Nehemia 3:1-32
-
Okutungululwa kwomakuma (1-32)
3 Omupristeri munene Eliashib, novamwaina vaye ovapristeri, ova fikama va tunge Oshivelo shEedi. Ove shi yapula, ndele tava tula po omivelo dasho. Ove shi yapula okudja koshungongulu yaMea fiyo okoshungongulu yaHananel.
2 Ovalumenhu vomuJeriko ova li tava tungu ve li popepi navo. Opo nee taku shikula Sakkur, omonamati waImri.
3 Ovanamati vaHassenaa ova tunga Oshivelo shEeshi. Ova tula po eelama dasho, omivelo dasho, omakumba asho noihakifo yasho.
4 Opo nee okwa shikula Meremot, omonamati waUria, omonamati waHakkos, oo a li ta longo oilonga yokuwapekulula. Okwa shikula yo Mesullam, omonamati waBerekia, omonamati waMesesabel, oo a li yo ta longo oilonga yokuwapekulula; taku shikula Sadok, omonamati waBaana, oo a li yo ta longo oilonga yokuwapekulula.
5 Opo nee okwa shikula Ovatekoa, ovo va li tava longo oilonga yokuwapekulula, ashike ovanenenhu vomuvo kava li va hala okulininipika va kufe ombinga* moilonga yoovene vavo.
6 Jehoiada, omonamati waPasea, naMesullam, omonamati waBesodeia, ova wapekulula Omuvelo wOshilando Shikulu. Ova ninga eelama, ndele tava tula po omivelo dasho, omakumba asho noihakifo yasho.
7 Opo nee okwa shikula Melatia, Omugibeon, naJadon, Omumeroni, ovo va li tava longo oilonga yokuwapekulula. Ova li ovalumenhu vomuGibeon naMispa, va li ve li koshi yepashukilo* langoloneya woshitukulwa shoKombada yOmulonga.*
8 Okwa shikula vali Usiel, omonamati waHarhaia, umwe womovahambwidi voshingoli, oo a li ta longo oilonga yokuwapekulula; taku shikula Hanania, umwe womovalongi vomaadi,* oo a li yo ta longo oilonga yokuwapekulula. Ova tula muJerusalem omamanya pedu fiyo okEkuma Linene.
9 Opo nee okwa shikula Refaja, omonamati waHur, elenga letata loshitukulwa shaJerusalem, oo a li ta longo oilonga yokuwapekulula.
10 Okudja opo, okwa shikula Jedaia, omonamati waHarumaf, oo a li ta longo oilonga yokuwapekulula komesho yeumbo laye; taku shikula Hattus, omonamati waHashabneia, oo a li yo ta longo oilonga yokuwapekulula.
11 Malkia, omonamati waHarim, naHassub, omonamati waPahat-moab, ova wapekulula oshitukulwa shikwao* nosho yo Oshungongulu yOmafiya.
12 Opo nee okwa shikula Sallum, omonamati waHallohes, elenga letata loshitukulwa shaJerusalem, oo a li ta longo oilonga yokuwapekulula, pamwe novanakadona vaye.
13 Hanun novakalimo vomuSanoa ova wapekulula Oshivelo shEfilu. Ove shi tunga, ndele tava tula po omivelo dasho, omakumba asho noihakifo yasho. Ova wapekulula ekuma oule womaludimbo 1 000,* fiyo okOshivelo shOnduba yOmute.
14 Malkia, omonamati waRekab, elenga loshitukulwa shaBet-hakerem, okwa wapekulula Oshivelo shOnduba yOmute. Okwe shi tunga, ndele ta tula po omivelo dasho, omakumba asho noihakifo yasho.
15 Sallun, omonamati waKolhose, elenga loshitukulwa shaMispa, okwa wapekulula Oshivelo shOfifiya. Okwe shi tunga nonduda yasho, a tula po omivelo dasho, omakumba asho noihakifo yasho. Okwa wapekulula yo ekuma lEtale lOmukangha, olo la li popepi nOshikunino shOhamba, fiyo okEetalapa, odo da dja kOshilando shaDavid.
16 Opo nee okwa shikula Nehemia, omonamati waAsbuk, elenga letata loshitukulwa shaBet-sur, oo a li ta longo oilonga yokuwapekulula komesho yOmaendo aDavid fiyo oketale, olo la tungwa, nosho yo fiyo okEumbo lOvakwaita Ovanaenghono.
17 Okudja opo, okwa shikula Ovalevi, ovo va li tava longo oilonga yokuwapekulula: Rehum, omonamati waBani; taku shikula Hashabia, elenga letata loshitukulwa shaKeila, oo a li ta longo oilonga yokuwapekulula, e lile po oshitukulwa shavo.
