Onda dalelwa muCiudad Mante, oshitukulwa shiwa shi li muTamaulipas, moMexico. Ovanhu vahapu vomoshilando osho ohava yandje nehalo liwa novanambili. Ndele shinyikifa oluhodi, moshitukulwa omwa li mwa nyika oshiponga neenghono molwaashi omwa li ovalongi vominyonena ve liunganeka.

Otwa dalwa ovamati vane, ame omutivali. Ovadali vange ova shashifa nge mOngeleka yaKatoolika, nokonima yefimbo onda ka kala mongudu yolwiimbo yongeleka. Onda li nda hala okuhafifa Kalunga molwaashi onda li nda tila oku ka tokolwa noku ka kala handi pi momundilo woheli fiyo alushe.

Eshi nda li ndi na omido nhano, tate okwe tu fiya po. Osho osha li sha nyikifa nge oluhodi neenghono nosha ningifa nge ndi kale ndi udite ndihe na ekwafo lasha. Kanda li ndi udite ko kutya omolwashike e tu fiya po, molwaashi otwa li tu mu hole neenghono. Meme okwa li e na okulonga noudiinini eevili dihapu opo e tu file oshisho atushe tu li vane.

Omolwonghalo oyo, onda li nda efa po ofikola ndele handi pange oukaume nounona ovo va kula. Ova li va honga nge okutukana, okushila omakaya, okuvaka nokulwa neengonyo. Molwaashi onda li ndi hole okupangela vamwe, onde lihonga okudenga eengonyo, okukondja, oukwaita nosho yo okulongifa oilwifo. Onda hovela okukala ndi hole elongifo leenghono fimbo nda li ndi na omido omulongo nasha. Luhapu onda li handi kwatelwa momaumbafano, noikando ihapu onda li handi kala nda nangala handi shisha ohonde, novanhu ova li hava diladila kutya onda fya. Meme okwa li ha kala a nyika oluhodi neenghono ngeenge a li a hanga handi di eehonde nokwa li ha kufa nge po ndele ta endelele a twale nge koshipangelo.

Eshi nda li ndi na omido 16, kaume kange umwe twa kula naye wedina Jorge okwa li e tu talela po keumbo letu. Okwa li e tu lombwela kutya oku li umwe womEendombwedi daJehova nonokutya okwa hala oku tu lombwela etumwalaka la fimana. Okwa li a hovela oku tu yelifila kombinga yeitavelo laye, ta longifa Ombiibeli. Inandi lesha nande onale Ombiibeli, nonda li nda tunhukwa okulihonga kombinga yedina laKalunga nomalalakano aye. Jorge okwa li e tu pula ngeenge otwa hala okukonakona Ombiibeli pamwe naye, notwa li twe shi tambula ko.

Onda li nda pepelelwa neenghono okulihonga oshili kombinga yomundilo woheli, kutya kai fi ehongo lOmbiibeli. (Epsalme 146:4; Omuudifi  9:5) Eshi nde lihonga oushili oo, ihandi kala vali nda tila Kalunga sha pitilila. Ponhele yaasho, onda hovela okukala nde mu tala ko e li Tate omunahole oo a halela ovana vaye ouwa.

Eshi nda twikila okukonakona Ombiibeli, onda li nda mona kutya onda pumbwa okulundulula omaukwatya ange. Onda li nda pumbwa okukulika elininipiko nokweefa po elongifo leenghono. Onda kwafelwa komayele oo e li mo 1 Ovakorinto 15:33, oo taa ti kutya ‘ookaume vai ohava nyono po eenghedi diwa.’ Onda mona kutya ngeenge onda hala okulundulula omaukwatya ange, onda pumbwa okweefa po okweendafana novanhu ovo ve na enwefemo lii. Onghee hano, onda efa po ookaume kange vonale, ndele handi pange oukaume noilyo yeongalo lopaKriste lashili, ovanhu ovo va tokola okukala va yooloka ko omolwokutula moilonga omafinamhango Ombiibeli, ndele hamolwaashi hava denge eengonyo ile hava longifa eenghono.

