Kalunga okwa pa ovanhu oshali ye likalekelwa, okudula okupopya naye noku mu hololela omaliudo etu okupitila meilikano. David okwa li a ilikana a ti: “Oove, Omuudi womailikano, ombelela aishe i nokuuya kwoove.” (Epsalme 65:2) Otu na okwiilikana ngahelipi opo Kalunga e tu pwilikine noku tu nangeka noupuna?

Omailikano eni opaumwene ohae mu pa omhito opo mu “mu mbubulileni omitima deni,” ile mu mu lombwele omaliudo eni omoule. (Epsalme 62:8) Omunaenghono adishe okwa lenga omailikano eni oo haa di komutima.

Nonande Kalunga oku na omadinafimaneko mahapu, oku na ashike edina limwe lopaumwene. “Aame Jehova, olo edina lange.” (Jesaja 42:8, NW) Edina Jehova ola holoka mOmishangwa Diyapuki lwoikando 7 000 lwaapo. Ovaprofeti vahapu eshi va li hava ilikana kuKalunga ova li hava longifa edina laye. Abraham okwa ti: “Jehova, pitike nge ndi popye vali.” (Genesis 18:30, NW) Nafye otu na okulongifa edina laKalunga, Jehova, ngeenge hatu ilikana.

Kashi na nee mbudi kutya ohatu popi elaka lilipi, Kalunga oku shii omaliudo nomadiladilo etu. Eendjovo daye otadi tu shilipaleka tadi ti: “Kalunga ke na okatongo, ndele oha tambula ko omunhu womoshiwana keshe oo he mu tila noha longo osho sha yuka.” — Oilonga 10:34, 35.

Ndele nande ongaho, opo tu nangekwe noupuna kuKalunga, otwa pumbwa okuninga shihapu shihe fi ashike okwiilikana. Moitukulwa tai shikula, ohatu ka tala nghee hatu dulu oku shi ninga.