Ovafilippi 4:1-23
4 Ovamwatate ovaholike, ondi mu hole nonde mu djuulukwa, molwaashi omu li ngaashi oshishani nehafo lange, kaleni mwa pama mOmwene.
2 Ohandi ladipike Euodia naSintike va kale ve na ediladilo limwe eshi tava longele Omwene.
3 U li omulongi pamwe naame omudiinini,* ohandi ku indile u kale ho kwafele ovakainhu ovo. Ovakainhu ovo ova kala hava longo noudiinini* pamwe naame, naKlemens nosho yo vakwao mokuudifa onghundana iwa, nomadina avo aveshe okwa shangwa membo lomwenyo.
4 Hafeni alushe mOmwene. Natango ohandi ti, hafeni!
5 Ovanhu aveshe nava shiive kutya omu na ondjele. Inamu dimbwa kutya Omwene oku li popepi.
6 Inamu kala mu na oshisho shasha, ndele oisho yeni aishe i shiivifileni Kalunga momailikano, nokwiindila mwa mana mo nokupandula.
7 Opo nee ombili yaKalunga oyo i dule eendunge adishe otai ka amena omitima nomadiladilo eni okupitila muKristus Jesus.
8 Onghee hano, ovamwatate, kaleni hamu diladila* kombinga yoinima aishe oyo yoshili, oyo ya fimana, oyo ya yuka, oyo ya koshoka, oyo i holike, oyo i na epopilo liwa, oyo iwa naayo ya wana okupandulwa.
9 Ningeni oinima oyo mwe lihonga kwaame nomwe i tambula ko, naayo mwa uda handi popi nosho yo oyo mwa mona handi ningi, opo Kalunga kombili a kale pamwe nanye.
10 Ndi li omupiya wOmwene, onda hafa unene eshi nda mona kutya natango ohamu lipula kombinga yange. Ndele natango inamu mona omhito mu kwafele nge.
11 Itandi popi ngaho molwaashi ngeno ndi na omhumbwe, osheshi onde lihonga okukala nda wanenwa monghalo keshe.
12 Ondi shii okukala ndi na shinini nosho yo okukala ndi na shihapu. Moinima aishe nomonghalo keshe onde lihonga oshiholekwa shokukala nda kuta nokukala nda fya ondjala, okukala ndi na shihapu nokukala ndihe na sha.
13 Ohandi dulu okufinda onghalo keshe omolwaau ta pe nge eenghono.
14 Kakele kaasho, omwa ninga nawa eshi mwa kwafela nge momaudjuu ange.
15 Ovamwatate nye Ovafilippi, omu shi shii kutya eshi mwa uda tete onghundana iwa, eshi nda dja muMakedonia, kape na nande eongalo limwe la kwafela nge ile la tambula ko ekwafo lange, ndele onye amuke.
16 Osheshi eshi nda li muTessalonika, omwa li mwa tumina nge sha, opo ndi li kwafele nasho, hashikando ashike shimwe, ndele ivali.
17 Itashi ti kutya ngeno onda hala eeshali, ndele onda hala mu longe oilonga iwa, opo i mu etele ouwa.
18 Ame inandi pumbwa sha; ondi na shi dulife pwaasho nda pumbwa molwaashi onda yakula oinima oyo mwa tumina nge ye uya naEpafroditus, eyambo olo li li edimba liwa la tambulwa ko nola hokiwa kuKalunga.
19 Kalunga oo e na shihapu naye ote ke mu pa ashishe osho mwa pumbwa okupitila muKristus Jesus.
20 Kalunga Tate yetu na fimanekwe fiyo alushe. Amen.
21 Kundilei po ovayapuki aveshe ovo ve li ovahongwa vaKristus Jesus. Otamu kundilwa po yo kovamwatate ava ndi li navo.
22 Otamu kundilwa po yo kovayapuki aveshe, unene tuu ovo hava di meumbo lOmukesari.
23 Efilonghenda lOmwene wetu Jesus Kristus nali kale pamwe nanye omolwomhepo yeni iwa.
Eshangelo lopedu
^ Eln., “omuhumbati wondjoko pamwe naame.”
^ Ile “ova kondja noudiinini.”
^ Ile “hamu dilonga.”
