KOVANYASHA
9: Oukwatya womunhu
OSHA HALA OKUTYA NGAHELIPI?
Oukwatya womunhu owa kwatela mo shihapu shihe fi ashike edina nosho eholokepo laye. Owa kwatela mo eenghedi, osho wa itavela, nosho yo omaukwatya amwe vali. Paulelalela, oukwatya womunhu oinima oyo hai mu didilikifa mo; oyo hai holola omaukwatya aye omeni nosho yo okombada.
OMOLWASHIKE SHA FIMANA?
Ngeenge owa tokola nale kutya oto ka kala omunhu a tya ngahelipi, ito ka efa u twalwaatwalwe, ile u nwefwe mo keenghedi doomakula voye.
Adrian okwa ti: “Ovanhu vahapu ova fa omapopifa oo haa kala meefitola. Hao haa hoolola oikutu oyo e na okudjalekwa ndele ovanhu.”
Courtney okwa ti: “Onde lihonga okupopila osho shi li mondjila, nonande otashi dulika shi kale shijduu. Ohandi dulu okudidilika mo ookaume kange kashili noupu monghedi omo have linyenge nosho yo omo handi linyenge ngeenge tu li pamwe.”
EFINAMHANGO LOMBIIBELI: “Inamu hopaenena ovanhu vomounyuni ou, ndele lundululeni onghedi yeni yokudiladila.” — Ovaroma 12:2.
OSHO TO DULU OKUNINGA PO
Lipula kutya ove omunhu a tya ngahelipi paife nonokutya owa hala oku ka kala omunhu a tya ngahelipi mokukonakona okudula kwoye, omaunghundi nosho etaleko loye. Opo u dule okuninga ngaho, oshiwa okunyamukula omapulo taa shikula.
Okudula kwoye: Ondi na owino ile ounghulungu moinima ilipi? Oinima ilipi ndi na ondjungu muyo? (Pashihopaenenwa: Ohandi fikama ngoo diva? Ondi na elipangelo? Ohandi longo noudiinini? Ohandi yandje?) Oinima iwa ilipi handi ningi?
OMAETEPO: Mbela oshidjuu kwoove okudimbuluka oinima iwa oyo ho ningi? Oto dulu okupula omudali, ile kaume oo we lineekela, kutya oinima ilipi a didilika oyo u na ondjungu muyo, nonokutya omolwashike ta tile ngaho.
EFINAMHANGO LOMBIIBELI: “Keshe umwe na konakone oilonga yaye mwene kutya oya tya ngahelipi opo e i litangele, ndele hakuliyelekanifa navamwe.” — Ovagalati 6:4.
Omaunghundi oye: Mbela omoinima imwe ilipi nda pumbwa okuxwepopala? Omoinima ilipi handi mono shi li eyeleko okulonga osho sha puka? Omoinima ilipi nda pumbwa elipangelo?
EFINAMHANGO LOMBIIBELI: “Ngeenge ohatu ti: ‘Ihatu nyono,’ ohatu lifufya.” — 1 Johannes 1:8.
Etaleko lange: Mbela omifikamhango dilipi handi shikula, nomolwashike? Mbela onda itavela muKalunga? Mbela oinima ilipi ya tomha nge ndi itavele kutya oko e li shili? Enghatu dilipi handi tale ko da puka, nomolwashike? Ondi na etaleko la tya ngahelipi shi na sha nonakwiiwa?
EFINAMHANGO LOMBIIBELI: “To ka amenwa kokulungama, ndele to ka diininwa keendunge.” — Omayeletumbulo 2:11.
Otashi dulika yo u hafele oikundafanwa ei
OMANYAMUKULO OMAPULO 10 OO HAA PULWA KOVANYASHA
Ame omunhu naanaa a tya ngahelipi?
Okukala u shii omaukwatya, okudula, omangabeko nosho yo omalalakano oye, otashi ke ku kwafela u ninge omatokolo opandunge ngeenge u li momafininiko.
