OSHALI ye likalekelwa oi na oku tu linyengifa tu ulike olupandu. Jesus okwa li a divilika oshilihongomwa osho konima eshi a velula ovalumenhu omulongo ovo va li ve na omukifi unyanyalifa, oo wa li uhe na epango pefimbo opo. Umwe womovalumenhu ovo omulongo ‘okwa li a aluka nokuhambelela Kalunga nondaka inene.’ Jesus okwa li a pula a ti: “Hamulongo ovo va velulwa? Venya omugoi ove li peni?” (Lukas 17:12-17) Oshike hatu lihongo moshinima osho? Ohatu dulu okudimbwa diva ouwa oo vamwe ve tu ningila.

Ekulilo inali fa eeshali dikwao. Olo oshali inenenene oyo ya yandjwa mondjokonona. Ndele mbela ongahelipi to dulu okulinyenga kwaasho Kalunga e ku ningila?

• Shiiva Omuyandji walo. Ovanhu itava ka mona omwenyo waalushe pautomatika omolwekulilo. Ponhele yaasho, Jesus okwa popya eshi a li ta ilikana kuKalunga a ti: ‘Nomwenyo waalushe oo tuu ou, vo ve ku shiive, Oove auke Kalunga kashili, naau we mu tuma, Jesus Kristus.’ (Johannes 17:3) Ngeenge owa lombwelwa kuumwe kutya ope na omunhu a xupifa omwenyo woye eshi wa li okaana, mbela ito ka kala wa hala okulihonga shihapu kombinga yomunhu oo nonokutya omolwashike e ku xupifa? Jehova Kalunga, oo a yandja oshali yekulilo oyo tai xupifa eemwenyo, okwa hala u mu shiive nou kale yo u na ekwatafano lopofingo naye. Ombiibeli oye tu ladipika ya ti: “Eheneni  kuKalunga, opo nee Ye ta ehene kunye.” — Jakob 4:8.

• Kala u na eitavelo mekulilo. “Ou ta itavele Omona, oye e nomwenyo waalushe.” (Johannes 3:36) Okukala neitavelo osha hala okutya ngahelipi? Osha hala okutya okukatuka eenghatu. Okukala neitavelo mekulilo otashi pula okukatuka eenghatu donhumba. (Jakob 2:17) Eenghatu dilipi mbela? Oshali ohai ningi ashike yoye ngeenge owa yelula omaoko opo u i tambule. Onghee hano, ou na okuyelula omaoko meityo lopafaneko opo u tambule ekulilo. Ngahelipi mbela? Lihonga kutya Kalunga okwa hala u kale nonghalamwenyo ya tya ngahelipi, opo nee to kala metwokumwe nasho. * Ilikana kuKalunga e ku dimine po nou kale neliudo la yela. Kala ho ilikana u na elineekelo filufilu kutya aveshe ovo ve na eitavelo mekulilo otava ka kala fiyo alushe mombili, meameno nova hepuluka. — Ovaheberi 11:1.

• Kala pEdimbuluko lefyo laJesus. Jesus okwa tota po oshiningwanima osho hashi ningwa omudo keshe opo shi tu dimbulukife efiloshisho lekulilo. Okwa popya shi na sha nokudimbuluka oshiningwanima osho a ti: “Shi ningeni nokudimbulukwa nge.” (Lukas 22:19) Eendombwedi daJehova otadi ka dimbuluka efyo laJesus mEtivali, 11 Aprili 2017, konima yeningino letango. Okwoongala oko otaku ka kwata oule wovili lwaapo notaku ka kala kwa kwatela mo oshipopiwa tashi yelifa eityo lefyo laJesus nosho yo nghee tali dulu okweeta ouwa paife nomonakwiiwa. Omudo wa ya, ovanhu omamiliyona 20 lwaapo mounyuni aushe ova li va ongala pEdimbuluko. Ohatu ku shivi nomutima aushe u uye tu ulikeni olupandu letu omolwoshali inenenene yaKalunga.