Okudja ashike pehovelo leshito, Kalunga okwa kala ha popi novanhu okupitila movaengeli nosho yo movaprofeti. Shikwao vali, okwa hoolola etumwalaka laye nosho yo omaudaneko aye a shangwe. Kalunga okwa udaneka kutya ohatu ka kala twa hafa monakwiiwa. Mbela openi hatu dulu okuhanga omaudaneko oo?

Kalunga okwe tu pa etumwalaka laye okupitila mOmishangwa daye Diyapuki. (2 Timoteus 3:16) Ongahelipi Kalunga a longifa ovaprofeti va shange etumwalaka laye? (2 Petrus 1:21) Kalunga okwa tula momadiladilo avo osho ve na okushanga. Osho ohatu dulu oku shi faneka ngaha. Otashi dulika omunangeshefa a pule hamushanga waye e mu shangele ko ketumwalaka laye, netumwalaka olo ohatu ke litala ko la dja komunangeshefa, ndele haku hamushanga. Sha faafana, nonande Kalunga okwa longifa ovalumenhu va shange etumwalaka laye, oye lela Omushangi wOmbiibeli.

Eendjovo daKalunga onda fimanenena neenghono nokwa hala ovanhu aveshe ve di leshe nove di ude ko. Kunena, “onghundana iwa yaalushe” otai udifilwa ‘oiwana, omihoko nosho yo omalaka aeshe.’ (Ehololo 14:6) Kekwafo laJehova, Ombiibeli aishe, ile oshitukulwa shayo, oya tolokwa momalaka e dulife 3 000 i dulife omambo aeshe mounyuni.