Omuudifi 3:1-22
3 Ope na efimbo lakeshe shimwe,Efimbo loshilonga keshe tashi longwa koshi yeulu:
2 Efimbo lokudalwa nefimbo lokufya;Efimbo lokukuna nefimbo lokududa mo osho sha kunwa;
3 Efimbo lokudipaa nefimbo lokuvelula;Efimbo lokuhanauna nefimbo lokutunga;
4 Efimbo lokukwena nefimbo lokuyola;Efimbo lokunyika oluhodi nefimbo lokundanisha;*
5 Efimbo lokweekelashi omamanya nefimbo lokwoongela omamanya;Efimbo lokupapatela nefimbo lokuhapapatela;
6 Efimbo lokukonga nefimbo lokukanifa;Efimbo lokutuvikila nefimbo lokweekelashi;
7 Efimbo lokupombaula nefimbo lokuhondjela kumwe;Efimbo lokumwena nefimbo lokupopya;
8 Efimbo lokukala u hole nefimbo lokukala u tonde;Efimbo loita nefimbo lombili.
9 Omunailonga ota ka mona shike omolweenghendabala daye adishe?
10 Onda mona oilonga, oyo Kalunga a pa ovana vovanhu, opo va kale ve lipyakidila.
11 Okwa ninga oinima aishe iwa* pefimbo layo. Okwa tula oukwaalushe momitima davo, ndele ovanhu kave na efiku va shiive oilonga, oyo Kalunga kashili a longa okudja pehovelo fiyo opexulilo.
12 Onda fika pexulifodiladilo kutya kape na sha vali shimwe shiwa shi dulife okunyakukwa nokulonga ouwa mokukalamwenyo kwavo
13 nosho yo kutya keshe umwe oku na okulya nokunwa nokuhafela oilonga yaye aishe idjuu. Osho oshi li oshali ya dja kuKalunga.
14 Onda didilika kutya oinima aishe, oyo Kalunga kashili a ninga, otai kala po fiyo alushe. Itaku dulu okuwedwa sha noitaku dulu okukufwa sha. Kalunga kashili okwe i shita monghedi ya tya ngaho, opo ovanhu va kale have mu tila.
15 Keshe osho tashi ningwa osha ningilwe nale, naasho tashi ke uya osha li ko nale, ndele Kalunga kashili oye ha wanifa po osho tashi lalakanenwa.*
16 Onda mona vali oshinima eshi koshi yetango: Opo pe na okulongwa osho sha yuka opa longwa osho inashi yuka, naapo pe na okulongwa ouyuki opa longwa oukolokoshi.
17 Onghee onde lipopila momutima wange nda ti: “Kalunga kashili ota ka tokola ovayuki novakolokoshi, osheshi ope na efimbo loshinima noshilonga keshe.”
18 Onde lipopila yo momutima wange shi na sha novana vovanhu kutya Kalunga kashili ote ke va yeleka noku va ulikila kutya ova faafana noinamwenyo,
19 osheshi ope na exulilo* lovanhu nope na exulilo loinamwenyo. Aveshe ove na exulilo la faafana. Ngaashi oshinamwenyo tashi fi; omunhu naye osho ta fi, vo aveshe ove na omhepo* ya faafana. Onghee ovanhu kave dule oinamwenyo, nomolwaasho oinima aishe oyongaho.
20 Aveshe otava i monhele ya faafana. Aveshe ova dja mondwi yedu, naaveshe otava shuna mondwi yedu.
21 Olyelye e shi shii lela kutya omhepo yomunhu otai i pombada, nomhepo yoshinamwenyo otai kulukile medu?
22 Onda mona kutya kape na sha shimwe shiwa komunhu shi dulife okuhafela oilonga yaye, molwaashi oyo oyo ondjabi* yaye, osheshi kape na oo ta dulu okumona osho tashi ningwa po, ngeenge okwa fi.
Eshangelo lopedu
^ Eln., “lokunuka; lokutana nehafo.”
^ Ile “ya unganekwa nawa; ya yuka; ya wapala.”
^ Ile tashi dulika, “tashi taatawa.”
^ Ile “oidjemo.”
^ Ile “omufudo womwenyo.”
^ Ile “oshitukulwa.”
