo a yelife oshinima osho, a ti: “Ashishe eshi tashi di muKalunga, ou e tu hanganifa naye mwene muKristus nokwe tu pa oshilongayakulo shehanganifo. Osheshi Kalunga okwa kala muKristus nokwa hanganifa ounyuni naye mwene, ndele ine va valulila omatauluko avo, ndele okwe tu pa ondjovo yehanganifo. Ponhele yaKristus ofye hano ovatumwa, ndele Kalunga ote tu kumaidifa. Ponhele yaKristus ohatu mu ilikana: Itaveleni mu hanganifwe naKalunga.” — 2 Kor. 5:18-20.

¹⁰ [“Eedi dimwe, NW”] oda tala ko okukwafela ovamwaxe ovavaekwa moukalele shi li oufembanghenda. (Joh. 10:16) Molwaashi ohava longo ve li ovatumwa vaKristus, ohava kufa ombinga mokuhonga ovanhu oshili noku va kwafela va kale ve na ekwatafano naJehova. Osho oshi li oshitukulwa sha fimana shoshilonga shokuudifa onghundana iwa yefilonghenda laKalunga.

11, 12. Omolwashike shi li onghundana iwa kovanhu okulihonga kutya otava dulu okwiilikana kuJehova?

¹¹ Ovanhu vahapu ohava ilikana molwaashi ohashi va ningifa va kale ve udite va pepelelwa, ndele inava itavela naanaa kutya Kalunga oha udu omailikano. Ova pumbwa oku shiiva kutya Kalunga “Omuudi womailikano.” Omupsalme David okwa shanga ta ti: “Oove, Omuudi womailikano, ombelela aishe i nokuuya kuove. Owii wange omuhapu unene; ndelenee Ove to tu dimine po omanyono etu.” — Eps. 65:3,4.

¹² Jesus okwa lombwela ovashikuli vaye a ti: “Ngenge tamu indile sha medina lange, Ame ohandi shi ningi.” (Joh. 14:14) Okwiindila “sha” osha hala okutya, oshinima keshe osho shi li metwokumwe nehalo laJehova. Johannes okwe tu lombwela a ti: “Elineekelo eli letu tu li na muye oleli: ngenge hatu mu indile sha pahalo laye, ote tu udu.” (1 Joh. 5:14) Osha fimana neenghono okuhonga vamwe kutya eilikano kali fi oshinima osho hashi kwafele ashike omaliudo etu, ndele oli li onghedi ikumwifi yokuya  “kolukalwa lefilonghenda” laJehova. (Heb. 4:16) Ngeenge otwe va hongo okwiilikana monghedi ya yuka, okwiilikana kwaao ve na okwiilikana kuye nokwiilikana oinima i li mondjila, ohatu va kwafele va ehene popepi naJehova nova mone ehekeleko pefimbo loudjuu. — Eps. 4:2; 145:18.

13, 14. (a) Ovavaekwa otava ka kala ve na oufembanghenda u wa ulipi monakwiiwa? (b) Ovavaekwa otava ka longela ovanhu oshilonga shiwa shilipi?

¹³ Efilonghenda laJehova otali ka kala po nokonima yexulilo longhalelo ei youkolokoshi. Paulus okwa shanga kombinga youfembanghenda oo Kalunga a pa 144 000, ovo va ifanwa va ka pangele pamwe naKristus mOuhamba waye womeulu, a ti: “Kalunga ou a yada efilonghenda omolwohole yaye inene a kala e tu hole, okwe tu tula yo omwenyo pamwe naKristus, ofye ava twa li twa fila moulunde—okonghenda mwa xupifwa. Ndele okwe tu nyumuna pamwe naye, nokwe tu tula mumwe naye moikwaulu muKristus Jesus, opo a holole momafimbo okomesho oupuna wefilonghenda laye u he nondjele mouwa waye kufye muKristus Jesus.” — Ef. 2:4-7.

¹⁴ Jehova okwa longekidila Ovakriste ovavaekwa oinima ikumwifi eshi tava ka pangela pamwe naKristus meulu. (Luk. 22:28-30; Fil. 3:20, 21; 1 Joh. 3:2) Jehova ote ke va ulikila “oupuna wefilonghenda laye.” Otava ka ninga “Jerusalem Shipe” omuhombolwa waKristus. (Eh. 3:12; 17:14; 21:2, 9, 10) Otava ka longa pamwe naJesus “okuvelula oiwana,” tava ka wilika ovanhu ovaduliki va mangululwe moulunde nefyo noku va twala mewaneneno. — Lesha Ehololo 22:1, 2, 17.

