Ovanhu ovo hava wanifa po oilonga ove shii okulineekelwa. Ohava longo oilonga yavo noukeka nosho yo pefimbo.

Okaana otaka dulu okulihonga okuwanifa po oilonga nokuli nonande okanini. Embo Parenting Without Borders ola ti: “Okaana ohaka hovele okupwilikina osho taka lombwelwa, eshi ke na eemwedi omulongo nanhano, nongeenge ka wanifa eemwedi omulongo nahetatu ohaka hovele okuhetekela osho ovadali tava ningi. Moitukulwa ihapu, ovadali ohava hovele okuhonga ounona vavo nghee tava dulu okukwafela meumbo, eshi ve na omido nanhano fiyo heyali. Nonande ovanini, ohava wanifa po nawa oinakuwanifwa ihapu.”

Moitukulwa imwe, ovanyasha vahapu, ovo va finda mepupi loukulunhu, ohava kendabala okukala kuvo vene, ashike ihava pondola nohava shuna va ka kale novadali vavo. Peemhito dimwe, ohashi kala ngaho, molwaashi ovanyasha inava hongwa nande onale nghee ve na okulongifa nawa oimaliwa, okufila oshisho eumbo, ile nghee ve na okuwanifa po eemhumbwe da keshe fiku.

Onghee hano, oshiwa okudeulila ovana voye oinakuwanifwa oyo hai longwa kovakulunhu. Embo How to Raise an Adult ola ti: “Kape na omudali a hala ounona vaye va kale ve likolelela muye fiyo osheshi va wanifa omido omulongo nahetatu, opo nee te va undwile.”

Va pa oshinakuwanifwa shakeshe fiku meumbo.

EFINAMHANGO LOPAMBIIBELI: “Oilonga aishe idjuu otai likolifa.” — Omayeletumbulo 14:23.

Ounona vanini ohava kala alushe va hala okukwafela ovadali vavo mwaashishe osho tava ningi. Oto dulu okulongifa omhito ya tya ngaho mokupa ounona voye va longe oilonga meumbo.

Ovadali vamwe kave hole okuninga ngaho. Ohave lipopile kutya ounona vavo ove na nale oifiilwalonga ihapu yofikola, omolwashike ve na okuwedela ko komutengi wavo noilonga yomeumbo?

Kakele kaasho, ounona ovo hava longo oilonga yomeumbo ovo unene hava pondola kofikola, molwaashi ohava ikilile oinakuwanifwa noku i manifa pefimbo. Natango, embo Parenting Without Borders, ola ti: “Ngeenge otwa kelele ounona ve tu kwafele ofimbo ve na ehalo novanini, otava ka diladila kutya inashi fimana okukwafela vamwe . . . Otava ka kala yo va teelela okuningilwa keshe shimwe.”

Ngaashi embo olo la popya, ngeenge ounona ohava longo pandjikilile oilonga meumbo, ohave lihongo okukwafela vamwe nokuhakala ve lihole vo vene. Oilonga oyo ohai ningifa ounona va kale ve udite va fimanekwa moukwaneumbo nove na oshinakuwanifwa shoku i longa.

Kwafela ounona voye va shiive kutya epuko keshe oli na oilanduliko.

EFINAMHANGO LOPAMBIIBELI: “Pwilikina epukululo u itavele outekuduliko, opo u mone eendunge dokomesho.” — Omayeletumbulo 19:20.

Ngeenge ounona voye ova ningi epuko, pashihopaenenwa, ngeenge okamonamati, ile okamonakadona koye oka nyonauna oshinima shovanhu shihe fi oshiningilewina, ino shi holeka. Monghalo ya tya ngaho, ounona otashi dulika va mone oilanduliko, pashihopaenenwa ngaashi okuyandja ombili, ile nokuli ve shi futile po.

Ngeenge ounona ova kala ve shii kutya ovo ve na oshinakuwanifwa shokuwapeka omapuko avo, otashi ke va kwafela

• va kale ovanashili nova dimine omapuko avo

• va henuke okupa vamwe ombedi

• va henuke okuninga omalipopilo

• va yandje ombili apa sha pumbiwa