Nehemia 9:1-38
9 Momafiku 24 omwedi omutiheyali, Ovaisrael ova li va ongala. Ova li ve lidilika va djala eeshako notave lifufile edu.
2 Ovo va dja moludalo lOvaisrael ove liyoolola mo movanailongo aveshe, ndele tava fikama nokuhepaulula omatimba avo vene nosho yo omanyono ooxe.
3 Opo nee ova fikama peenhele davo nokulesha mokule membo lOmhango yaJehova, Kalunga kavo, efimbo lomutenya oule weevili nhatu lwaapo,* neevili nhatu dikwao ova li tava hokolola omatimba avo nokulinyongamena Jehova, Kalunga kavo.
4 Jesua, Bani, Kadmiel, Sebania, Bunni, Serebia, Bani naKenani ova li ofika komutune wOvalevi nova ingida mokule kuJehova, Kalunga kavo.
5 Ovalevi: Jesua, Kadmiel, Bani, Hashabneia, Serebia, Hodia, Sebania naPetahja ova ti: “Fikameni nokutanga Jehova, Kalunga keni, fiyo alushe.* Nava tange edina loye la tumbala, olo linene li dule omanangeko noupuna nomahambelelo aeshe, oo ovanhu tava dulu okuyandja.
6 “Oove auke Jehova; oove wa shita eulu, heeno, eulu olo li li pombadambada nomatangakwaita alo aeshe, edu noinima aishe oyo i li ko nosho yo efuta noinima aishe oyo i li mo. Aishe owe i kaleka nomwenyo, nomatangakwaita omeulu otae ku linyongamene.
7 Oove Jehova, Kalunga kashili, ou wa hoolola Abram nowe mu kufa muUr shOvakaldea noku mu luka edina Abraham.
8 Owa mona kutya omudiinini kwoove momutima waye, onghee owa ninga ehangano naye, opo u mu pe edu lOvakaanan, lOvaheti, lOvaamori, lOvaperesi, lOvajebusi nolOvagirgas, li ninge loludalo laye. Owa diinina omaudaneko oye, molwaashi oumuyuki.
9 “Owa mona eshi ootatekulululwa va li tava fininikwa muEgipiti, nowa uda ekemo lavo pEfuta Litilyana.
10 Opo nee owa ninga omadidiliko nowa longa oikumwifilonga, opo u handukile Farao, ovapiya vaye aveshe novanhu aveshe vomedu laye, osheshi ou shi shii kutya ova ungaunga nootatekulululwa nai. Owe liningila edina, olo li li ko fiyo okunena.
11 Owa tukaula efuta moipafi yavo, opo va dule okutauluka efuta poukukutu, novataatai vavo owe va ekela moule ngaashi emanya la ekelwa momeva taa ndwafuka.
12 Ootatekulululwa owe va kwatela komesho omutenya noluudi loshilemo, noufiku onoluudi lomundilo, opo li minikile ondjila, oyo ve na okuya nayo.
13 Owe uya komhunda yaSinai, wa popya navo okudja meulu nowe va pa omatokolo e li pauyuki, eemhango doshili,* omaufomhango mawa noipango.
14 Owe va shiivifila Eshabata loye liyapuki, we va pa oipango, omaufomhango nomhango okupitila momupiya woye Moses.
15 Eshi va li va fya ondjala, owe va pa omungome okudja meulu, naashi va li va fya enota, owe va pa omeva okudja memanya nowe va lombwela va ye nova fyuulule edu, olo wa ana* oku va pa.
16 “Ndele vo, ootatekulululwa, ova kukutika omitwe davo nova tangalala* noinava pwilikina koipango yoye.
17 Kava li va hala okupwilikina, noinava dimbuluka oikumwifilonga yoye, oyo wa longa mokati kavo, ndele ova tangalala* nokunangeka po omukwatelikomesho, opo va shune moupika wavo muEgipiti. Ndele ove, oove Kalunga, oo e lilongekida okudimina po, omunalukeno,* nomunanghenda noku na filufilu ohole i na oudiinini* noino va efa.
18 Nonande ova hambula oshihongwafano shonhana moshivela,* ndele tava ti: ‘Ou oKalunga koye, ou e ku kufa mo muEgipiti,’ nova ulika filufilu kutya inave ku fimaneka,
19 ino va efa, eshi va li mombuwa omolwonghenda yoye inene. Oluudi loshilemo inali dja po puvo omutenya, opo li va wilike mondjila yavo, noluudi lomundilo oufiku, opo li minikile ondjila, oyo ve na okuya nayo.
20 Owe va pa omhepo yoye iyapuki i va pe eendunge; ino va anyena omanna nowe va pa omeva, eshi va li va fya enota.
21 Owa kala to va pe oikulya, eshi va li mombuwa oule womido 40. Inava hepa sha. Oikutu yavo inai pombauka neemhadi davo inadi dinda.
22 “Owe va pa omauhamba novanhu, nowe va tukulila oitukulwa yedu, opo va fyuulule edu laSihon, sha hala okutya, edu lohamba yaHesbon nosho yo edu laOg, ohamba yaBasan.