Onda kwafelwa yo neenghono kOmushangwa oo u li mOvaroma 12:17-19, ovo tava ti: ‘Inamu alulila nande omunhu owii waye. Ngenge tashi dulika, kombinga yeni kaleni nombili novanhu aveshe. Inamu alulila omunhu owii, shaashi opa shangwa: Ehandu olange, ame handi futu, Omwene osho ta ti.’ Onda dimina kutya Jehova ota ka ungaunga nokuhenouyuki kuye mwene nopefimbo la wapala. Mokweendela ko kwefimbo, onda li nda efa po elongifo leenghono.

Itandi dimbwa nande oshikando shimwe konguloshi nda li handi shuna keumbo. Onda li nda ponokelwa kongudu yovanyasha vomongudu imwe twa li hatu lwifa nale, nomuwiliki wavo okwa li a denga nge kombuda, nokwiingida ta ti: “Lipopila!” Pomhito oyo, onda li nda ilikana pauxupi kuJehova, handi mu pula a kwafe nge ndi lididimikile olushindo olo. Nonande onda li nda halelela oku mu alulila owii, onda li nda pondola okudja po puvo. Ngomongula, onda li nda shakena nomuwiliki wongudu oyo. Onda li nda handuka nonda hala oku mu alulila owii, ashike onda li nda ilikana vali momutima kuJehova a kwafele nge ndi lipangele. Opo nee onda li nda kumwa eshi omunyasha oo e uya pwaame ndele ta ti: “Dimine nge po omolwoshinima osho sha ningwa po onguloshi. Onda hala okukala nde ku fa. Onda hala okukonakona Ombiibeli.” Onda li nda hafa eshi nda dula okupangela ehandu lange. Kakele kaasho, onda hafa eshi twa hovela okukonakona Ombiibeli pamwe.

Shinyikifa oluhodi, ovaneumbo letu aveshe kava li va twikila okukonakona Ombiibeli pefimbo opo. Ashike, onda li nda tokola toko okutwikila okukonakona nokuhaefa nande omunhu ile oshinima shonhumba shi imbe nge. Onda li ndi shii kutya okweendafana noshiwana shaKalunga otaku ka velula oipute yange yopamaliudo nohandi ka kala ndi na ookaume ovo nda pumbwa. Onda twikila okuninga exumokomesho, nomo 1991, onda ninginifwa ndi li umwe womEendombwedi daJehova.

Onda li ndi na ekuni, handi pangele vamwe nohandi longifa eenghono. Ashike Eendjovo daKalunga oda lundulula filufilu onghalamwenyo yange. Paife ohandi udifile vamwe etumwalaka lombili olo la dja mOmbiibeli. Onda mona oufembanghenda wokulonga oilonga yefimbo li yadi oule weedula 23 da pita.

Pomhito imwe, onda li handi longo oilonga yeliyambo koshitaimbelewa shEendombwedi daJehova moMexico. Fimbo nda li oko, onda li nda shakeneka Claudia, Omukriste omunyasha ha longo noudiinini, notwa li twa hombola mo 1999. Inandi pandula tuu Jehova eshi a nangeka nge noupuna nakaume omudiinini a tya ngaho!

Otwa longa pamwe meongalo lElaka lOkuudika laMexico, hatu kwafele eembolo di lihonge kombinga yaJehova. Konima yefimbo, otwa li twa shivwa tu tembukile koBelize tu ka honge ovanhu Ombiibeli moshilongo osho. Nonande onghalamwenyo oku oi li paunafangwa, otu na keshe osho twa pumbwa opo tu kale twa hafa. Itatu dulu oku i pingakanifa nasha.

Konima yefimbo, meme okwa li a hovela vali okukonakona Ombiibeli ndele ta ninginifwa. Natango, omumwamememati ou woshiveli, omukulukadi waye nounona vavo navo ova ninga Eendombwedi daJehova. Ookaume kange vonale vamwe ovo nda udifila etumwalaka lOuhamba paife navo otava longele Jehova.

Mupya munene, ovapambele vange vamwe ova fya molwaashi inava efa po elongifo leenghono. Ngeno naame kanda li nda ninga omalunduluko, ngeno naame pamwe onda fya nde va fa. Ohandi pandula Jehova eshi a nanena nge kuye nosho yo kovalongeli vaye, ovo va honga nge nelididimiko nosho yo nonghenda ndi tule moilonga omafinamhango Ombiibeli monghalamwenyo yange.