15, 16. Ongahelipi Jehova taka ulikila “eedi dimwe” efilonghenda laye monakwiiwa?

¹⁵ MOvaefeso 2:7 omwa popiwa kutya efilonghenda laKalunga otali ka ulikwa “mounyuni mupe tau ke u ya.” Nopehe na omalimbililo, monghalelo yoinima ipe yaJehova otamu ka kala “oupuna wefilonghenda laye.” (Luk. 18:29, 30) Jehova ota ka ulika onghenda yaye inene kombada yedu eshi ta ka nyumuna mo ovanhu “moshovafi.” (Job 14:13-15; Joh. 5:28, 29) Ovalumenhu novakainhu ovadiinini vopefimbo lonale ovo va fya fimbo Kristus ina yamba po omwenyo waye mefyo nosho yo aveshe ‘veedi dimwe’ ovo va fya ve li ovadiinini momafiku aa axuuninwa, otava ka alulilwa momwenyo ndele tava twikile okulongela Jehova.

¹⁶ Ovanhu omamiliyona ovo va fya vehe shii Kalunga, navo otava ka nyumunwa. Otava ka pewa omhito yokuulika ngeenge ova hala okudulika kepangelo laJehova. Johannes okwa shanga a ti: “Ndele nda mona oonakufya, vanini novanene, ve li ofika moipafi yolukalwapangelo; nomambo a nyanunwa; nembo likwao la nyanunwa, olo lomwenyo. Noonakufya ova tokolelwa ei ya shangwa momambo pailonga yavo. Nefuta ola yandja ovafi ava va li mo, nefyo noshovafi oya yandja ovafi ava va li mo; ovo va tokolwa, keshe umwe, pailonga yavo.” (Eh. 20:12, 13) Oshoshili kutya ovo tava ka nyumunwa otave ke lihonga nghee ve na okutula moilonga omafinamhango aKalunga oo e li mOmbiibeli. Ove na oku ka dulika komalombwelo mape oo taa ka kala “momambo” oo e na oiteelelwa yaJehova yomounyuni mupe tau uya. Okuhololwa kwoshikalimo shomambo oo otaku ka kala euliko limwe vali lefilonghenda laJehova.

17. Oshike tu na okukaleka momadiladilo ngeenge hatu udifa?

¹⁷ Eshi exulilo tali ehene popepi, elalakano letu olo okuudifila ovanhu onghundana iwa yOuhamba shi dulife nale. (Mark. 13:10) Nopehe na omalimbililo, onghundana iwa oya divilika efilonghenda laJehova. Otu na okukaleka oshinima osho momadiladilo eshi hatu longo oshilonga shokuudifa. Elalakano letu lokuudifa olo okufimanekifa Jehova. Ohatu dulu okuninga ngaho mokuulikila ovanhu kutya omaudaneko aeshe e na sha nomanangeko noupuna omounyuni mupe oku li euliko lefilonghenda laJehova.

18, 19. Ohatu shiivifa ngahelipi efilonghenda laJehova?

¹⁸ Eshi hatu udifile ovanhu, ohatu dulu oku va yelifila kutya mepangelo laKristus ovanhu otava ka mona ouwa mekuliloyambo nomokweendela ko kwefimbo otava ka fika mewaneneno. Ombiibeli oya ti: “Oishitwa yovene otai ka mangululwa moupika wenyonauko i ye memanguluko loshinge shovana vaKalunga.” (Rom. 8:21) Osho otashi ka shiiva ashike omolwonghenda yaJehova.

¹⁹ Otu na oufembanghenda wokulombwela ovanhu aveshe ovo va hala okupwilikina keudaneko laKalunga tali hangwa mEhololo 21:4, 5, olo tali ti: “Ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” Ndele Jehova oo e li omutumba kolukalwapangelo okwa ti: “Tala, aishe ohandi i shitukifa i ninge ipe.” Ndele ye okwa weda ko ta ti: “Shanga, osheshi eendjovo edi odo doshili di shii kulineekelwa.” Ngeenge hatu udifile ovanhu onghundana iwa nouladi, ohatu shiivifa efilonghenda laJehova.