KOVALIHOMBOLI
1:Okudiinina ohombo
OSHA HALA OKUTYA NGAHELIPI?
Ovashamane novakulukadi ovo vadiinini kohombo yavo ohave i tale ko i li elongekido tali kalelele, naasho ohashi va kwafele va kale ve lineekelafana. Kaume kopahombo keshe oha kala e na elineekelo kutya mukwawo naye okwa fimaneka elongekido olo, nokuli nopomafimbo madjuu.
Vamwe ohava kala ve udite kutya otava fininikwa va kale mohombo kookaume ile kovapambele. Mepingafano naasho, oudiinini wavo ou na okukala wa kanghamena kohole yomoule yokuholafana nosho yo kokufimanekafana.
EFINAMHANGO LOMBIIBELI: ‘Omushamane ina efa po omukulukadi waye.’ — 1 Kor. 7:11.
Micah okwa ti: “Ngeenge ou li omudiinini kohombo yeni, ito ka kala ho endelele okuhanduka. Oho endelele okudimina po nokuyandja ombili. Ou na okutala ko oupyakadi u li endangalati, olo tali dulu okutaulukwa, ndele hatomheno loku mu kufa kumwe.”
OMOLWASHIKE SHA FIMANA?
Ngeenge pa holoka omaupyakadi, ovalihomboli ovo vehe fi ovadiinini kohombo yavo ohava fiki diva pexulifodiladilo kutya, ‘inatu liwapalela’ nohava kongo eemhito dokufiya po ohombo.
Jean okwa ti: “Ovanhu vahapu ohava i mohombo ve na ediladilo kutya ngeenge oinima inai ke va endela nawa, otava dulu oku i teya. Ovo hava i mohombo, tashi dulika tava diladila kutya onai ka teke fikulimwe, ihava kala ovadiinini okudja kehovelo.”
OSHO TO DULU OKUNINGA PO
LIPULA KUTYA
Ngeenge pa holoka okuhaudafana . . .
-
Mbela oho lihange to lipe oushima eshi wa hombola omunhu a tya ngaho?
-
Mbela oho lihange to diladila u li nomunhu umwe e lili?
-
Mbela oho lihange to popi oinima ngaashi “ohandi ku fii po,” ile “ohandi ka konga omunhu oo e hole nge shili”?
Ngeenge enyamukulo loye kulimwe lomomapulo oo ile aeshe oheeno, paife olo efimbo lokupameka ohombo yeni.
OSHO TAMU DULU OKUKUNDAFANA MU LI OVALIHOMBOLI
-
Mbela ohombo yetu otai nane nonhatu? Ngeenge osho, omolwashike?
-
Enghatu dilipi tu na okukatuka opo tu pameke ohombo yetu?
OMAETEPO
-
Kala ho shangele kaume koye kopahombo outumwalaka kutya ou mu hole
-
Ulika kutya ou li omudiinini mokutula efano lakaume koye kopahombo poshitaafula shoye koilonga
-
Kala ho dengele kaume koye kopahombo ongodi, ngeenge u li koilonga, ile pamwe pe lili
EFINAMHANGO LOMBIIBELI: “Osho Kalunga a tula kumwe, inashi kufwa kumwe komunhu.” — Mat. 19:6.