18 Opo nee okwa shikula ovamwainamati vavo, ovo va li tava longo oilonga yokuwapekulula: Bavai, omonamati waHenadad, elenga letata loshitukulwa shaKeila.
19 Okwa shikula yo Eser, omonamati waJesua, elenga laMispa, oo a li ta longo oilonga yokuwapekulula oshitukulwa shikwao, osho sha li komesho yondjila ya londa, oyo ya finda kOmhungulilo yOilwifo, oyo i li pOngudimanya.
20 Opo nee okwa shikula Baruk, omonamati waSabbai, oo a li ta longo nondjungu oilonga yokuwapekulula oshitukulwa shikwao, okudja pOngudimanya fiyo opomuvelo weumbo lomupristeri munene Eliashib.
21 Okudja opo, okwa shikula Meremot, omonamati waUria, omonamati waHakkos, oo a li ta longo oilonga yokuwapekulula oshitukulwa shikwao, okudja pomuvelo weumbo laEliashib fiyo okoxulo yeumbo laEliashib.
22 Opo nee okwa shikula ovapristeri, ovalumenhu vomoshitukulwa shaJordan,* ovo va li tava longo oilonga yokuwapekulula.
23 Okwa shikula yo Benjamin naHassub, ovo va li tava longo oilonga yokuwapekulula komesho yeumbo lavo. Taku shikula Asaria, omonamati waMaasea, omonamati waAnania, oo a li ta longo oilonga yokuwapekulula popepi neumbo laye.
24 Opo nee okwa shikula Binnui, omonamati waHenadad, oo a li ta longo oilonga yokuwapekulula oshitukulwa shikwao, okudja peumbo laAsaria fiyo opOngudimanya nosho yo fiyo omohuke.
25 Okudja opo, okwa shikula Palal, omonamati waUsai, oo a li ta longo oilonga yokuwapekulula komesho yOngudimanya noshungongulu, oyo ya kwatafana nEumbo* lOhamba, oyo i li mOshihale shOvanangeli. Taku shikula Pedaia, omonamati waParos.
26 Ovapiya votembeli,* ovo va li hava di muOfel, ova longa oilonga yokuwapekulula fiyo okomesho yOshivelo shOmeva, kombinga yokoushilo, nosho yo yoshungongulu, oyo ya tungilwa kekuma.
27 Opo nee okwa shikula Ovatekoa, ovo va li tava longo oilonga yokuwapekulula oshitukulwa shikwao, okudja komesho yoshungongulu inene, oyo ya tungilwa kekuma, fiyo okekuma laOfel.
28 Ovapristeri ova longa oilonga yokuwapekulula pombada yOshivelo shEenghambe, keshe umwe e li komesho yeumbo laye.
29 Opo nee okwa shikula Sadok, omonamati waImmer, oo a li ta longo oilonga yokuwapekulula komesho yeumbo laye.
Taku shikula Shemaia, omonamati waSekania, omupashukuli wOshivelo shokOushilo, oo a li yo ta longo oilonga yokuwapekulula.
30 Okudja opo, okwa shikula Hanania, omonamati waSelemia, nomonamati omutihamano waSalaf, Hanun, ovo va li tava longo oilonga yokuwapekulula oshitukulwa shikwao.
Taku shikula Mesullam, omonamati waBerekia, oo a li yo ta longo oilonga yokuwapekulula komesho yolupale laye.
31 Opo nee okwa shikula Malkia, umwe womovahambwidi voshingoli, oo a li ta longo oilonga yokuwapekulula fiyo opeumbo lovapiya votembeli* nolovalandifi, komesho yOshivelo shOmakonakono nosho yo fiyo okonduda yopombada yomohuke.
32 Ovahambwidi voshingoli novalandifi ova longa oilonga yokuwapekulula okudja ponduda yopombada yomohuke fiyo opOshivelo shEedi.
Eshangelo lopedu
^ Eln., “va tule eefingo davo.”
^ Eln., “vomolukalwapangelo.”
^ Ile “shaEufrat.”
^ Ile “womovalongi vomaadi edimba liwa.”
^ Ile “oshitukulwa sha metwa.”
^ Eemeta 445 lwaapo. Tala Oshiwedelwako B14.
^ Ile tashi dulika, “vopopepi noshitukulwa.”
^ Ile “nOmbala.”
^ Ile “Ovanefinim.” Eln., “ovo va yandjwa.”
^ Ile “lOvanefinim.” Eln., “ovo va yandjwa.”
