Moses okwa popya kutya ngeenge otwa dulika koipango yaKalunga, ohatu ka mona omanangeko noupuna aYe. (Deuteronomion 10:13; 11:27) Ihatu dulika kuKalunga molwaashi ashike twa tila okuhandukilwa. Omaukwatya mawa aKalunga oo hae tu linyengifa tu dulike kuye molwaashi otu mu hole notwa hala okuhenuka okulonga osho tashi dulu oku mu nyematifa . “Ohole yokuhola Kalunga oyo ei kutya, tu diinine oipango yaye.” — 1 Johannes 5:3.

Ndele ongahelipi okudulika kuKalunga hashi eta omanangeko noupuna? Natu ka taleni keenghedi mbali.

“Aame Omwene Kalunga koye, ou handi ku longo eshi tashi ku wapalele, ndele handi ku tula mondjila ei u nokweenda nayo.” — JESAJA 48:17.

Jehova Kalunga, Omushiti wetu, oku tu shii nohe tu pe ewiliko olo twa pumbwa. Ngeenge otwa hala omahongo aye e tu kwafele tu ninge omatokolo opandunge, otwa pumbwa okulihonga mOmishangwa osho Kalunga a hala tu ninge noku shi tula moilonga.

“Ovo tava kala va hafa ovovo hava pwilikine eendjovo daKalunga noku di diinina.” — LUKAS 11:28.

Kunena, ovanhu omamiliyona ovo hava dulika kEendjovo daKalunga ove na ehafo lashili. Pashihopaenenwa, ope na omulumenhu umwe wokuSpain oo a li ha handuka diva noha ungaunga navamwe nai, mwa kwatelwa omukulukadi waye. Efiku limwe okwa lesha momashangelo aMoses kombinga yomwenyo muwa waJosef, omonamati waJakob. Josef okwa li a landifwa po e li omupika nokutulwa modolongo shihe li pauyuki; ashike nande ongaho, okwa kala a ngunguma, e na ombili nokwa dimina po vamwe. (Genesis, etukulwa 37-45) Omulumenhu oo wokuSpain okwa ti: “Okudiladila koshihopaenenwa shaJosef oshe linyengifa nge ndi kulike omaukwatya, ngaashi omwenyo muwa, onghenda nosho yo elipangelo. Oshidjemo, paife onda hafa.”

Omishangwa Diyapuki odi na ewiliko li na sha nanghee tu na okuungaunga navamwe. Natu ke shi kundafaneni moule moshitukulwa tashi shikula.