23 Owa hapupalifa oludalo lavo ngaashi eenyofi dokeulu. Opo nee owe va twala medu, olo wa udanekela ooxekulululwa kutya otava ka ya mo noku li fyuulula po.
24 Onghee ovana vavo ova ya mo nokufyuulula edu olo, nowa finda Ovakaanan moipafi yavo, ovo va li medu olo, nowe va yandja momake avo, mwa kwatelwa eehamba davo novanhu vomedu olo, opo ve va ningile keshe osho tashi va wapalele.
25 Ova kwata ko oilando oyo ya dingililwa komakuma a pama nedu la lyata nawa,* nokukufa po omaumbo e yadi oinima iwa yomaludi aeshe, eendungu, odo da xupwa nale, oikunino yomandjebele, omiti deemono nomiti doiimati dihapu. Onghee ova lya, va kuta, va ondoka nova hafela ouwa woye munene.
26 “Kava li va dulika; ove ku tukulila oshibofa nova pilamena Omhango yoye.* Ova dipaa ovaprofeti voye, ovo va li tave va londwele noku va alulila kwoove, nova ulika filufilu kutya inave ku fimaneka.
27 Onghee owe va efela momake ovatondi vavo, ovo va kala tave va etele omaupyakadi. Ndele ova kala tava keme kwoove, eshi va li moudjuu, nowe va uda okudja meulu omolwonghenda yoye inene, owa kala to va tumine ovawiliki, opo ve va xupife momake ovatondi vavo.
28 “Ndele diva, ngeenge ova mangululwa, ohava hovele vali okulonga osho shii koshipala shoye, noho va efele momake ovatondi vavo, ovo have va pangele.* Opo nee ohava aluka vali va konge ekwafo kwoove, noho va udu okudja meulu noku va xupifa oikando noikando omolwonghenda yoye inene.
29 Nonande owa kala to va londwele, opo va dulike vali kOmhango yoye, omolwelinenepeko ova anya okupwilikina koipango yoye. Ohava nyono omaufomhango oye, oo haa kaleke omunhu nomwenyo, ngeenge ote a diinine. Ndele ove ku pilamena, molwaashi ova li ve na omitwe neefingo dikukutu, nova anya okupwilikina.
30 Owe ve lididimikila oule womido dihapu nowa kala to va londwele nomhepo yoye okupitila movaprofeti voye, ndele ova anya okupwilikina. Xuuninwa, owe va yandja momake ovanhu vomoilongo oyo.
31 Omolwonghenda yoye inene, ino va hanauna po, ile u va efe, molwaashi oove Kalunga omunalukeno* nomunanghenda.
32 “Paife, Kalunga ketu, Kalunga munene, omunaenghono nomukumwifi, oo a diinina ehangano laye nokwa ulika ohole i na oudiinini, ino dimbwa omaudjuu aeshe, oo e tu hanga, eehamba detu, omalenga etu, ovapristeri vetu, ovaprofeti vetu, ootatekulululwa novanhu voye aveshe okudja pefimbo leehamba daAsiria fiyo okefiku eli.
33 Owa kala omuyuki, eshi wa efa tu ningilwe oinima aishe, oyo ye tu hanga, molwaashi ove omudiinini. Ndele fye ofye twa katuka shihe li pandunge.
34 Eehamba detu, omalenga etu, ovapristeri vetu nootatekulululwa inava diinina Omhango yoye, noinava yandja elitulemo koipango yoye, ile komadimbulukifo* oye, oo we va pa.
35 Naashi va li mouhamba wavo notava hafele oinima iwa ihapu, oyo we va pa, nova li medu la andjuka nola lyata nawa,* olo we va pele, inave ku longela noinava efa po okulonga oilonga yavo ii.
36 Onghee ofye ava tu li apa nena ovapika, heeno, ovapika medu olo wa pa ootatekulululwa va lye oiimati yalo nosho yo oinima yalo iwa.
37 Oilikolomwa yalo ihapu oyeehamba, odo wa efa di tu pangele omolwomanyono etu. Otadi tu pangele* noimuna yetu ngaashi tashi di wapalele, notu li moupyakadi munene.
38 “Okutala koinima aishe oyo, ohatu shange eudafanotwokumwe, notali pamekwa noshihakifo shomalenga etu, kOvalevi vetu nokovapristeri vetu.”
Eshangelo lopedu
^ Eln., “oshitine shefiku.”
^ Ile “okudja nale fiyo alushe.”
^ Ile “eemhango di shii okulineekelwa.”
^ Eln., “wa yelulila eke loye.”
^ Eln., “ova kukutika eefingo davo.”
^ Ile “ouwanghenda.”
^ Ile “e na olune.”
^ Eln., “ova kukutika eefingo davo.”
^ Ile “oshikalunga sha hemunwa.”
^ Ile “hali menifa nawa.”
^ Eln., “va ekela konima yavo Omhango yoye.”
^ Ile “have va hanauna po.”
^ Ile “e na olune.”
^ Ile “komalondwelo.”
^ Ile “hali menifa nawa.”
^ Eln., “pangele omalutu etu.”
